JEREMIAH 31 - SHEEYU BAIBEL (BSI)

Israel Mainou Ki hi Dakhai Veyu

¹ Mapao nou paoe, “Enou Israel mai hrülai vei Ramai soure teile sü velaire, ae puletao nou avei mai soulai.

² Athai hinou tureipa louyu maitao hai radeiki hinou Enou zhuveayu sü ngaopeie. Israel maitao nou sochaoyu jüpa sho-a buyu phaki,

³ kadou shoyu buh hinou puletao hi ve ngaopeie. Israel maitaore, Enou neletaoye thaokhai toumoa leshi peie, südonou Enou tobai soumoa neletaoye leshi peilai.

⁴ Enou neletaoye soushupu peilai. Neletaoye panou beibei poloua asah soua lou soua choyu pa soupu peilai.

⁵ Neletaoye panou Samaria deichitao hinou darkha kipei sü soupu loulai, ae rashibe shothouyu maitaoye panou rashithou sü haitou loulai.

⁶ Ephraim deichitao hinou reihkhaomai panou haibüa sha-a paoyu teile sü velai, ‘Eletao Ramai Mapao nou buyu Zion hisü talai she.’ ”

⁷ Mapao nou haibüa paoe, “Israel maiye donou asa-a lou soulo, ae tyahrütao pei hinou dukayu naye donou shusoua shakhaio. Neletao nou paoshoyu lou sü soukhaio, ‘Mapao nou puhvei maitaoye khailupa peire; puhnou shokhai toua buyu mai hrülaiye sü vupa peire.’

⁸ Enou puletaoye sü reilova nou save peilai, ae deiphao akhai hinou puletaoye save jüpeilai. Puletaoye koa nghichayu mai alia shovaiyu mai, poupfüyu mai ae nah nare teile nghitei-a buyu maitao-a panou veloulai. Puletao nou dakhaive tyahrü aduli soulai.

⁹ Avei maitao nou krapoa nou veloulai, veachi pao-a Enou puletaoye sa-a dakhaive peilai. Enou puletaoye reidzü küa buyu buh hisü save peilai, ludu züveiyu hinou sa-a panou phi süloulai moe. Enou Israel maiye puo ali büpeilai, ae Ephraim hai anahpoutu naraio nasüe.”

¹⁰ Mapao nou paoe, “Tyahrü taore, apai keilo, ae dousho-a buyu zaipetao hi avei chipao sü shapao peio. Enou avei maitaoye hupho raroulaiwure, ana Enou puletaoye sa-a dakhaive peilai, ae zhaokhowo nou zhaotu khesü khopeiyu büa Enou puletaoye khopeilai.

¹¹ Enou Israel maiye sü lahdo soua phapeiwure, ae puletaoye khouko bushoyu tyahrü hinou vupa peiwure.

¹² Puletao nou Zion Deichi hinou tave asah soua lou soulai, ae Enou sapeinatao donou lesa sholai — thoudzü, darkhadzü, oliv theadzü, zhaotu, nghitu ae kikhaorü peiyu vanou asalai. Puletao hai dzü veisho-a züpeiyu kipei ali bülai; puletao nou jüpa-a buyu veishi sü ngaoche loulai.

¹³ Süthaisü loumainah nou asah soua cholai, ae nahlemai alia tsümai nou lesalai. Enou puletaoye sousava peilai, ae puletao nou dopfüa buyu nasü asah hi soudathou peilai, ae puletao nou veaho-a buyu nasü vasayu hi soudathou peilai.

¹⁴ Enou napao maitaoye touso veili nou pa toulai, ae avei maitao nou jüpayu veishi sü rukhayu soupeilai. Haisü Mapao Enou paowe.”

Israel Mai hi Mapao nou Zhuvea Peiyu

¹⁵ Mapao nou paoe, “Ramah hinou dopfüa krayu pai ali choue. Rachel nou puhvei nahmai donou kra-a bure; puletao sü tare, ae honapai hai panou le sousa bare.

¹⁶ Neletao nou krayu sü baio ae neletao vei nghidzü sü southe-o. Neletao nou nahmai donou soupfüyu vah veishi sü panou buu ngaomoa talai moe; puletao sü ngaobayu maitao teidei hinou dakhai velai.

¹⁷ Haithai naki donou neletao hai areih bue, neletao vei nahmaitao sü ki hi dakhai veloulai. Haisü Mapao Enou paoe.

¹⁸ “Israel maitao nou haibüa dopfüa nou paoyu Enou choue, ‘Mapao, Eletao hai sa-a tata moyu cho-ha büre, ana nenou Etaoye chi zülo tea paodou peie. Etaoye sa-a dakhai vepeio; dakhai tare donou Etao hai souda loure, Etao Ramai Mapao.

¹⁹ Etao hai ne hinou tarei tare, ana thasho-a nou dakhaive nülure. Nenou Etaoye tudee peiyu thai, Etao sü dopfüa nou bure. Etao nou nahle-a buki mahmo souyu donou Etao hai haongu pfüa nou bure.’

²⁰ “Oh Israel, neye sü Enou leshi kayu nahpoutu nasüe, Enou jüpa kayu nahtou-e. Enou ne zhih sapayu chüsü Enou neye leshi-e. Avei tsüle sü ne hi bua baie, ae Enou neye zhuvea peilai.

²¹ Ne lah nevei ludu sü shee soukhailo; ne thaowua tala tayu ludu nasü phouda khailo. Oh Israel maitaore, dakhai velo, nenou thaowua tayu nuhdu hisü dakhai velo.

²² Lü hayu maitaore, neletao teile kaso letsüa bulaige? Daiolouzü Enou deiphao hi ha ashu ali soupeiwure, naotumai ali nou poutu maiye vupa peilai.”

Ramai vei Maitao nou Haithai Vasare

²³ Israel maivei Ramai Mapao nou paoe, “Enou puletaoye zhoukao aveih peiyu phaki, puletao nou Judah vei teidei ae nuhdutao hinou haibüa paolai, ‘Sheeyu Jerusalem deichi, puhnou buyu sheeyu buh nasü Mapao panou ha peio!’

²⁴ Maikhe mainou Judah ae sühinou buyu nuhdutao hisü hrüpulai, alia sühisü tatamai, ae zhaokhomai nou zhaotu kho-a nou hrülai.

²⁵ Veaho-a laiyu maitaoye sü Enou souhripu peilai ae touha-a lülouho-a laiyu maitaoye sü pouphou rukhayu sü soupeilai.

²⁶ Süthaisü maikhe mainou haibüa paolai, ‘Enou zü-zhi ta-e ae veisho-a kaishu ngaoloue.’

²⁷ “Mapao Enou Israel ae Judah teidei sü panou maikhe mai ae soukhaona nou hrüphoua bupure teile sü velaire tea paowe.

²⁸ Enou puletaoye paila laiyu, paikhaoyu, polaiyu, soushi peiyu ae souhayu bütoua Enou puletaoye shothoupu peilai ae soushupu peilai.

²⁹ Teile süna veyu phaki, maikhe mainou haibüa paopulai moe, ‘Pfüpuo nou darkha shithou khraiyu toulou khaie, nahmaitao huh nou kei-a baiwe.’

³⁰ Ana mah souyu mainou lah mah donou thai-a bailai; darkhashi khaiyu toulouyu mainou lah huh nou kei-a bailai.”

³¹ Mapao nou paoe, “Enou Israel ae Judah maiye koa vo ashu soure teile sü velaire.

³² Haina louzü Enou puletao vei puopao maitaoye Ejipt teidei hinou sapa peiyu phaki, koa vo souyu büa soulai moe, daiolouzü Enou puletao vei cha ali büa salai peiyuma puletao nou vo sünasü pfüthowure.

³³ Enou Israel maiye koa vo ashu soure nasü haibülai: Enou avei chikha nasü puletao vei tsüle hi thoupeilai ae puletao vei lüthou pei hi rüthoukhai peilai. Enou puletao vei Ramai soulai, ae puletao nou avei mai soulai.

³⁴ Süthaisü puletao mai ali noua mai ali hi Mapao ye sülo tea paodoulai moe, daiolouzü taidu sümoa mai hrülai nou Eye süa bailai. Enou puletao vei mahmo khesü khai peilai, ae puletao nou soumah pfümah khaitouyu khesü Enou lichopu peilai moe. Haisü Mapao Enou paowe.”

³⁵ Mapao nou hea teile panou vare donou teinghi peie, khei teile hi panou vare donou tei hi vuh ae khouh peie. Puhnou zai hi dzü sü soule peia panou rapawe; puhvei zhih sü Khoukhoulai Mapao touwe.

³⁶ Khouh teinghi hamo koute, Israel maivei tyahrü hai hatalai moe tea puhnou paopei khaitoue.

³⁷ Mapao nou haibüa paoe: “Kusho-a buyu ratei sü doulou sülouzü, ae deiphao soushuyu beikhei sü phoupa lousüe toulouzü, süthaisü Enou Israel maivei tyaosholea taosü puletao nou soupfü khaitouyu vanou malaiwulai.” Mapao nou haisü paowe.

³⁸ Mapao nou paoe, “Avei nuhdu soure donou Jerusalem sü Hananel Kipeitao hinou poa Kainghou Robomü koute soushupure teile sü velaire.

³⁹ Alia deirai sü teinghi loulo vanou poa Gareb deichi hi khetelai, ae süthaisü Goah hi sühao poa koulai.

⁴⁰ Thaiphao laikhai ba-a daovuyu deikho veishi, ae süpei hi buyu doutao hinou Kidron reitou hi koute, teinghi palova buyu Rhei Robomü koute hai Eye donou shee-a bailai. Nuhdu hai nasü soushi souhapu khaitoulai more.”