JEREMIAH 19 - SHEEYU BAIBEL (BSI)

Pepotayu Dzübvü

¹ Mapao nou Eye taho nai leekhou ali hülo tea nou paoe. Puhnou Eye tsümai alia napaomai alia tsümai taoli salo,

² alia Leekhaope Robomü hinou tapaloua Hinnom vei Deikho hi takoulo, ae Enou ne hi paopeiyu chipaotao sü shangaopeio tea paoe.

³ Mapao nou ahi haibüa paopeio tea paoe, “Judah hi vemaitao ae Jerusalem hi maitaore, Israel maivei Ramai Mapao vei chipao keilo. Zhukhaio, Enou buh hai hisü hashi pfüve peilai ae ko haina choulouyu mai hrülai vei noubi sü tholai.

⁴ Enou haibüa soupeilai, daiolouzü maikhe mainou Eye thaowure, ae puletao nou moa puletao puopao nou, moa Judah hi vemaitao nou sümoyu rah kukhe hi posheela peia buh hai nasü souzhai peiwure. Puletao nou teidei hai hi mah hayu mai zhe soukou peire,

⁵ ae puletao nou Baal rahye posheelabu souloua puletao vei nahmaitaoye poshu meideia thoe. Süsü Enou puletao hi soulo tea kharochi peikhai moe; moyuma süsü Enou tsüa chomoe.

⁶ Südonou zhukhaio, teidei hai nasü Tophath, moa Hinnom Deikho tea kupulai moe, hai nasü Maiye Southayu Deikho tea kuyu teile velaire.

⁷ Buh hai hi Enou Judah alia Jerusalem maitao nou tsücho dayu veishi sü panou vetelai moe. Enou puletaoye sü ngaobamaitao panou veiloulai ae soureih hinou southa khaitou peilai. Puletao vei thaiphaosü Enou tei hi raohou alia dei hi soukhaonatao vei touso panou soulai.

⁸ Enou nuhdu hai nasü ngaopiyu ae ngaorayu hai pove peilai; teidei hai hi tacho poa tayu maikhe mainou vepayu vah khesü ngaoloua khupa soulai.

⁹ Ngaobamai nou nuhdu hai nasü sühao loulai ae sühinou hrüa buyu maitaoye sü southare donou telai. Ngaobamai nou nuhdu sü soutaosoua dalouyu donou vakou palou shia nuhdu khevai buyu maitao hai alinou ali vei sou toulai, lahvei nahmai koute-a datha toulai.”

¹⁰ Süthaisü Mapao nou Eye koa satayu maitao nghoujü hinou nailee nasü daphe ngaokhaio tea ahi paoe,

¹¹ alia puletao hi Khoukhoulai Mapao nou haibüa paowe tea paopeio, “Enou mai haitao ae nuhdu hainasü nailee ali soupheyu thai pothou soumulou hoyu büa soupeilai. Maikhe mainou puletao thaiphao khesü Topheth koute hia daovulai, daiolouzü buh sü hi daovuyu buh hai bulai moe.

¹² Enou nuhdu haina ae haihi hrüyu maitaoye Topheth hi hrüyu maitao büa soupeilai.

¹³ Jerusalem vei kikha maitao, Judah hi vemaitao vei kikha maitao, ae puletao vei kipei hi poukai nüvei ae zhaoh nghoua teivutao hi alia rah kukhetao hi meideia posheela peiyu mai hrülai sü Topheth büa sheelai moe.”

¹⁴ Süthaisü Mapao nou Eye puhvei chipao paopeio tea letayu Topheth hinou dakhai veloua maisou nou vejüa buyu Rathoki hinou laloua mai hrülai hi

¹⁵ Israel maivei Ramai Mapao nou ahi paopeio tea paoyu nasü paoe, “Zhukhaio, hashi velai tea Enou paopayu taosü nuhdu hai hi ae pehao hi buyu nuhtao hisü seive peilai, daiolouzü neletao nou rochih sholoure ae Enou paoyu sü zübare.”