JEREMIAH 46 - SHEEYU BAIBEL (BSI)

Ejipt mainou Karkhemish hinou Pahshiyu

¹ Tyahrütao vanou Mapao nou ahi paoe,

² raikai nasoua Ejipt mai vanou paoe, süolouzü Judah hi veo Josiah nahpoutu Jehoiakim nou vekou louyu po adai kousü, Babilon hi Veo Nebukhadnezzar nou Ejipt hi Veo Neko vei reihmaitao ye Euphratis reipe hinou buyu Karkhemish hinou reih veilouyu vanou haibüa paoe:

³ “Ejipt hi reihmai peikhotao nou sha-e, ‘Neletao vei reihna tulou ae reihbu hi talou khaio!

⁴ Rhei khesü na toupeio! Oh rheipfüyu maitao sü tapalo! Neletao vei peirü sü pfülo, neletao vei heung sü hei thailo! Neletao vei reihna sü pfülo!’

⁵ “Ana Enou daie ngaowe?” tea Mapao nou noue. “Puletao hai ngaopi shopoa nou tudakhai tare. Puletao vei reihmaitao sü pah shire; puletao sü ngaopi shopoa tuvei lousüyu koute tupoa nou tare ae puletao nou thailova reida khaive zhumore.

⁶ Tuvei shoyu maitao-a tupalou more; reihmaitao-a turei palou more. Reilova sü Euphratis rei nou buloure, puletao sü phi süloua kaodu tare.

⁷ Nail rei büa lashuyuna ae reipe veishi dzü dupayu büa buyu nasü thaoge?

⁸ Nail rei büa lashuyu, ae dzüdu büa reipe teitei dzü payu nasü Ejipt-e. Ejipt nou paoe, ‘Enou dusopa deiphao veishi holoulai; Enou nuhdutao ae sühinou hrüa buyu maiye sü souhawulai.

⁹ Kharochi peiwua panou rhei khesü takhaio, ae rheiluki khesü panou luta khaio! Soureih maitaoye seita khaio: Ethiopia ae rüh pfüveiyu Libya maitao, ae voulou poveiyu Lidia maitao sü seita khaio.’ ”

¹⁰ Zhou teithe hai Khoukhoulai Ramai Mapao vei teithe-e: zhou teithe puhnou khüngu phouloulai; zhou puhnou puhye ngaobayu maitaoye tudee peilai. Zhou teithe puhvei khoche sü rukhamo koute toulai, ae puletao vei zhe sü reikhamo koute kelai. Zhou teithe Ramai Mapao nou reilova buyu Euphratis reipe hinou posheela peilai.

¹¹ Oh Ejipt hi maitaore, Gilead hi taho souvei loure pou sü phoulo! Neletao vei pou khesü komore; neletaoye halia souveilou hoe.

¹² Tyahrütao nou nevei hrao sü choure; nenou krayu sü mai hrülai nou chouloure. Soureihmai ali nou ali hinou hraloua mai ahai kheinou kaodu tare.

Nebukhadnezzar nou Veyu

¹³ Babilon hi Veo Nebukhadnezzar nou Ejipt teidei hi reih hulouyu phaki, Mapao nou ahi haibüa paoe,

¹⁴ “Ejipt maivei nuhdutao, Migdol, Memphis ae Tahpanhes hinou haibüa shapao peio: ‘Lah neletaoye vuloure donou soudalo; neletao mai hrülaiye soureih hinou souha laire!

¹⁵ Neletao vei khouko bushoyu Apis rah nasü daivanou kaodu tare? Mapao nou puhye sü khoukhaore!’

¹⁶ Neletao vei reihmaitao sü phi süloua kaodu tare; ae puletao mai ali nou ali hi paoe, ‘Thakhaio! Eletao lahvei ki hi dakhai talai she, ae ngaoba maivei khoche hinou turei palou laikhe!’

¹⁷ “Ejipt hi veoye zhih ashu ali peio— ‘Mü duwo, kaozhou aveih teile hayupu.’

¹⁸ Khoukhoulai Mapao Enou Veo nasüe. E hai hriyu Ramai-e. Deichitao hi Tabor Deichi nou kukayu büa ae zai pei hinou Karmel Deichi nou kua buyu büa neye dure maina vei khouko hai sükulai.

¹⁹ Oh Ejipt maitaore, neletao hai hukhamai soua nüpoa tare donou soudalo! Memphis sü radeiki hi soudathou khaipeiwulai, soushi khaiwua panou mai lia hrülai moe.

²⁰ Ejipt hai zhai veishoyu chokü ali büa bue, ana reilova nou thoumü ali nou puhvei va hisü ve taoloure.

²¹ Honapai nou ngapoa veyu reihmaitao hai cho toutu ali büa souloure khouko sü hazei toure. Puletao sü lapoa nou reih sü dulou hore; mai hrülai nou tudakhai takhai baire. Puletaoye soukanghi peire teithe sü vere, ae puletaoye souveaho laiyu teile sü vere.

²² Nghou nou ngaotayu büa Ejipt mainou ngaotare, daiolouzü puletaoye ngaobayu mai sü takoure. Süü daoyu mai ali büa puletao nou marei poloua reih huloure.

²³ Puletao nou honapai vei vaohro veishi sü souhawure. Puletao vei maitao hai phouhao louhore; puletao vei reihmaitao hai khazü jünou pouloure.

²⁴ Ejipt maitaoye sü haongu soupeiwure; reilova nou buyu maitao nou puletao jünou reih veiloure. Haisü Mapao Enou paowe.”

²⁵ Khouko buo Mapao, Israel maivei Ramai nou paoe, “Enou Ejipt maitao, puletao vei rahtao ae vemaitao koa Amon mai, ae Thebes hi rahtao sü tudee peilai. Enou Ejipt hi veo, alia puhye loucheyu mai hrülaiye sü saloulai,

²⁶ ae puletaoye southanüa buyu Babilon hi Veo Nebukhadnezzar ae puhvei reihmaitao bah hi thoupeiwulai. Ana raichoki büa Enou Ejipt hisü maiye panou hrüpu peilai. Haisü Mapao Enou paowe.”

Mapao nou Puhvei Maitaoye Khailupa peire

²⁷ “Avei maitaore, ngaopiso, Israel maitaore, chathai taso. Enou neletaoye dousho-a buyu teidei hinou vupa peilai, neletaoye hukhamai soua nüpoa tayu teidei hinou khailupa peilai. Neletao nou ki hisü dakhaive loulai ae kaona-a hrüloulai; neletao hai zhoukao vei-a buloulai, ae mai linoua neletaoye soupilai moe.

²⁸ Enou neletaoye tave khailupa peilai. Enou neletaoye soupho rarou khaitouyu tyahrü veishi sü souha peilai, ana Enou neletaoye souhalai moe. Enou neletaoye tudee peimoa panou talai moe, ana Enou kaozü hinou tudee pei-a bailai. Haisü Mapao Enou paowe.”