ISAIAH 52 - SHEEYU BAIBEL (BSI)

Ramai nou Jerusalem ye Khailupa Peiyu

¹ Oh Zion, kaishulo, ae khouchilo! Oh Sheeyu Ramai vei nuhdu, nevei sabanü aveih nasü tulo. Daiolouzü sheemoyu ae vakou mainou nevei robomü hisü taloupu khailai more.

² Mainou nüpoa hukhamai soua buyu Oh Jerusalem, tashuloua nou ne va hi konai neakhai touyu khesü khoulaiwo! Neye phupfüa laiyu hurai nasü phalaio, Oh Zion hi hukha maitaore!

³ Mapao nou puhvei maitao hi paoe, “Neletaoye panou maivei qila soutayu phaki muhma lia peimoe; sübüa chuo neletaoye phapeia panou lahdo soure hisü muhma ali-a peilai moe.

⁴ Daoh raichoki neletao nou Ejipt hi talou shetumai soua hrütayu hai lah neletao nou talai tea ta-a baie, anou Assaria mai louzü neletaoye halia peimoa nüpoa ta-a baie.

⁵ Chuo Babilon mai hai-a sübütoua neletaoye sü muhma lia peimoa hukhamai soua nüpoa ta-a baie. Neletaoye khasa-a hrüyu maitao hai khaophu soua Eye thaokhai toumoa konüa azhih sü ngaora-a bubaie.

⁶ Vere teile hiolouzü neletao nou Esü Ramai-e touyu süloulai, alia Enou rai-a puletao hi paopeiwure touyu sü süloulai.”

⁷ Deichi vanou ko avei paodou laiyu, kaonayu ko ae savayu ko aveih polai mai, ae khailu peiyu ko pao-a Zion hi “Neletao Ramai nou Veo soure” tea pao-a laiyu mai phisü daizhouzhou zhai veisa!

⁸ Nuh kho-a buyu reihkhaomai nou sha-a bure, puletaosü koa sasho-a nou shusoua sha-a bure! Daiolouzü puletao nou Mapao sü Zion hi dakhai veyu puletao nghithou vuzünou ngaolai.

⁹ Soushi khaitouyu Jerusalem, shusoua lou sü soukhaio! Daiolouzü Mapao nou puhvei maitaoye sü sousava peie, ae Jerusalem sü vupa peiwure.

¹⁰ Mapao nou puhvei sheeyu bah sü thaipalai, puhnou puhvei maitaoye sü khailu peilai ae süsü deiphao mai hrülai nou zhingaolai.

¹¹ Mapao vei rathoki hi poa vah souyu natao poa laiyu maitao, Babilon hinou tapalo! Sheemoyu na ali-a deiso, neletao lahye sousheeloua tapalo.

¹² Zhaovu louzü neletao hai tha-a talai moe, alia pi-a tutalai moe. Daiolouzü Mapao nou neletaoye sa-a tapeilai, ae Israel maivei Ramai nou neletaoye khosa-a tapeilai.

Veayu Kilaiwo

¹³ Mapao nou paoe, “Zhukhaio, avei kilai nasü veiloua duso palai, puhye soukhou peilai, ae polashu peilai, alia puh sü kusho palai.

¹⁴ Mai alao nou puhye ngaolouyu phaki khupalai, puh vei zhu hai tyaku sholai, ae puhvei khaozhai hai maiye railai moe.

¹⁵ Ana chuo tyahrü taoli nou khupa sholai, alia veo maitaoli hai khupa shopoa chi paore ha-a bailai. Daiolouzü puletao hi paopei moyu khesü puletao nou ngaolai, ae puletao nou chokhai toumoyu khesü puletao nou süloulai.”