ISAIAH 65 - SHEEYU BAIBEL (BSI)

Khaityayu Maiye Ramai nou Tudeire

¹ Mapao nou paoe, “Enou avei maitao vei veachi sü kei peilai tea bue, anou puletao nou veachi paomoe. Enou puletao hi ngaopeilai tea bue, ana puletao nou Eye phoumoe. ‘E hai hi bue; Enou neletaoye soukha peilai’ tea pao-a buyuma tyahrü nasünou ahi veachi paomoe.

² Enou hea majü abah lapoa avei maitaoye kho-a buyuma, puletao hai lahdosoua ae kaomoyu ludu hisü ta-a baiwe.

³ Puletao hai anghoujünou alekha sü daipa pei koutewe. Puletao nou kipei kinou ae naichuh nou soukhai touyu posheelabu hinou kainüvei pou khesü posheela peiwe.

⁴ Puletao hai khei kinou ae mai ngaomoyu phaki nou khü hisü taho thaimai rakoye chakulai tea tawe. Puletao nou sheemoyu vosou tou-e, ae vakou maivei rah ashitaoye posheelayu theadzü khesü kewe.

⁵ Süthaisü puletao nou maikhe mai hi haibüa paoe, ‘Etao hinou tavai talo! Etao hai sheesha touwe, neletaoye panou deilou shie-e!’ Sübüyu maitao hai Enou zhuthou louhoe, avei lekha sü puletao hi nghikhailai moyu mei büa tao-a panou bulai.

⁶ “Enou neletaoye sü souhpeilai tea ale lachewure, alia zhukhaio, sükhesü anghoujünou rükhaiwure. E ngasou bulai moe, ana Enou puletao nou soupfü khaitouyu khesü paoh khapeilai.

⁷ Puletao nou ae puletao vei paipaoh maitao nou soumah pfümah khaitouyu noupu paoh khapei chelai. Puletao nou cheche moyu ramaiye deichi hinou kainüvei pou ae theadzü khesü meidei-a posheela peiwe, ae Eye ngaophou moa Eye paoshi-e. Südonou Enou puletaoye sü puletao nou soupfü khaitouyu vah haso thaipfüa soupeilai.”

⁸ Mapao nou haibüa paoe, “Mai taralia darkhabe aveih nasü vi moe; vire thaosü, süna hinou darkha shithou hailoua darkhadzü sülouwe. Sübütoua E-a avei maitaoye sü souhakhai toulai moe, avei kuvah soua buyu maitaoye sü Enou khailupa peilai.

⁹ Enou Judah vei khü hinou hrüveyu Israel maitaoye shiha peilai, ae puletaoye panou avei teidei taosü kaathao loulai. Enou dolouyu maitao, avei kuvah souyu maitao nou füdei sühisü hrülai.

¹⁰ Puletao nou Eye tholai, alia puletao vei zhaotu ae nghitu khesü teinghi loulova buyu Sharon Deikho hinou ae teinghi palova buyu Akhor (Veayu Deikho) hinou khopoa panou pou tou-a bulai.

¹¹ “Ana Eye thaowua tayu neletao louzü tyakulai, avei sheeyu Zion Deichi naye ngaophou moyu maitao, kaozhou aveih phouta-a Gad ae Meni raye thotayu maitao louzü,

¹² Enou puletaoye panou ssü shishoa thailai, daiolouzü Enou puletaoye kuyu phaki, puletao nou chila peiba-e, ae Enou puletaoye chayu phaki, puletao nou apai sü keipei bae. Puletao hai achi zülai moe, tea nou vah ashi nasü souta-a baie.

¹³ Südonou Enou puletao hisü paowe, ‘Eye tho-a achi züyu maitao louzü panou touvali ae sovali soulai, ana puletao louzü panou houzüa bulai. Avei maitaoye panou vasa-a hrülai, ana puletao louzü hraongu pfüa bulai.’

¹⁴ Avei maitaoye panou lesa-a lou soulai, ana puletao louzü panou dopfüa kra-a bulai.

¹⁵ Neletao vei zhih sü Enou dolouyu maitaoye donou chaa ngaoyu mai tea kulai. Khoukhoulai Mapao, Enou neletaoye sü southawulai, ana achi züa buyu maitaoye sü Enou zhih ashu ali sapeilai.

¹⁶ Süthaisü teidei sühi maitaralia shiha khoyu maisü checheyu Ramai nou shiha peilai, ae maitaralia chaachou souyu maisü checheyu Ramai vei zhih nou poa chaachou soulai, daiolouzü raichoki veahoyu khesü lata-a bailai alia ngaia bailai.”

Teideiphao Ashu Soupeiyu

¹⁷ Mapao nou paoe, “Enou raki ae deiphao ashu soupeilai; raichoki buyu nakhesü lichopu khailai moe.

¹⁸ Enou soukhai touyutao donou teisa sü asalo ae lesalo, daiolouzü Enou Jerusalem ashu nasü panou sava shore donou soupeilai, ae puhvei maitao nou lesalai.

¹⁹ E-a Jerusalem ae sühi buyu maitao donou asalai. Sühisü krayu pai ae veahoyu kho sü choupu laimoe.

²⁰ Nahpumai toua sühisü thailai moe, moa tsümaitao-a hrüh hrüche moyu sü soulai moe. Po kaihli payu mai sü nahle hi-e tea nou polai. Po kaihli pamoa thaitayu maitaoye sü Enou tudee peiwe touyu shee soulai.

^21-22 Maikhe mainou ki soua sühisü puletao nou bulai, mai kukhe mainou bulouyu sü panou soulai moe. Puletao nou rashibe khesü shothoulai alia sütao vei rashithou sü puletao nou haitoulai, mai kukhe mainou toulai moe. Avei maitao hai süübe büa hrüh sholai, ae puletao nou soupfü khaitouyu teitei hinou asayu sü ngaoloulai.

²³ Puletao nou soupfüyu vah teitei sü kaozhou veia souloulai, ae puletao vei nahmai khesü kaozhou ashi panou daolai moe, Enou puletaoye alia puletao vei tyaosholea hi-a vere teithe teitei hinou shiha peilai.

²⁴ Puletao nou ahi veachi paoche moa bukinou Enou puletao vei akho nasü noupeilai.

²⁵ Lakhao ae zhaotu khenou koa touzholai, chipeikhaodu sünou kikhaorü büa pounghou tou-a bailai, alia nghou khesü maiye soushipu laimoe. Avei sheeyu Zion Deichi hisü maiye soushiyu ae hashi khesü bupulai moe.”