JEREMIAH 21 - SHEEYU BAIBEL (BSI)

Jerusalem nou Hraongu Ngaore Rai-a Paopeiyu

¹ Judah hi veo Zedekiah nou Malkiah nahpoutu Pashhur ae Maaseiah nahpoutu napao Zephamiah ye seive ahi haibüa nou paoe:

² “Etaoye donou Mapao hinou noupeio, daiolouzü Babilon hi Veo Nebukhadnezzar nou Etao pei hi reih hulou loure. Mapao nou Etaoye donou khupa vah ali soupeia Nebukhadnezzar vei reihmaitaoye panou thaikhai tapei-a sülou hoe.”

³ Süthaisü Jeremiah nou puletao hi paoe:

⁴ “Neletao nou Zedekiah hi haibüa paopeio, ‘Israel maivei Ramai Mapao nou haibüa paoe: Zhukhaio, neletao bouvo pe hi buyu Babilon hi veo ae puhvei reihmai taoye poa reih soure neletao bah hi buyu basei taosü Enou polaiwu-a puletaoye panou neletao vei nuhdu toutsü hi louloulai.

⁵ Enou neletao pei hi avei pfüchi, avei lekha ae rarou nou poa reih soulai.

⁶ Enou nuhdu hai hi hrüyu mai hrülaiye sü southawulai; maitao ae soukhaona hrülai noupu ngaopi shoyu rahta nou pa souhawulai.

⁷ Ana neletao, neletao vei peikho maitao alia soureih hinou, tokaayu hinou ae rahta rahvu hinou thai moa hrilouyu maitaoye sü panou Babilon hi Veo Nebukhadnezzar alia neletaoye ngaobayu maitao, neletaoye southalai tea phou-a buyu maitao bah hi thoupeiwulai. Puhnou neletaoye khoche nou daothalai, puhnou neletaoye zhuvea peilai moe, ae leshi peilai moe, moa puletao nou neletao maili-a shokhai peilai moe. Haisü Mapao Enou paowe.’ ”

⁸ Süthaisü Mapao nou maikhe mai hi haibüa paopeio tea ahi paoe, “Enou neletaoye panou doloure donou hriyu ludu ae thaiyu ludu khaipei khaitoue.

⁹ Nuhdu hi buyu maitao hai khoche, tokaayu, ae rahta hinou thailai, ana Babilon mai phi velouyu mai sü hriloulai, ae puletao vei hrüsü reipa loulai.

¹⁰ Enou nuhdu hai nasü vupa peilai moe, ana souhawulai. Hai nasü Babilon hi veo bah hi thaothou peilai, ae puhnou hai sü meinou deiwulai. Haisü Mapao Enou paowe.”

Judah hi Veo Kikhamai Peihi Chikuyu

^11-12 Judah hi veo vei kikhamai, David vei tyaosholea maitao hi chipao hai nasü paopeio tea Mapao nou ahi paoe, “Mapao Enou dai paowe touyu sü keinoulo. Kaozü vah nasü teithetsü nou soulo. Mainou pirabuyu maiye souchoro peiyu mai bah hinou vupapeio. Neletao nou sükua soupeimo louzü, neletao nou hashi souyu donou avei rarou lekha nasü mei büa taopalai, ae sünasü mai linoua sounghi loulai moe.

¹³ Jerusalem hinou hrüyu maitaore, neletao chuhdu ali nou dei jünou kua buyu büa deikho pei jünou kua nou buwe. Ana Enou neletaoye dulai. Mai linoua neletaoye dulou hoe, moa neletao vei kivo sü daphe dakho poa loulou hoe tea neletao paowe.

¹⁴ Ana Enou neletaoye neletao nou soupfü khaitouyu thaifüa tudee peilai. Enou neletao vei vebuh sü meidei peilai, ae süna pehao hi buyu veishi sü deihawulai. Haisü Mapao Enou paowe.”