ISAIAH 60 - SHEEYU BAIBEL (BSI)

Haithai Jerusalem vei Kathe

¹ Oh Jerusalem, tashuloua nou teinghi büa va khaio, daiolouzü Mapao vei khouko ava sü ne hinou va-a bure.

² Tyahrü kukhe maiye sü azhi sünou holoua bailai, ana neletao vanou vapeilai; puhvei khouko ava sünou neletao hi bupeilai.

³ Tyahrütao nou neletao vei ava hisü velai, ae veo maitao nou neletao vei teiva payu hisü velai.

⁴ Neletao nghithou hrüpa zhukhaio, neletao vei maitao hai ki hi dakhai vere donou vejüa bure! Neletao vei nahpoutu khesü kadouyu hinou velai, ae neletao vei nahnaotumai khesü daopfü poa ve peilai.

⁵ Neletao nou hai khesü ngaoloua asa sholai, ae lesayu nou paohao louholai, daiolouzü tyahrü kukhe maitao vei nangi khesü neletao hi pfüvelai, ae zai pe polova hi buyu kini khesü neletao hi povelai.

⁶ Midi ae Ephah mai teidei hinou rachome duduli neletao vei teidei hi hupoa veloulai. Puletao nou Sheba teidei hinou sana ae pou kainü veihli sü pfüpoa velai. Maikhe mainou Mapao ye sü paosholai!

⁷ Kedar ae Nebaioth teidei hinou hrüyu nghitu ae zhaotu khesü posheelare donou neletao hi hupoa velai. Alia sükhesü Mapao jüpa soure donou posheelabu hinou sheela peilai. Mapao nou puhvei Rathoki sü raichoki jünou pa veipu sholai.

⁸ Teihao büa zhaopoa laiyu ae rahou büa ki hi dakhai laiyu dzüluki khesü thaoveie?

⁹ Dzüluki sütao hai kadou shoyu teidei hisünou Ramai vei maitaoye ki hi sapoa dakhai ve-e. Puletao nou shahu ae sana khesü pove Ramai Mapao vei zhih, ae Isreal maivei Amasheeo sü tsükhoure donou pove peie. Puhnou puhvei maitaoye sü tyahrü hrülaiye panou tsükhou loure donou soupeiwure.

¹⁰ Mapao nou Jerusalem mai hi paoe, “Vakou mainou neletao vei kivo sü soushu dakhai peilai, ae veo maitao nou neletao vei kuvah sü soupeilai. Avei lekha rarou hisü nou Enou neletaoye tudee peiwure, ana chuo Enou neletaoye sü zhuvea leshi peilai.

¹¹ Hea-khei neletao vei robomü khesü houkhaitoua bubailai, sübüa tyahrü kukhe maitao vei veo maitao nou puletao vei kini khesü neletao hi pove peilai.

¹² Ana neletao vei kuvah soumoyu tyahrütao sü souhazei bailai.

¹³ “Haosüü, chasüü ae vaosüü, alia Lebanon vaohro hinou buyu süü veikayu tyanou pove Jerusalem sü soushupu loulai, avei Rathoki sü souhüvei peilai, ae avei nuhdu nasü kathe soupeilai.

¹⁴ Neletaoye souveayu nahmai ae tyaomaitao nou tave neletaoye tsükhoua khurülai, ae neletaoye ngaorayu mai veishi nou tave neletao phi deiloua neletaoye tholai, alia puletao nou neletaoye ‘Mapao vei nuhdu,’ ae ‘Isreal maivei Sheeyu Ramai vei Zion Nuhdu’ tea kulai.

¹⁵ “Neletaoye sü thaowua ngaorayu, ae soushi khaiwua mai hrümoyu nuhdu sü panou soupu khailai more. Enou neletaoye sü dushoyu ae hüvei shoyu, alia teisa nou sava-a panou hrüyu sü soupeilai.

¹⁶ Tyahrü kukhe maitao ae veo maitao nou neletaoye sü pfünou lah nahye kiko peiyu büa nelataoye kiko peilai. Süthaisü Mapao, Enou neletaoye khailupa apeio, ae Isreal maivei Khoukhoulai Ramai nasüe touyu süloulai.

¹⁷ “Enou neletaoye baosahu thaosü sana nou pove peilai. Hu ae süü thaosü shahu ae baosahu, alia chuh thaosü hu nou pove peilai. Enou nuh teidei khoyu maiye panou checheyu ae kaonayu hisünou khasa-a hrülai.

¹⁸ Neletao nou taidayu pai sü choupu laimoe, ae neletao vei teidei hisü pepoyu ae hakayu sü ngaopu laimoe. Enou neletaoye sü kivo ali büa khopeilai ae vupeilai. Enou neletaoye khailupa peiyu donou neletao nou Eye paosholai.

¹⁹ “Teinghi nou heaki neletao vei ava nasü soupulai more, moa khouhva sü panou kheiki neletao hi vapei pulai more, ana Mapao Enou teisa sü neletao vei ava soupeilai, ae avei khouko ava sünou neletao hi teisa nou vupeilai.

²⁰ Neletao nou veahoyu teithe taosü akhai soulaire. Khouh teinghi jünou veipua Mapao Enou neletao vei ava nasü teisa nou soupeilai.

²¹ Neletao mai hrülai nou cheche-a hrüa bailai; ae teidei sü teisa vei soure donou poloulai. Avei aduso nasü mai hrülai hi soungao peire donou Enou puletaoye shothou peie, Enou puletaoye sü soupeie.

²² Neletao vei taikayu ae lelouho kayu kihikha ali nou dushoyu tyahrü ali soulai. Teile macha veyu phaki, Enou haibüyu sü thasho-a nou soupeilai. E hai Mapao-e!”