JEREMIAH 14 - SHEEYU BAIBEL (BSI)

Ngaopiyu Teiko

¹ Tei kore donou Mapao nou ahi haibüa paoe,

² “Judah sü dopfüa nou bure, ae puhvei nuhdutao sü thai tare, sühi maikhe maisü levea nou deiphi hi kaokou loure, alia Jerusalem nou kra nou soukha khoe.

³ Toungiyu maitao nou puletao vei kilaimaiye panou dzü pfütae; puletao nou dzükhao hisü taho-e, ana dzü ngaolou more; puletao vei leekhou sü sakhai-a nou pfüa dakhai vere. Puletao sü hraoloua cho hare, sübüa puletao pah sü holoure.

⁴ Teirü peimoyu donou dei sü kitare, tatayu mainou tsü vealoure ae puletao pei sü doloure.

⁵ Rekou shukü nou puhvei toutuye thaowure, daiolouzü poudai khesü hare.

⁶ Rekou nou buyu rheisüh khenou sakhai-a buyu deichi peinou lakhao khenou teikhai ssühai-a buyu büa la-a nou bure; poudai hayu donou puletao vei ngheithou sü hangaomo tare.

⁷ Avei maitao nou ahi haibüa kra-a paoe, ‘Etao vei mahtao nou eh pei hi zhopao sou-a buyuma, Oh Mapaowo, nenou apaokhai touyu büa Etaoye soukha peio. Etao nou neye thaowua vu taoli tare, Ehnou mah sü souwure.

⁸ Israel maivei areih nasü ne likhei baie; veahoyu teile hi Etaoye khailupa peiyu sü ne baie. Ne daidosou-a teidei hai hinou shejü shetumai ali büa buwe, veihao souyu mai linou khei ali ve chaoyu büa baiwu?

⁹ Ne daisounou cho hazhiyu mai ali bülai, soureihmai linou soukha peiloure khouko hayu büa buge? Oh Mapaowo, nenou Etao hrohi koa bupeie! Etao hai nevei mai baie; Etaoye thaowua tapeiso.’ ”

¹⁰ Mapao nou haikhe mai vanou haibüa paoe, “Puletao hai ahinou tutayu jüpae, puletao nou lahye tukha loulai moe. Südonou Enou puletaoye jüpa moe. Puletao nou soumah khaitouyu khesü Enou licholai ae puletao vei mahmo thaifüa Enou puletaoye tudee-a souvea peilai.”

¹¹ Mapao nou ahi paoe, “Mai haitaoye soukha peio tea ahi khosouo.

¹² Puletao nou tovai rei-a lüa ahinou soukha peio tea veachi paoyuma, Enou kei peilai moe, ae puletao nou poukai nüvei meidei-a Eye posheela pei-a buyuma Enou popeilai moe. Ana Enou puletao hi khoche, tokaayu ae sounou ashi sünou seive souhalai.”

¹³ Süthaisü Enou paoe, “Oh Ramai Mapaowo, nenou süwe, süolouzü nenou paopeiyu thaifüa rachipaola maitao nou maikhe mai hi soureih velai moe, moa tokaayu ngaolai moe, Etao vei teidei hisü kaonayu bu bailai tea paopei khaitoue.”

¹⁴ Ana Mapao nou chila peie, “Rachipaolayu maitao nou azhih hinou mada-a paoa baie. Enou puletaoye seita moe, moyuma Enou puletaoye taho rachi paopeio tea kharochi peimoe. Puletao nou zho ngaoyu hai ahinou ve moe; puletao nou vepare chi paoyu hai dahrührüa puletao vei tsü hinou paopayu chipao baie.

¹⁵ Südonou Mapao Enou seita moyuma azhih hinou teidei hai hisü soureih ae tokaayu velai moe tea paoyu rachipaolayu maitao hisü Enou daisoulai touyu ne hi paopeilai — Enou puletaoye sü soureih souyu hinou ae tokaayu hinou southalai.

¹⁶ Alia puletao nou rachipaolayu kei-a buyu maitaoye sü southaloua puletao vei thaiphao sü Jerusalem vei maisou ludu hi khilaikhai peilai, daiolouzü puletao vei thaiphao daovu peire hai mai bulai moe. Haibüyu sü puletao mai hrülai hisü velai — chapfü maitao, ae nahpoutu naotu maitao hrülai hi velai. Daiolouzü Enou puletao pei hi puletao nou ngaozüyu hashi nasü paoh khapeilai.”

¹⁷ Enou leveayu nasü maikhe mai hi paopeio tea Mapao nou ahi haibüa paoe: “Hea khei sümoa anghi sü panou nghidzü koupeio, Eye panou krayu sü chaoso, daiolouzü avei maitaoye sü shisho-a zhiloure, ae puletao vei zhimü sü dusho loure.

¹⁸ Enou dou hi hoyu phaki, soureih hinou thaiyu thaiphao khesü ngaoe; Enou nuhdu hi talouyu kisü, tokaayu vanou khüthayu mai sü ngaode. Rachipaola maitao ae napao maitao nou puletao vei vah sou-a bue, ana puletao nou dai souwe touyu sü puletao nou sümore.”

Maikhe Mainou Mapao hinou Akho Souyu

¹⁹ Mapaowo, nenou Judahye thaovuzü chechevu? Nenou Zion hi maitaoye sü ngaora sholourevu? Ne daisounou Etaoye souveilou hoyu hi koute soushi sholoua khaipeige? Etao nou kaonayu sü zhipoa nou bue, ana havei liro ngaomoe; souvei peiyu sü vuzhi-a nou bue, ana ngaopiyu sünou phouloure.

²⁰ Oh Mapaowo, Etao nou ne pei hi mah souwure; Etao nou soupfüyu mahtao ae Etao puopao nou mah soukhai touyu khesü mahla pawe.

²¹ Nenou apaopei khaitouyu khesü licho peio ae Etaoye ngaora peisou baio; Nevei kathe aveih vebuh khaitouyu Jerusalem hisü haongu pove peiso. Nenou Etaoye koa vo soukhai touyu nasü souphe peiso, sünasü licho peio.

²² Tyahrü kukhe maivei bashara linoua teirü sü seive peilou hoe; ratei lah nou teirü sü seikou peilou hoe. Etao Ramai Mapaowo, Etao vei areih nasü ne likhei baie, daiolouzü nenou hai teitei sü soupei baie.