JEREMIAH 3 - SHEEYU BAIBEL (BSI)

Louchelou Hoyu Israel

¹ Mapao nou paoe, “Cha ali nou puh chapfüye hulaiwua honapai nou puhye thaowua chaa kukhe mai ali ki vetayu thai, puhnou honapaiye sü napu loushi-e. Sükuyu thaio teidei sünasü souzhaiwure. Ana Isreal mai louzü jüpayu mai alao bue, ae chuo puletao nou ahi dakhai veyu jüpare!

² Ne nghithou hepa deichiva hi zhukhaio. Nenou koa khakha-a vah ashi soumoyu daiki bue? Arab mainou rekou ludu hinou maiye kho-a buyu büa nenou ne jüpamaiye kho-a bue. Nenou khakha vah souyu donou teidei sü souzhaiwure.

³ Südonou teisü rüvepei more ae khonü-khana hi teirü sü vemore. Nenou khakha-a laiyuma ne hisü hraoyu touyu halia hare.

⁴ “Ae nenou chuo ahi haibüa paoe, ‘Ne hai Apuoe, E nahle-a bukinou nenou Eye khosalai peie.

⁵ Ne teisa nou rarou koute laimoe; akhai koute Eye thaowua talai moe.’ Oh Israel maitaore, nenou sübüa paowe, anou nenou vah ashi souyu louzü thaokhai toumoe.”

Israel ae Judah nou Ledalou molouzü Shiyu

⁶ Josiah nou veo soua bukinou Mapao nou ahi paoe, “Louchelou shiyu naotupai, Israel nou dai vah souyu ne ngaoho moe? Puletao nou kabüa deichi kuyu vahi tapaloua ae süübe phi khonou khakhayu vah sou-a laiyu ne ngaomoge?

⁷ Puhnou haibüa hashi teitei soucheyu thai, puhnou ahi dakhai ve shulai tea Enou tsücho-e, ana dakhaive more, ae louchelou hoyu puh tupai Judah-a vah haitao sü ngaokhai touwe.

⁸ Louchelou hoyu Israel nou vah ashi souyu teiteisü Judah-a ngaokhai toure, ae Enou tunaoyu vei larü peiwu-a Israel ye sü hutawure. Anou louchelou hoyu Israel vei tupai Judah nou ngaopi more. Honapai-a khakha-a chaozüyu vah ashi sü soutare,

⁹ ae puhsü hraoyu hai-a halia hare. Puhnou süü chuhye tho-a vah ashi souyu donou teidei sü souzhai khaiwure.

¹⁰ Vah ashi teitei souwu-a bua, chilee moyu Israel vei tupai Judah nou puh le teitei nou peimoa zhai soulou-a ahi dakhai vere. Haisü Mapao Enou paowe.”

¹¹ Süthaisü Mapao nou ahi paoe, Israel mainou vah ashi soua puh hinou tarei tayuma, puhnou chilee cheche moyu Judah jünou veipu hie.

¹² Puhnou Israel hisü taho haibüa paopeio tea ahi paoe, “Chilee cheche moyu Israel, ahi dakhai velo. Enou ne pei hi raroupu khailai more, dailouzü E hai maiye zhuvea süyu Mapao-e, Enou neye teisa nou rarou-a bulai moe.

¹³ Ne hai mahwure, ae nevei Ramai Mapao khakhe hi buba-a thaikhai tare, süübe madai phi khonou nevei lesha nasü vakou mai rahtao hi peiwure, ae nenou avei chipao taosü zü peimore tea nenou mahla louzü chebaie. Haisü Mapao Enou paowe.

¹⁴ “Oh louchelou hoyu maitaore, dakhai velo; daiolouzü neletao hai avei baie. Enou neletaoye saloulai, nuhdu ali hinou mai ali, ae khü ali hinou mai ahai, saloua Zion Deichi hisü save peilai.

¹⁵ Enou neletaoye achi züyu zhaokho maiye seive peilai. Puletao nou neletaoye sü ratsü ae sükulou süyu hinou khopeilai.

¹⁶ Süthaisü teidei sühinou neletao nou mai pousho paloulai, ae maikhe mainou avei Vo Sübvü vanou raopu laimoe. Puletao nou hai vanou lichopu laimoe, moyuma hai nasü darkapu laimoe, moa kukhe ali-a soupulai moe.

¹⁷ Sükuyu teile nasü veyu phaki, Jerusalem hai ‘Mapao vei Vebuh’ tea kulai, ae tyahrü hrülai nou tave sühinou Eye tholai. Puletao nou rochi-a puletao vei tsüle ashi nasü thaifüa vah ashi sü soutapulai moe.

¹⁸ Israel nou Judah maiye louzho loulai, ae puletaoye reilova buyu tyadei hi nüpoa tayu hinou puletao hai koa Enou puletao vei puopao hi teisa vei panou soure donou peikhai touyu teidei hisü dakhaive loulai.”

Ramai vei Maitao nou Basharaye Thotayu

¹⁹ Mapao nou paoe, “Oh Israel, Enou neye anahpoutu soua polounüe, ae neye veishoyu teidei ali peinüe, deiphao teitei hinou veikayu teidei. Neletaoye panou Eye neletao vei Puo tea kunüe, ae ahinou pa tala tapu khaimoa bunüe.

²⁰ Ana neletao hai louchelou shiyu chapfü ali büa baire, neletao nou ahi chilee cheche pei more. Haisü Mapao Enou paowe.”

²¹ Deichi vanou Israel maitao nou kra-a khoyu pai sü choue, daiolouzü puletao nou mah vei hrü hinou hrüa bure, ae puletao vei Ramai Mapao ye ngaiwure.

²² Mapao hinou tala tayu mai hrülai, dakhai velo; puhnou neletaoye souvei peilai ae soucheche peilai. Neletao nou paoe, “Ovai, Etao nou Mapao hisü dakhai vewe, daiolouzü puh sü Etao vei Ramai-e.

²³ Deichi vanou cheche moyu rahtaoye thoyu donou Etaoye soukha peimoe. Israel maiye soukha peiyu hai Etao Ramai Mapao hinou ve-a baie.

²⁴ Ana nahlea bukinou, Etao puopao maitao nou kounoua soupakhai touyu puletao vei zhaokhome, chokhome, puletao nah naotu, poutu teitei sü hraongu hayu Baal rah nou nütoukhai loure.

²⁵ Eletao nou Eletao hrao donou kou zülou laikhe, ae hraongu nasü panou Etaoye holou laikhe. Enou nahle bukinou chukoute Etaoye ae Etao puopao Ramai Mapao nghoujü nou mah souwure. Etao nou Mapao Ramai chi zümore.”