JEMS 2 - SHEEYU BAIBEL (BSI)

Zhai Soukuyu vanou Tukhayu

¹ Athaihou jürai khemai, khouko ava vei Mapao, Eletao Mapao Jisu Khrista vei lüloumaitao soua, neletao nou maikhe maiye puletao vei vakou vei zhu süna thaifüa zhai soukuwuso.

² Daiolouzü hani mai linou sana bahtoukha noua ea sahnü aveinou tupfüa neletao vei meimehi velou louzü, alia toure hamaili-a sabanüh shikaokao-a velou louzü,

³ alia neletao nou sabanüh aveinou bahnoupoa laiyu puhye tsükhouloua puh hi, “Buh veikayu hainahi kou buwo” tea paolouzü, ana toure hayu puh hi, “Sühinou la-a buwo, moa deiphihi Aphi thyahinou kou buwo” tea paolouzü,

⁴ nelenou lah neletao hronou zhai soukure mowu, alia tsü ashinou koa chikuyumai soure mowu?

⁵ Leshiyu Athaihou jürai khemaitao keikhaio! Ramai nou deiphao hai navei toure hamaiye lü hinou panou hani loure donou ea puhye leshiyu maitao hi apaopei khaitouyu vedei vei kaalo nasü peire donou doloure.

⁶ Ana neletao nou toure hamaiye tsükhou peimoe! Neletaoye souveayu ea chiku-apeimai nghojühi süthai saveyu sü thaoh mainoue? Hani mainoue!

⁷ Neletao hi peikhai touyu zhih avei naye paoshi-paokhayu sü puletaoe.

⁸ Neletao nou sheeyu larübvü hinou ngaolouyu, “Lah nenou neye leshiyu büa nevei kinapaye leshilo,” touyu vedei vei razhai nasü züloure toulouzü neletao nou vei-a souloure.

⁹ Ana neletao nou maiye zhai soukulouzü, neletao sü mah soure, alia razhainou neletaoye razhai soukhomai tea mah dukhaire.

¹⁰ Daiolouzü maitalinou razhai teiteisü reiloukhaia, ali hinou mahwu louzü sütao teiteisü soukhowure.

¹¹ Daiolouzü, “Khulou vah souso,” tea paoyu puhnou, “Maiye southeaso” touyu-a paoe. Nenou khulou vah soumokhaia, nenou maiye southeawu louzü ne sü razhai soukhoyu mai alire.

¹² Südonou do souyu vei razhai khehinou chiku laiyu mai sütao büa chi paolo ea vah soulo.

¹³ Daiolouzü maiye zhuvea peimoyu puhye Ramai nou chikuyu kisü zhuvea peilai moe; ana zhuvea sünanou chikuyu sünaye kolouwe.

Lü ea Vahtao

¹⁴ Athaihou jürai khemai, maitalinou puhvei lü bue tea paokhaia vah halouzü süsü dai koyu bue? Puh lü nanou puhye khailu peilou süwu?

¹⁵ Hakinou thaihou jüraimaili moa tumaili baitoua bulouzü ea touso chemoa bulouzü,

¹⁶ neletao hronou kamainou puletao hi, “Kaona-a tawo, lebolo ea pou phoulo!” tea paowu-a puletao vei pfüphaonou moshilaiyu halia peimoa bulouzü, sünanou dai koyu bue?

¹⁷ Südonou, lü nasü vah loumoa puh lah bailouzü athai baie.

¹⁸ Ana kamainou, “Nevei lü bue ea Avei vah bue,” tea paolai. Avei chilawo louzü, “Nevei lü nasü vah loumoa Ahi ngaopeio, alia E-a Avahnou Avei lü nasü pongaolai.”

¹⁹ Nenou Ramai alikhei bubaie tea louchewu? Veishore! Süsü rashitao koutenou-a louchewe alia pi-a nguwe.

²⁰ Avowo! Vah loumoyu lü nasü hakobaie touyu sü nehi pongao peiyu nenou züpawu?

²¹ Eletao puopao Abraham nou kabüa Ramaiye koa souzüloue? Süsü puhnou puhnah Poutu Isakye sheelabuh hinou posheelayu ki hinou, puh vah vanou souzüloue.

²² Ne ngaomowu? Puh lü ea puh vahsü koa vah souwe; puh lü naye sü puh vahnou southou liche peiwure.

²³ Alia haibüa, “Abraham nou Ramaiye louche, alia puh lü vanou Ramai nou puhye achechemai alie tea poloure,” touyu sheeyu larübvü chi nasü vete loure. Alia südonou Abraham ye Ramai vei samai tea kuloure.

²⁴ Südonou mai aliye puh lü likheinou moa puh vahnou puhye Ramaiye koa souzü peie touyu sü neletao nou ngaoloure.

²⁵ Süzhaibüa, khakhapfüpai Rahab nou-a Israel mai reihkeipomaiye shepei-a ea puletaoye bo kukhe alilo vanou panou tupa loure soukha peiyu hinou puhye sü puh vah vanou Ramaiye koa souzüloue.

²⁶ Südonou rako hayu pfüphaosü athai baiyu bütoua, vah loumoyu lü nasü-a athai baie.