JEMS 4 - SHEEYU BAIBEL (BSI)

Deiphaoye koa Samai Souyu

¹ Neletao hrohi züva-davayu teitei hai daikinou vewe? Sütaosü neletao lekhe hinou thaokhaimoa reih züa buyu neletao nou pfüphao hilo vayu züpayu sühinou vewe.

² Neletao nou hatali züpawe, ana sütaosü neletao nou ngaolou hoe, südonou neletao nou maiye southeawure donou souda-a bue; neletao nou hatali züpashoa bue, ana neletao nou züpayu sü ngaolou hore, südonou neletaosü züva-davawe. Neletao nou züpayu sü neletao nou ngaolou moe daiolouzü süna donou neletao nou Ramai hinou khomoe.

³ Alia neletao nou khoyu kisü, süsü neletao nou ngaolou moe, daiolouzü neletao vei leli taosü veimoe; neletao nou lah neletao valoure hi seiloure na sütao donou khobaiwe.

⁴ Cheche moyu maikhe maitao! Deiphaoye samai souyu hai Ramaiye ngaobayuna baie touyu sü neletao nou sümowu? Deiphaoye samai sounüyu maitalisü puh lahnou Ramai vei ngaobamai soulouwe.

⁵ Sheeyu larübvü hinou, “Ramai nou Eletao lekhehi pothou khaipeiyu rako nasü chihshoyu züpatao nou phoupei-a bue,” tea paokhai touyu hisü checheyu hae tea chopeiwuso.

⁶ Ana Ramai nou peiyu zhuvea sünanou koulihsoua khoupuhie. Haisü sheeyu larübvü hinou paoyu büe, “Khaophu souyu puhye sü Ramai nou nuwe, ana nataiyu puh hisü puhnou puh zhuvea nasü peiwe.”

⁷ Südonou Ramai khakhe hinou hrülo. Rashinaye nulo, alia puhnou neletao hinou tuta bailai.

⁸ Ramai hi tave ngheilo, alia puhnou neletao hi tave ngheipeilai. Neletao bahsü teilo, oh mahmaitao! Neletao lesü sousheelo, oh aveikho soumaitao!

⁹ Le vealo, paikua shalo alia kralo; neletao vei nüyu hai krayu hi soudalo, neletao vei lesayu sü leveayu hi soudalo!

¹⁰ Neletao lahnou Mapaowo nghojü hinou natai-a bulo, alia puhnou neletaoye pokupa peilai.

Khristamai Thaihou-jürai Aliye Chiku more Tukha peiyu

¹¹ Athaihou jürai khemai, alinou li pei hi chishi paowuso. Thaihou jürai chi paoshiyu moa thaihou jüraiye chikuyu maitalinou razhaiye paoshiwe ea sünaye chikuwe. Ana nenou razhaiye chiku louzü, ne sü razhai chi züyumai more, ana sünaye chiku-apeio nasüe.

¹² Ramai likheinou razhai-apeio ea chiku-apeio nasüe. Puh likheinou khailu peilou süe ea souha lousüe. Ana nevei kinapaye chikuyu newo thaoh-e?

Khaophu Souyu vanou Tukhayu

¹³ Haibüa, “Zhou molouzü doso Eletao nou nuhdu alihi veiholoua sühinou ho po ali nai-a bulai ea huh-ha souloua pousha alao ngaoloulai,” tea paoyu neletao chuo keikhaio.

¹⁴ Neletao hrümai hi doso dai palaisa touyu koute-a neletao nou sümoe! Neletao hai katou buloua hata baiyu haongu bübaie.

¹⁵ Neletao nou paore louzü haibaie: “Mapao nou züpa louzü, Eletao hai hri-a bulai ea haina-a hona-a soulai.”

¹⁶ Ana chu hihai neletaowo khaophu souwe ea baotaitaiwe. Haibüyu khaophu souyu teitei hai ashi baie.

¹⁷ Südonou maitalinou avei soure sü süloua süsü soumo louzü, puhye donou süsü mah-e.