JEREMIAH 36 - SHEEYU BAIBEL (BSI)

Baruk nou Rakothoki hinou Lekhai touyu Larü Phouyu

¹ Josiah nahpoutu Jehoiakim nou Judah hi veo soulouyu po adai kousü Mapao nou ahi haibüa paoe,

² “Zükhaiyu larü ali poloua Enou ne hi Judah ae Israel maitao alia tyahrü veishi donou paopei khaitouyu chipao teitei, süsü Josiah nou vekou louyu teithe hinou poa zhou koute paoyu chipao khesü rüthou khailo.

³ Enou Judah maitao hi veahoyu sü pove peilai tea paopei khaitouyu khesü puletao nou choulouyu phaki, puletao nou vah ashi souyu sü thaolou vei-e, sükulouzü Enou puletao vei mahmo khesü khaipeia bailai.”

⁴ Südonou Enou Neriah nahpoutu Baruk ye kuloua Mapao nou ahi paoyu chipao teitei sü panou puhye larü rüthouloue.

⁵ Süthaisü Enou Baruk hi haibüa paodou peie, “Eye Mapao vei Rathoki hisü panou vebare,

⁶ ana maikhe mainou lüh-a ae veachi pao-a buyu phaki Enou neye panou sühi veyu jüpawe. Mapao nou ahi paopeiyu chitao ae Enou neye panou rükhai touyu teitei sü maisou panou choulou süyu hinou phoungao peio. Sükhesü nenou nuhdu kukhe hinou veyu Judah maitao hi-a chongao peio.

⁷ Puletao nou Mapao hi veachi paoloua puletao nou vah ashi souyu khesü thaolou vei-e, daiolouzü Mapao nou puletao hi puhvei lekha rarou hai ngaopi sho-a paopei khaitoue.”

⁸ Südonou Baruk nou Mapao vei chipao, Enou paopeiyu bütoua Rathoki hinou phoungao peie.

⁹ Judah hi veo Josiah nahpoutu Jehoiakim nou vekou louyu po angou vei khouh akü kousü Jerusalem hi mai hrülai alia Judah vei nuhdutao hinou veyu maikhe mainou Mapao vei jüpa ngaoloure donou veachi pao-a lüh-a nou bue.

¹⁰ Süthaisü maisou nou kei-a buyu hinou Enou paopeiyu teitei sü Baruk nou larü nasü Rathoki hi rü-apeio Shaphan nahpoutu Gemariah vei kide hinou phoungao peie. Puhvei kide hai Rathoki vei Robomü Ashu navei reilova nou bue.

Lekhai touyu Larü sü Peikho maitao hi Phoungao Peiyu

¹¹ Shaphan tyao, Gemariah nahpoutu Mikaiah nou larü hinou phoungao peiyu sü choulou khaie,

¹² puhnou veo vei larü rü-apeio vei kide hisü veloure; ae süphaki peikho maitao hai sühinou vejüa nou bue; rü-apeio Elishama, Shemaih nahpoutu Delaiah, Akbor nahpoutu Elnathan, Shaphan nahpoutu Gemariah, Hananiah nahpoutu Zedekiah ae peikhomai kukhetao-a sü hinou bue.

¹³ Baruk nou maisou hi phoungaoyu chipao teitei sü Mikaiah nou puletao hi paongao peie.

¹⁴ Süthaisü peikho maitao nou Baruk ye kupove panou larü nasü phoungao peire donou Kushi nahpoutu, Shelemiah nahpoutu, Nethaniah nahpoutu Jehudi ye seitare. Baruk nou lekhai touyu larü nasü puletao hi povere.

¹⁵ Puletao nou puh hi paoe, “Talou buloua larü nasü Etao hi phoungao peikhaio.” Südonou Baruk nou puletao hi phoungao peie.

¹⁶ Puhnou phoungao peiyu thai, puletao hai alinou aliye ngaopi shopoa nou zhue, ae puletao nou Baruk hi paoe, “Etao nou haisü veo hi paosü peimo louzü shire.”

¹⁷ Süthaisü puletao nou Baruk hi noue, “Kabüa chipao haitao hai ne rüloue, Etao hi paongao khaio. Jeremiah nou ne hi paopeia nenou rülouvu?”

¹⁸ Baruk nou puletao hi chila peie, “Jeremiah nou chipao alili nou paopeia sütao sü Enou larü hai hi larüdzü nou rüloue.”

¹⁹ Süthaisü puletao nou Baruk hi paoe, “Jeremiah ne hai taho tutsülo, ae ne hai daiki nou bue touyu mai lia panou süsho.”

Veo nou Larü nasü Mei Deiyu

²⁰ Peikho maitao nou larü nasü veo vei rü-apeio Elishama vei kide hi pokhaiwua veo hi taho sütao veishi hai paongao peie.

²¹ Süthaisü veo nou Jehudi ye seiho panou larü nasü poloure. Puhnou larü sü Elishama vei kide hinou poloua veo hi ae süpehao hinou la-a buyu peikho maitao hisü poungao peie.

²² Haisü khouh akü nava hinoue, ae veo nou puhvei teisaiki vei ki hinou mei voa nou bue.

²³ Jehudi nou chime asü moa adai phoukouyu phaki sütao hai veo nou koutu ali poloua lekhai touyu larü nasü vadeloua mei deipeie. Haibüa lekhai touyu larü teitei sü veo nou meidei laikhai toure.

²⁴ Ana phoungao peiyu chipaotao vanou veo alia puhvei peikho maitao hai mailiro chouloua ngaopiyu moa leveayu sü hare.

²⁵ Elanathan, Delaiah ae Gemariah puletao nou veo hisü zhuvea nou larü sü meidei peiso tea khowe, ana veo nou puletao vei akho sü keipei more.

²⁶ Süthaisü veo nou puh nahpoutu Jerahmeel, Azriel nahpoutu Seraiah ae Abdeel nahpoutu Shelemiah puletaoye nou Eye alia avei larü rü-apeio Baruk ye nülo tea kharochi peie, ana Mapao nou ahai ye poku peie.

Jeremiah nou Larü Kukhe Ali Rüpu louyu

²⁷ Enou Baruk hi paopeia panou rükhai touyu larü nasü Veo Jehoiakim nou meideiyu thai, Mapao nou ahi

²⁸ larü kukhe ali poloua raichoki rükhai touyu chipao raibüa rüpulo tea paoe.

²⁹ Mapao nou veo hi haibüa paopeio tea ahi paoe, “Nenou lekhai touyu larü nasü meidei laiwure, ae Jeremiah hisü daisounou Babilon hi veo nou tave teidei hai nasü soushiwulai ae maikhe maitao alia hrikhaona khesü southawulai tea paowe tea noue.

³⁰ Südonou chuo Mapao Enou Judah hi veo Jehoiakim hisü paowe, süolouzü nevei tounah ali-a panou David vei vedei hisü veo soupulai moe. Neletao vei thaiphao khesü panou hea teile hi teinghi nou phulai, ae khei teile hi panou vüra nou kou sholai.

³¹ Enou neye ae nevei tounah maitao, alia nevei peikho maitao hrülaiye sü puletao nou mahmo soukhai touyu donou tudee peilai. Enou paopi peiyu khesü nenou moa Jerusalem ae Judah hi maitao nou ngaophou peimore, südonou Enou paopi peiyu teitei sü neletao mai hrülai pei hi pove peilai.”

³² Süthaisü Enou lekhai touyu larü ali poloua avei larü rü-apeio Baruk hi peie, ae Enou paopeiyu teitei sü puhnou rüloure. Enou raichoki paopeia rükhai touyu larü süna bütoua puhnou rüpu loure.