JEMS 5 - SHEEYU BAIBEL (BSI)

Hani Maiye Tukhayu

¹ Alia chuwo, haniyu maitao, Achi keipeikhaio! Neletao pei hi velaiyu veahoyu sütao vanou krakhaio ea koulih likhaio!

² Neletao vei kini sü tah-ra tare, alia neletao sabanüh sü khunou touloure.

³ Neletao vei sana ea hushasü huba taoloure, huba hainanou neletao pei hi motouyu vei zhopaoh souwe ea meibüa neletao vasousü toulai. Neletao nou chu akhai teithetao donou kini podzü khaitoue.

⁴ Zhukhaio, neletao nou neletao douhi vah souyu maitao hi vahzho lia peikhaimoe. Puletao nou motoua raoyu paisü keikhaio! Neletao vei chachiyu maitao nou raoyu pai sünasü reihmaitao vei Mapao, Ramai puh nou hi kheloure.

⁵ Deiphao haina hi neletao vei hrümaisü savayu nou phoupei loure. Neletao hai dathea laiyu teithe süna donou lah neletaoye southou hüveisho loure.

⁶ Neletao nou cheche maitaoye mah dukhaire ea southeare, alia puletao nou neletaoye numoe.

Shameayu ea Veachi Paoyu

⁷ Südonou, thaihou jürai khemai, Mapao vemo koutesü shamealo. Zhukhaio, tatamai alinou dei vei muhteiyu rashithou sü zhia, sünanou teirü araina ea teirü nana ngaomo sasü shamea-a kho-a bue.

⁸ Neletao-a shamea vuzülai. Alia neletao lesü soutsülo, daiolouzü Mapao vere teithe sü ngheire.

⁹ Athaihou jürai khemai, Ramai nou neletaoye chiku more donou neletao alinou li pei hi nolealeaso; zhukhaio, chiku-apeio sü kikhu hinou la-a bure.

¹⁰ Athaihou jürai maitao, Mapaowo zhih hinou chi paopei-a buyu rachipaola maitaoye sü lichokhaio. Puletaoye sü veahoyu hinou shamea louyu zhai alisoua polo.

¹¹ Zhukhaio, puletao nou phasho shamea louyu vanou Eletao nou puletaoye vayumai tea kuwe. Neletao nou Job vei phasho shamea louyu vanou chouloure, alia akhai kisü kabüa Mapaowo nou puhye donou peisa touyu sü neletao nou süwe. Daiolouzü Mapaowo louzü zhuvea ea khu-leshinou phoua bue.

¹² Ana ha teitei jünou, Athaihou jürai khemai, raki, deiphao moa cha-chou kukheli ku-a chouwuso. Ana neletao hai Ramai nou mah paodukayu hi loulou more donou, neletao nou ae touyu hisü ae toulo, alia mo touyu hisü mo toulo.

Lü vei Veachi

¹³ Neletao hrohinou kamaisü rakoshi dao-a buwu? Puhye panou veachipao vuzükhaio. Maitalinou lesa-a buwu? Puhye panou paoshoyu lou soukhaio.

¹⁴ Neletao hrohinou kamaisü lishi-a buwu? Puhye panou lüloumaime vei tsümaitaoye kukhaio, alia puletaoye panou Mapaowo zhih hinou puh vahi theadzü noupei-a puh pei hi veachi paopeiyu sü soukhaio.

¹⁵ Alia lü vei veachi sünanou sounoumai sünaye khailu loulai, alia Mapaowo nou puhye sü polashu peilai. Alia puhnou mahwu louzü, puhye sü khaipeilai.

¹⁶ Südonou neletao sounou sü veiloure donou neletao vei mahsü alinou lihi paopa ngao-a alinou li donou veachi paopeikhaio. Chechemai ali vei veachi hai vah soulouvei khouko alaosou bue.

¹⁷ Elijah hai Eletao zhai bütouyu mai alie. Puhnou tei rülou more le noushoa veachi paoe, alia po asü-a khou arou hai deiphi hi tei rükou khaimoe.

¹⁸ Puhnou veachi paodakhaie, alia rateinou teirü panou rükou loure ea deiphao nou sünavei rashithou sü shiloure.

¹⁹ Athaihou jürai khemai, neletao hrohinou maitalinou acheche hinou tala talouzü ea kukhe linou puhye sü sadakhai velouzü,

²⁰ haisü puhye panou liloukhaio: Maitalinou mahmai aliye puhvei kao-zü moyu du hinou sadakhai vepei louzü puhnou mahmai sünavei rakosü athai hinou khailu peiloulai ea mah alaosou hongi peiwulai.