JEREMIAH 26 - SHEEYU BAIBEL (BSI)

Jeremiah ye Pove Chikuyu

¹ Judah hi veo Josiah nahpoutu Jehoiakim nou vekou louyu thaibü,

² Mapao nou ahi haibüa nou paoe, “Rathoki vei bomü hinou laloua Judah vei nuhdutao hinou hrüyu maitao nou ratholai tea velouyu mai hrülai hisü Enou ne hi paopeio tea kharochi peikhai touyu khesü maikhe hi paopeio. Chipao ali koute-a paoche moyu sü souso.

³ Hakinou puletao nou keiloua vah ashi souyu khesü baire toulouzü, puletao nou vah ashi souyu donou puletaoye souhawulai tea Enou tsüchoda khaitouyu sü soumoa khaipei bailai.”

⁴ Mapao nou ahi haibüa maikhe maitao hi paopeio tea paoe, “Mapao Enou neletaoye achi zülo ae avei chikhatao thaifüa talo tea paopeie,

⁵ alia Enou neletao hi tobai soumoa seive peiyu avei kilai, rachipaola maitao nou paoyu chi khesü keitou toulo tea paopeie. Ana neletao nou puletao vei chi sü zübare.

⁶ Hakinou neletao nou paochi zümoa bukoure toulouzü, Enou Rathoki hai nasü Shiloh hi soupeiyu büa soupeilai, ae deiphao mai hrülaiye panou nuhdu haina zhih sü chaa ali soua polai.”

⁷ Enou Rathoki hinou paoyu chi khesü napao maitao, rachipaola maitao, ae mai hrülai nou chouloure,

⁸ alia Mapao nou ahi paopeio tea kharochi peikhai touyu chitao sü paocheyu thai, puletao nou Eye nüloua haibüa shapaore, “Nenou chi paoyu thaifüa ne sü thailai!

⁹ Ne daisounou Mapao zhih hinou Rathoki hai nasü Shiloh büa bailai ae nuhdu hai nasü soushiwua mai hrümoa bailai tea paowe?” Süthaisü mai hrülai nou Eye sühao loure.

¹⁰ Judah hi süthai-apei maitao nou vepa-a buyu ko khesü chou louyu phaki, puletao nou thalasoua Rathoki hi tave puletao vei buh Rokhubomü Ashu hinou buloure.

¹¹ Süthaisü napao maitao ae rachipaola maitao nou peikho maitao alia maikhe maitao hisü paoe, “Mai hai nasü thai züe, daiolouzü puhnou nuhdu hainaye paoshiyu sü mai hrülai nou choure.”

¹² Süthaisü Enou paoe, “Neletao nou chouyu chipao veishi, Rathoki ae nuhdu haina vanou paoyu chitao sü Mapao nou ahi shapao peio tea kharochi peia baie.

¹³ Südonou chuo neletao nou ta-a buyu ludu ae soupfüa buyu vah khesü souzülo, ae neletao Ramai Mapao chi zülo. Neletao nou sübüa souloure toulouzü, puhnou neletaoye soushilai tea paopa peiyu khesü soumoa ledaloua bailai.

¹⁴ Ana Ewo louzü neletao vei bah hi bubaie. Neletao nou apei hisü kananou vei-e ae kao-e touyu nasü soulo.

¹⁵ Ana haisü sütou toulo: hakinou neletao nou Eye southa louzü, neletao ae nuhdu hai hi hrüyu maitao sü mah hayu maivei zhe soukouyu vei mah sü pfülai, daiolouzü Mapao nou haitao sü neletao hi paopi peio tea Eye seive baie.”

¹⁶ Süthaisü süthai-apei maitao ae maikhe maitao nou napao maitao ae rachipaola maitao hi paoe, “Mai haina hai Etao hi Eletao vei Ramai Mapao zhih hinou chi paowe; puhye southayu kaomoe.”

¹⁷ Süthai hai tsümai kamai-a nou tashu laloua vejüa buyu maitao hisü haibüa paoe,

¹⁸ “Judah hi veo Hezekiah teile hi Moresheth hinou rachipaolapu Mikah nou Khoukhoulai Mapao nou haibüa paowe tea paoe, ‘Zion hai dou büa tadao toulai, Jerusalem sü soushiwua panou houshi khaiyu buh soutawulai, ae Rathoki vei deichi sü vaohro vitawulai.’

¹⁹ Veo Hezekiah ae Judah hi maitao nou Mikah sü southa moa Hezekiah nou Mapao ye tsükhoua puhvei jüpa soure donou phouloure. Mapao nou puletao pei hi soushi peilai tea paopi peikhai touyu sü soupei moa leda loure. Chuo hashi ae veahoyu nasü lah Etao pei hi pove loulaire.”

²⁰ (Mai kukhe ali Mapao zhih hinou Jeremiah büa nuhdu haina ae tyahrü haina donou rachipaola peia bue, puh sü Kiriath Jearim puona Shemaiah nahpoutu Uriah toue.

²¹ Veo Jehoiakim alia puhvei reihmaitao ae peikho maitao nou Uriah vei chipao choulouyu phaki, veo nou puhye southare donou phouloure, ana Uriah nou süloua puhnou tuho Ejipt hinou tutsü loure.

²² Süthaisü Veo Jehoiakim nou Uriah panou saloure donou Akhbor nahpoutu Elnathan ae puhye koa mai daoli hai Ejipt hi seihoe.

²³ Puletao nou Ejipt hi ve Uriah ye sü nüloua Veo Jehoiakim hi save peire, ae puhye southawua puhvei thaiphao hai maisouye daovuyu buh hi laikhai peie.)

²⁴ Ana Shaphan nahpoutu Ahikam nou Eye soukha peiyu vanou, Eye panou southare donou maisou bah hi pei moe.