JEREMIAH 10 - SHEEYU BAIBEL (BSI)

Bashara Thoyu ae Acheche Ramai ye Thoyu

¹ Oh Israel maitaore, Mapao nou neletao hi paoyu chipaotao sü keilo.

² Mapao nou haibüa paoe, “Tyahrü kukhe mai nou hrüa tayu zhai sü douso; moa rakiva nou shee tyatyali ngaoyu donou tsü veaso, tyahrü kukhe mainou ngaopi-a buyuma piso.

³ Puletao vei rahrüzhai hai hako baie. Vaohro hinou süübe ali vilou-a shara souyu mainou zhurai daolou-a baie,

⁴ ae süna phaova sü shahu ae sana nou zhainga southou khaitoua baie. Hai nasü panou kaodu tamore donou hushu nou veakha khaitoua baie.

⁵ Puletao nou daokhai touyu basharatao hai Mainou dou hi lupo khikhai touyu büa baie; sütao nou chi paolou hoe sütao hai mainou kaopoa talai. Sütaoye sü ngaopiso: sütao nou neletaoye soushilou hoe, moa havei liro soupeilou hoe.”

⁶ Oh Mapaowo, neye raiyu halia hae; Ne hai due, Ne zhih hai due alia khouko bue.

⁷ Tyahrü hrülai vei veo, neye sü thaonou tsükhou molaige? Tsükhouyu nasü nenou ngaozüe. Tyahrü hrülai hrohinou tsüveiyu maitao moa vemaitao hrohinou ne büyu mailia hae.

⁸ Puletao hrülai nou tsü hae ae vomai baie; süü nou daokhai touyu basharatao hinou daio douloulai?

⁹ Puletao vei bashara khesü Spain vei shahu nou ae Uphaz vei sana nou dale khaitoue, sütao hai maomeyu ae papayu sabanü nou banou peikhaitoue, süsü shara souvei shoyu mainou soupei khaitoua baie.

¹⁰ Ana Mapao louzü checheyu Ramaie; Puh sü hriyu Ramaie ae teisa vei veo nasüe. Nenou lekha payu phaki deiphao hai nüsü vewe; ae nenou rarouyu kisü deiphao mainou lalou hoe.

¹¹ (Raki ae deiphao soupei moyu rahtao sü souha-a bailai tea maikhe mai hi paopeio. Puletaoye panou deiphao hi bupulai moe.)

Ramai ye Soushoyu Lou

¹² Mapao nou puhvei khouko sünou teidei hai soupeie; Puhvei ratsü sünou deiphao hai soupeie, ae rakitao sü paito papeie.

¹³ Puhvei kharochi vanou ratei hisü dzü panou ra-e; Puhnou teihao taosü deiphao akhai hinou pove peie. Puhnou teireiyu nasü teirü hinou soupa peie, ae teikhai sü puhvei ki hinou pa seive peie.

¹⁴ Haitao hai ngaolouyu phaki, mai hrülai sü tsü hare ae halia sümore; bashara souyu mai hrülaiye sü souhrao peiwure, daiolouzü puletao nou soukhai touyu rahtao sü cheche moe ae hrirai hae.

¹⁵ Sütaosü muh lia hae, ae nünüyu vah baie; Mapao nou veyu phaki sütaoye sü souha bailai.

¹⁶ Jakob vei Ramaiwo sübü moe; puhnou ha teitei sü soupeie, ae puhvei mai soure donou Israel maiye puhnou dopaloue. Khoukhoulai Mapao touyu sü puh vei zhih-e.

Vakou Nüpoa Tayu Maitao Dakhai Vere

¹⁷ He Jerusalem hi maitaore, neletaoye mainou nüpoa talaire! Neletao vei natao sü tulourao.

¹⁸ Daiolouzü Mapao nou neletaoye teidei hai hinou polai laire; puhnou neletao mai aliro shokhai peimoa souhakhai toulaie. Haisü Mapao Enou paowe.

¹⁹ Jerusalem hi maitao nou haibüa kra-a paoe, “Etaoye sü zhishi showure! Etao vei zhimü sü veilou hore. Etao nou haisü healou süe tea tsüchoe.

²⁰ Etao sahpao khesü souhawure; phupakhai touyu rai taosü detare. Etao vei nahmaitao sü takhai toure; Etao vei sahpao soulapu peire mai sü hare; haosahtao sü popa haopu peire mai lia hare.”

²¹ Enou chila peie, “Etao vei süthai-apei maitao hai tsü veimore; puletao nou Mapao vei leli soulou more. Südonou puletao sü kaodu tare, ae Etao vei maitao sü raroupo tare.

²² Keikhaio! Haibüyu ko sü velaire! Reikou teidei hinou pai büshoyu velai; süna vei reihmaitao nou Judah nuhdu khesü soushiwulai ae panou lakhao hrüyu buh souta bailai.”

²³ Oh Mapaowo, Enou süwe, süolouzü mai ali vei hrü sü lah puh bah hi hae; mai linoua lah puhvei hrü sü haibüa talai touyu hai paolou hoe.

²⁴ Oh Mapaowo, nevei maitaoye sü souzü peikhaio; ana Etaoye souvea shopeiso, moa nevei lekha hinou Etaoye tudei peiso; sükumo louzü Etao hai hakata-a bailai.

²⁵ Nevei lekha rarou nasü neye tho moyu tyahrütao pei hi vepeio ae ne chi zübayu nevei maitao pei hi peio. Daiolouzü puletao nou nevei maitaoye southawure; ae Etao vei teidei sü souhakhai toupeiwure.