JEREMIAH 2 - SHEEYU BAIBEL (BSI)

Ramai nou Israel maiye Kikoa Salai peiyu

¹ Mapao nou ahi paoe,

² Ne taho Jerusalem maitao hisü Mapao nou haibüa paowe tea paokhaio, “Nevei nahlea buki lesha, nenou aki veraiki vei leshi nahai nenou radeiki hinou ae shinamara thoumoyu buhtao hi nenou athaifü tayu Enou ngaimoe.

³ Oh Israel, ne sü avei baie; neletao hai avei sheeyu nasüe. Enou neletaoye souveayu maitao hisü veahoyu ae hakayu sü seive peie. Haisü Mapao Enou paowe.”

Israel Maitao vei Paipao Maivei Mah

⁴ Jakob vei tyaosholea alia Israel maitaore, Mapao vei chipao keilo.

⁵ Mapao nou haibüa paoe: “Neletao vei puopao maitao nou Ahi dai mah dukalaige? Puletao daivanou ahinou tarei tawe? Puletao hai komoyu bashara khesü tho tare ae lah puletaoye sü muh souhawure.

⁶ Puletao nou Eye lichopei moe, Enou puletaoye Ejipt hinou vupaloua mai nou hrümoyu ae tayu koute talaimoyu, sünghou pounghou tsümoyu, ngaopi shoyu ae hakalou veiyu veidu teitei hi-a Enou puletaoye sa tapeie.

⁷ Enou puletaoye tophayu buh hi savepeie, buh sühi thoudzü ae havei teitei sü puletaoye panou ve touso loure donou save thoupeie. Sütoukhaia puletao nou avei teideitao sü souzhaire ae soushiwure.

⁸ Napao maitao nou haibüa paolou moe, ‘Mapao sü daiki bue?’ Avei napao maitao nou Eye sümoe. Teidei khomaitao nou Eye hailoua baire; Rachipaola maitao nou Baal zhih hinou rachi paotare, ae halia viyu hayu basharatao sü thotare.

Mapao nou Puhvei Maitao Pei hi Chikuyu

⁹ “Südonou Mapao Enou neletao pei hi tsühlai, ae neletao vei tyaonah maitao pei hi-a tsühlai.

¹⁰ Teinghi loulo Saipras zaipeidei hi taho zhukhaio, ae teinghi palo Kedar teidei hi kamai-a seitakhaio. Haibüyu vah khesü buh likihia vepa khaimo hie.

¹¹ Maihrüh talinoua puletao rah hai chechemoyuma puletao vei rah datayu buwu? Ana avei maitao nou puletaoye souposhu veisho peiyu Ramai naye sü hazholia moyu basharaye pothou leawure.

¹² Südonou Enou ratei hisü ngaopi-a ngukhaio tea kharochi peie, haidonou khupa-a ngaopilo,

¹³ daiolouzü avei maitao nou mah ashi ahai souwure; puletao nou Eye sü thaowure, hriloure dzüla nasü malaiwure, ae puletao nou lah dzükhao sü heloure, süsü dzü tsüta-a bailaiyu dzükhao baie.

Israel Mainou Chili Cheche moyu vei Thou

¹⁴ “Israel mai hai mai vei qila moe; Puh hai qilamai sou-a na moe. Sükumo louzü daidonou puhye ngaobamaiye panou thaihuwe?

¹⁵ Puletao nou khaosouveo büa puletao pei hi shusou raloure; puletao nou puhvei teidei sü radeiki soupeiwure, ae puhvei nuhdu khesü soushiwure, sübüa panou mai lia hrümore.

¹⁶ Süpei hinou, Memphis ae Tahpanhes mainou ne pei hi vepeirü sü souphewure.

¹⁷ Neletaoye süthaisa-a ta peiyu neletao vei Ramai Mapao, Eye neletao nou thaoyu vanou veahoyu haitao sü lah neletao pei hi povelou baie.

¹⁸ Neletao nou Ejipt hi dakhailou Nail rei hinou dzü ke louyu vanou dai viyu ngaolouge? Asaria hi tave Euphratis rei hinou dzü ke louzü dai viyu ngaoloulai tea tsüchowe?

¹⁹ Neletao vei ashi nasü nou neletaoye tudee peia bailai, ae neletao nou ahinou thaikhai tayu vanou neletaoye züpeia bailai. Neletao nou neletao vei Ramai Mapao Eye thaowu-a ae Eye pi moyu hai kazhou koute shi-e ae vea sarou touyu sü süloulai. Haisü Khoukhoulai Ramai Mapao Enou paowe.”

Israel Mainou Mapao ye Thobayu

²⁰ Khoukobu Mapao nou paoe, “Oh Israel maitaore, neletao nou achi zübae ae Eye thobae. Deichi kuyu hinou ae süübe phi khonou neletao nou khakha-a tounah hrüloure vei rah sü thotare.

²¹ Enou neletaoye dopa louyu darkhabe sou-a thoutai aveih nou shothou peie. Ana neletao hai rekou vei darkha tyashi datare! Neletao hai tah-ratayu ae muh hayu darkhabe ali soutare.

²² Neletao hai veikayu sabon nou poa dzükhüyuma neletao hi ashi nasü khülailou hore.

²³ Ewo hashi nyamoe, Ewo Baal thaifüta moe tea neletao nou kabüa paolou khailai? Deikho hinou neletao nou mah souyu sü zhukhaio; neletao nou soupfüyu vah khesü zhukhaio. Neletao hai reshi sho-a laiyu racho ali büre,

²⁴ rekou nou hrüyu racho ali nou radeiki hinou tua laiyu kure. Pra phouyu rachokü aliye thaonou nulou laige? Puhye phouyu mainou tatei khaimoa lapa soua nou ngaolou süe.

²⁵ Ne phikha patamo koute moyuma ne raoqulu thekeimo koute rah kukheye thaihua laisu baio. Ana nenou haibüa paoe, ‘Moe, E thaikhailou shire, daiolouzü E vakoumai rahye leshi loure, ae chuwo thaikhailou shire, puhye thaifü ta-a bailai.’ ”

Israel Maiye Souvea peire Zü

²⁶ Mapao nou paoe, “Maivei vaomai aliye nülouyu phaki, haongu ngaoyu büa Israel maitao sü haongu ngaolai — puletao vei vemai ae vah adumaitao, napao maitao ae rachipaolayu maitao sü haongu ngaolai.

²⁷ Puletao nou süübe aliye nou ‘Apuo-e ae chuh aliye nou Apfüe’ tea paoyu mai hrülaiye sü hraongu ngaolai. Daiolouzü neletao nou ahi tavelou moa ahinou tarei tala tare. Ana neletao nou kaozhou ashi daoyu teile hisü Eye nou tave khailupa peio tea kholai.

²⁸ “Ana neletao nou lah soulouyu rah taosü daiki vetare? Neletao nou veahoyu phaki, puletao nou soulousüe toulouzü, puletaoye panou tashu loua neletaoye khailupa peio, daiolouzü Oh Judah, neletao vei nuhdu buyu jünou poua rah khesü bumowu?

²⁹ Neletao daidonou apei hi nolealeage? Daidonou neletao apei hi vamo-a Eye duwe?

³⁰ Hakonou E neletaoye tukha baire. Puletao nou achi zübare, zhaipou shishoyu khaosouveo ali büa neletao nou rachipaola maitao sü southare.

³¹ Oh Israel maitaore, Mapao vei chipao sü lenoua keilo. Israel maitao nghoujü nou Esü komoyu dei ali büa baidou? Mo-a zhitei touyu teidei ali bübaivu? Süku molouzü daidonou avei maitao nou Eye lia lahdo soua bailai, ae ahi dakhai vepulai moe tea paowe?

³² Loumainah alinou puhvei sabanü moa pfüa nghire puhvei zhusana khesü ngailou veiwu? Ana avei maitao nou Eye teile taoli hai ngaiwu baire.

³³ Neletao nou kabüa neletao vei jüpa maiye thaihulai touyu sü neletao nou süwe. Sübüa ashi shilai naotumai ali koute nou-a neletao zhai ngaoloua puletao tsülou lousüe.

³⁴ Neletao vei sabanü vasü mai ashi maivei zhe moa mai aveih mai ae touha soha mai zhe nou dana khai toure. “Ana haibüa buyuma,

³⁵ neletao nou haibüa paoe, ‘Ehwo halia soumah moe; Mapao nou Etao pei hi lekha rarou more.’ Ana Mapao Enou neletaoye sü haibüa paoyu donou neletao pei hi chi kulai.

³⁶ Neletao daidonou le hobü haibüge? Asaria mai nou neletaoye haongu soupeiyu büa Ejipt mainou neletaoye sü haongu soupeilai.

³⁷ Sükisü neletao nou haoleyu donou bahnou pei holou-a Ejipt mai hinou talai, daiolouzü neletao nou louche-a bumai sü Mapao Enou thaowure, ae puletao hinou neletao sü halia viyu ngaoloulai moe.”