ISAIAH 50 - SHEEYU BAIBEL (BSI)

¹ Mapao nou haibüa paoe, “Maipfü mai aliye hutuyu büa Enou avei maitaoye sü hutuwure tea neletao nou tsüchowu? Sükulouzü turatayu larü sü daiki bue? Moyuma Enou neletaoye zholaire touwu? Enou thaomai paozho pfüa neletaoye zholaire tea tsüchowu? Sübü moe, neletao vei mahmo vanou neletaoye sü zholai baie, ae neletao nou mahmo souyu donou neletao vei pfümai khesü sa-a ta baie.

² “Daisounou, E veyu phaki mai ali-a habaige? Enou kuyu phaki, daisounou mai ali-a Eye chila peimoe? E lülou holeyu donou neletaoye khailupa peilou hovu? Zhukhaio, Enou kharochi peikhai-e, zai dzü sü theta-a baiwe, südonou kha khesü dzü hayu donou thaitare, ae reidzü sü radeiki data-a baiwe.

³ Enou ratei sü southou zhitei peiwua panou thaiyu maiye donou dopfüyu büa bulou süe.”

Mapao vei Kilaiwo nou Paochi Züyu

⁴ Ramai Mapao nou maiye doupei lousüyu mali sü ahi peiwure, sübüa Eye panou veaholai maiye le sousava peire donou paila aveih sü ahi peie. Shonatsü sü puhnou Eye doupeire khesü panou kei nüshoyu soupeiwe.

⁵ Mapao nou Eye sülou süyu tsüdo hai peie, ae Enou puhye khaityawu moe, moyuma E puh hinou tarei tachamoe.

⁶ Eye taidayu mai hi Enou aphao sü pfürei peiwe, avei khoumai paiyu mai hi baitua pfürei peiwe, ae Eye konüa taidzü süshoyu mai hi apah sü pfüku chamoe.

⁷ Daiolouzü Ramai Mapao nou Eye soukha peiyu donou Eye sü puletao nou soushilou laimoe. Südonou Enou azhu sü chuh ali büa pfüla loure, ae Eye hraongu panou ngaolai moe touyu sü Enou süwe.

⁸ Daiolouzü avei khüngu phoupeire nasü ngheire. Thaonou Eye dulaige? Koa nou chikuyu ki hi velai khe! Eye thaonou ngaobawe? Puh sü panou ahi takoulo!

⁹ Ramai Mapao nou Eye soukha peilai, thaonou Eye nou mah-e tea paoloulai? Zhukhaio, puletao hrülai hai sabanü büa shita-a bailai, ae rüh nou puletaoye sü toulou bailai.

¹⁰ Mapao ye ngaopi-a puhye tsükhouyu mai hrülai, ae puhvei kilaiwo chi züyu mai hrülai, neletao nou ta-a buyu ludu nasü zhi-a buyuma, Mapao ye sü louchelo ae neletao vei Ramai hinou bulo.

¹¹ Maiye soushire donou shodo ashi souyu mai hrülai sü lah puletao vei shodo ashi na sünou soushi souhawu bailai. Mapao nou hai khesü panou vepalai, ae neletao sü paoshalou hosoua veaholai.