JEREMIAH 27 - SHEEYU BAIBEL (BSI)

Jeremiah nou Chode vei Phaodao Pfüyu

¹ Judah hi veo Josiah nahpoutu Zedekiah nou vekou louyu thaibü, Mapao nou ahi

² chophaodao rai hai souhee nou soulo ae phaokayu nasü süü nou souloua avei ngu hinou pfülo tea paoe.

³ Judah hi veo Zedekiah ye daore donou Jerusalem hi velouyu Edom hi veo, Moab maivei veo, Ammon, Tair ae Sidon hi vemaitao hisü Mapao nou ahi kopomaiye seiho haibüa paopeio tea paoe.

⁴ Khoukhoulai Mapao, Israel maivei Ramai nou puletao vei vemaitao hisü haibüa kharochi peio tea ahi paoe:

⁵ “Avei khouko ae pfüchi sünou teideiphao, deiphao mai, ae deiphao hi hrikhaona teitei sü Enou soupeie; ae hai nasü Enou dolouyu mai tarali hia peia baiwe.

⁶ Enou tyahrü veishi sü avei kilaio Babilon hi Veo Nebukhadnezzar bah hi thaothou peiwure, ae Enou rekhaona koute panou puhvei kuvah soure donou peiwure.

⁷ Tyahrü hrülai nou puhvei kuvah soulai, ae puhvei vedei hai kaodu tare teile vemo koute hai puletao nou puhvei nahmai ae tyaomaitao vei kuvah sü soulai. Süthaisü puhvei tyahrü sünou khouko buyu tyahrütao ae dusoyu vemaitao vei kuvah soulai.

⁸ “Ana tyahrü moa vedei taralinoua Babilon hi veo Nebukhadnezzar vei khakhe hi buba louzü, Enou tyahrü süna sü soureih, tokaa, ae sounou ashi sünou tudee peia panou Nebukhadnezzar nou souha khaimo koute souvea peilai.

⁹ Südonou neletaoye Babilon hi veo vei khakhe hi buso tea paoyu rachipaola maitao, moa mümuyu maitao, keingu maitao, moyuma kheikupado soulousü maitao chi loucheso.

¹⁰ Puletao nou neletao hi da-a rachi sü pao-a nou baie, süvanou neletaoye neletao vei teidei hinou dousho-a satawulai, ae Enou neletaoye hulaiwulai alia souhawulai.

¹¹ Ana tyahrü taralinoua Babilon veo vei khakhe hi bua puhvei kuvah soulouzü, Enou puletaoye sü panou lah puhvei teidei hinou tadao toua hrüa bulai. Haisü Mapao Enou paowe.”

¹² Enou Judah hi Veo Zedekiah hi sübütoua paoe, “Babilon veo vei khakhe hinou buloua baio, puh ae puhvei maitao kuvah soulouzü ne hriloulai.

¹³ Mapao nou paoyu büa Babilon vei veo khakhe hinou bumoyu tyahrü taralia soureih hinou, moyuma tokaa hinou moa sounou hinou thai-a bailai. Daisounou ne alia nevei maitao hai thailai touwe?

¹⁴ Babilon vei khakhe hi buso tea paoyu rachipaola maitao vei chi sü poso. Puletao nou neletao hi da-a rachi pao-a baie.

¹⁵ Puletaoye Mapao nou seita moe, ae puhvei zhih hinou da-a rachi pao-a baie tea puhnou paoe. Südonou neletaoye puhnou hulaiwulai, ae neletao alia neletao hi da-a rachi paoyu rachipaola maitaoye sü southawulai.”

¹⁶ Süthaisü Enou napao maitao ae maikhe maitao hi Mapao nou paoyu chipao khesü paopeie, “Babilon hinou rathoki vei kini khesü thashoa nou poa dakhaive laire tea paoyu rachipaola maitao vei chi keiso, puletao nou da-a neletao hi pao-a baie.

¹⁷ Puletao vei chi sü keiso! Babilon vei veo khakhe hi peithoulo ae hrilo! Daisounou pa nuhdu hai nasü soushiwulai touge?

¹⁸ Puletao hai checheyu rachipaola maitaoye toulouzü ae avei chipao hai puletao hi bue toulouzü, puletaoye panou Khoukhoulai Mapao ahinou Rathoki ae veo vei ki hinou buyu kini khesü panou Babilon hi potaso tea kholo.”

^19-20 (Veo Nebukhadnezzar nou Judah hi veo Jehoiakim nahpoutu Jehoiakin alia Judah ae Jerusalem hi peikho maitaoye Babilon hi nüpoa tayu phaki, puhnou dekatao, baosahu vei dzükhao, cholukitao, ae rathoki vei kini daotuli hai shokhai peie.)

²¹ “Israel maivei Ramai, Khoukhoulai Mapao Enou Rathoki hinou ae Jerusalem hi veo vei ki hinou buyu kinitao vanou paoyu sü keikhaio:

²² Sütao hai Babilon hi pota-a bailai, ae Enou avei tsüle peimo koute sütao hai Babilon hinou bua bailai. Süthaisü Enou poa dakhaive peilai ae buh hai hinou soushu dakhai peilai. Haisü Mapao Enou paowe.”