JEREMIAH 15 - SHEEYU BAIBEL (BSI)

Judah hi Maitao Hakatare

¹ Süthaisü Mapao nou ahi paoe, “Moses ae Samuel nou mai haitao donou laloua ahinou zhuvea peio tea khoyuma, Enou mai haitaoye zhuvea peilai moe. Puletaoye panou anghingao hinou tavai talouo.

² Puletao nou ne hinou ‘Etao daiki talai’ tea noulouzü, puletao hi Enou paopeiwure tea paopeio: Rata ravu hinou kamai-a thailai— buh sühi puletao nou talai! Mai taoli hai soureih hinou thailai— buh sühi puletao nou talai! Kamai nou tokaa veyu hinou thailai— buh sühisü puletao nou talai! Kukhe maitaoye sü hukhamai soua vakou nüpoa talai— buh sühisü puletao nou talai!

³ Mapao Enou puletao pei hi ngaopi shoyu tya adai pove peilai tea lelawure: soureih souyu hinou puletaoye southa peilai; sei panou puletao vei thaiphao sü daopoa nou talai; teihi raohou panou daotoulai, ae shokou sü rekhaonatao panou toulai.

⁴ Veo Hezekiah nahpoutu Manasseh nou Judah hi veo soua buyu teile hi Jerusalem hinou soukhai touyu vahtao donou Enou puletaoye deiphao mai hrülaiye panou puletaoye ngaoloua ngaopi shoyu soupeilai.”

⁵ Mapao nou paoe, “Jerusalem hi maitaore, thaonou neletaoye zhuvea peilai, ae thaonou neletaoye donou dopfü peilaige? Thaonou chaolou-a neletao kabüa bue tea nou peilai?

⁶ Neletao nou Eye thaowure; neletao nou ahinou thaitsüpoa tare. Südonou Enou abah thaipa neletaoye soushire, daiolouzü avei lekha rarou nasü healou hore.

⁷ Enou puletao mai hrülaiye nuhdu robomü hinou thouba thaolaiyu büa thaolaiwulai. Enou neletao, avei maitaoye souhare, neletao vei nahmaitaoye southawure, daiolouzü neletao nou vah ashi souyu sü thao moe.

⁸ Neletao vei teidei hi mimea maipfütao hai rei hi venai jünou pouloure. Neletao vei nahle maitao sü Enou southa peiwu-a puletao vei pfümaitao panou veahoyu sü ngao-a nou bue. Licho khaimo buyu teile hinou Enou puletao pei hi pihiyu sü pove peie.

⁹ Nahpoutu anai buyu pfüsü sütao hatayu donou shahlou-a thaitare. Hea teiva hinou puhvei teinghi sü loutare; puh sü hrao ngaore ae leveare. Enou neletao vei ngaoba maitaoye panou hria buyu maitaoye sü southalai. Haisü Mapao Enou paowe.”

Jeremiah nou Mapao hi Aetou moyu

¹⁰ E hai daizhou koute leveayu mai ali soubairesa! Daisounou apfü hai Eye deiphao hi navepei sarou! Teidei hai hi hrüa buyu mai hrülaiye süve tere. Enou mai ali hinoua poupao soulou moe, moa mai-a ahinou poupao soumoe, anou mai hrülai nou Eye chaapeie.

¹¹ Oh Mapaowo, ngaoba maitao nou tateia veayu phaki, Enou puletao thaosou soukha khokha molouzü ae Enou puletaoye panou veiloure donou paokhai timolouzü, puletao nou chaa peiyu khesü panou apei hi vetheo.

¹² (Mai linoua hu sü rashalou hoe, teidei reikou nou baosahu koa souyu hu sü sousha louhoe.)

¹³ Mapao nou ahi paoe, “Teidei teitei hi neletao nou mahmo souyu donou neletaoye tudeeyu phasoua Enou ngaoba maitaoye seive neletao vei kini ae thoudzü buyu veishi sü pa potawulai.

¹⁴ Avei lekha rarou hai mei büa teisa tao-a buyu donou, Enou neletaoye neletao nou sümoyu ngaoba maitao teidei hinou puletao vei kuvah panou soulai.”

¹⁵ Süthaisü Enou paoe, “Oh Mapao, nenou sükhai tiwe. Eye lichopeio ae Eye soukha peio. Eye souveayu maitao pei hi athaosou-a khüngu phoupeio. Puletao pei hi nenou shamea buyu thaio puletao nou Eye southa laire. E neye donou maichi mairao toua baie touyu sü lichopeio.

¹⁶ Nenou paoyu chipaotao sü Enou soutaosoua keinou peie. Khoukobu Ramai Mapaowo, Esü nevei baie, ae südonou nevei chipao khesü Eye donou vasayu nasüe.

¹⁷ Enou paralea soumai hrohi bumoe, ae Enou sava-a bumoe. Nevei kharochi sü züa E lah likhei bubaie, ae lekha rarou sünou ale hi phoua nou bubaie.

¹⁸ Daidonou avei veayu sü khaita moe? Daisouyu donou avei zhimü sü souveilou hoge? Daisounou puletaoye souvei peimowe? Rei hai kakua dzü kümoyu büa nenou ahi soupeilaiwu?”

¹⁹ Mapao nou haibüa ahi chila peie, “Nenou ahi dakhaive louzü, Enou neye podakhai loulai, ae neye panou avei kilai soupu peilai. Nenou chaochao soua chi paomoa muh teiyu chipao paolouzü, neye panou avei rachipaolayu nasü soupu peilai. Maikhe mainou ne hi dakhai velai, ae nenou puletao hi velai moe.

²⁰ Enou neye maikhemai nghoujü hinou baosahu nou soukhai touyu kivo ali büpeilai. Puletao nou neye dulai, ana puletao nou ne jünou veiloulai moe. Enou neye koa bupeilai ae neye vupeilai alia kaozhou ashi panou daolai moe.

²¹ Enou neye maishiyu ae zhaipou shiyu maitao bah hinou vupa peilai. Haisü Mapao Enou paowe.”