ISAIAH 5 - SHEEYU BAIBEL (BSI)

Darkha Kipei vei Lou

¹ Asamaina donou lou ali soungaolai, puh vei darkha kipei donou leshiyu lou ali: Akho hai veishoyu deichi ali hinou puhvei darkha kipei bue.

² Puhnou dei sü helou-a chuh khesü kolaiwure, ae darkha veihkayu tyanou sholoure. Darkha panou khore donou puhnou kipei toutsü hinou douhbuh ali souloure, ae darkha dzü süyu buh-a ali soukhailoure. Puhnou darkha shiyu teile hi zhuveyu phaki darkhashi teitei sü veimo tyanou shi-a baire.

³ Südonou chuo asamai nanou paoe, “He Jerusalem ae Judah hinou hrüa buyu maitao, zhuvea nou avei darkha kipei ae ahai ko hi thaonou mahsa touyu chi kupeio.

⁴ Enou darkha kipei donou soupei chemoyu dai bue? Enou rashithou aveih shipei shulai tea kho-a bukhai-e, daidonou rashithou ashi tyanou shi-a baiwe?

⁵ “Enou avei darkha kipei hi dai-e soulai touyu sü neletao hi paongaolai: Enou bokha sü hralaiwulai, ae bouvo sü dakhao laiwulai alia rekhaona panou talou toulou-a deisasa-a bailai.

⁶ Enou kipei nasü phi soupei mo-a nou vukhai bailai, phi soupeiyu thaosü panou pounghou ae shube khenou paphoulou bailai. Enou teihao-a panou sühisü teirü koupei laimoe.”

⁷ Israel mai hai Khoukhoulai Mapao vei darkha kipei-e, ae Judah mai hai puhnou jüpasho-a shokhai touyu darkhabe nasüe. Puletao hai vah aveih soushulai tea Puhnou cho-e, ana zhe kükouyu vah sou-a baire. Puletao hai kaozü soua hrüshulai tea Puhnou li-e, ana vah ashi khaikho sou-a bubaire.

Maikhe Mainou Vah Ashi Souyu

⁸ Teidei hamo koute ki-lu hüthou khai hüthoukhai-a buyu maikhemai, neletao hai daizhou koute vealaisa! Neletao litou teidei sühisü hrüa bubailai.

⁹ Khoukhoulai Mapao nou haibüa paoyu Enou choue, “Veisho-a nou soukhai touyu ki hai khesü mai bumo-a kirao soukhai bailai.

¹⁰ Darkha kipei dusho-a nou souyu hactar kirou hisü darkhashi dzü litar acha likhei sülou bailai. Thoutai sülai kaihlia kiacha thouyu hai sülai kiacha likhei chachi lou-a bailai.”

¹¹ Shona kushu zhilou-a zhaoh sotayu mai alia khei koute zhaoh sozhi-a bukouyu mai sü daizhou koute vealaisa!

¹² Puletao vei khonü ralea hisü khubvü, gaigou, lana, beibeibvü ae poa lou souyu basei tyatyali alia zhaoh loua souwe, ana puletao nou Mapao vei haso ae puhnou dai vah soupei khaitoue touyu lichomoe.

¹³ Südonou neletaoye sü hukhamai ali sou-a vakou nüpoa tawulai; neletao vei süthai-apei maitao hai khü-a thailai, alia maisou nou rei-a thailai.

¹⁴ Thailuko koure rabedusho vei ludu sü puletaoye panou takoure donou dusho-a soukhaitoua bure. Jerusalem hi aduso maitao, peikho maitao ae maisou nou buh sühisü takou louta laire.

¹⁵ Mai hrülaiye sü ponakou khaiwulai, khaophu souyu maitao alia zhosou-a laiyu mai khesü ponatai khailai.

¹⁶ Ana Khoukhoulai Mapao nou puhvei dusho nasü kaozü hinou vah soungao peiwure, alia puh hai sheeyu Ramai-e touyu nasü puhvei maitaoye tudeeyu hinou popa ngaopeiwure.

¹⁷ Soushi khaitouyu nuhdutao hinou zhaotu sü panou pou phoutoulai, alia nghitu khesü panou buh sühinou kholai.

¹⁸ Kaozü moyu naye sü madayu rai nou ae choha khiyu rai nou khipoa tayu büa mah sü khipoa laiyu maitao hai daizhou koute vealaisa!

¹⁹ Neletao nou paoe, “Mapao nou soulai tea paoyu nasü panou thashoa soukhaio, sükua Etao-a zhulai. Israel maivei sheeyu Ramai Mapao nou dai-e tsücho-a busa Etao-a panou süloure donou vah nasü thashoa panou soukhaio.”

²⁰ Ashi nasü veih-e ae aveih nasü shi-e tea paoyu maitao, azhi nasü ava hi ae ava nasü azhi souda thouyu maitao, alia khayu nasü jüe (mou-e) ae jüyu nasü kha-e tea buyu maitao, neletao hai daizhou koute vealaisa!

²¹ Lahnou sühsho-a laiyu maitao ae dokai veisho-e tea nou buyu maitao, neletao hai daizhou koute rako shilaisa!

²² Zhaoh soyu hinou zhih tayu maitao, ae zhaoh tarasoua ngaopi moa soyu maitao,

²³ seihla jüpa-a kaozü moyu mailiye panou lahdo soulouyu maitao, ae acheche mailiye puhvei zü peimoyu maitao hai daizhou koute vealaisa!

²⁴ Südonou chuo neletaoye sü rouvao meideiyu büa alia maa tahtayu pounghou taonou kita-a pothou mei deiyu büa deihawulai, daiolouzü neletao nou Khoukhoulai Mapao, Israel maivei sheeyu Ramai ye sü malaiwure.

²⁵ Südonou Mapao sü puhvei maitao pei hi rarou loure, puh bah sü thaipa puhvei maitaoye tudee talaire. Deichi khesü ngure, alia thaiphao khesü lududo kinou hashi laikhai touyu büa thai-a bure. Mapao vei lekha-rarou nasü chua chemo hie, puhvei maitaoye tudeepure donou buhie.

²⁶ Mapao nou tyahrü kukhe maiye panou vere donou shee soupeie, alia teidei akhai hi buyu maiye tavelo tea zhaophiphi poa kuwe. Alia zhukhaio, puletao sü laire, thasho poa laire!

²⁷ Puletao hai mai ali koute-a vea moe, mai aliro phi-a sülou moe, puletao vei khyakho hai-a pita moe, ae maili vei phikharai koute-a demoe.

²⁸ Puletao vei voulouthou hai veihshoe, kare donou souda poa laire. Puletao vei rhei phimou hai chuh veitya büa khou-e, alia puletao vei rheiluki phihao hai rührai büe.

²⁹ Soureih maitao hai chipeikhaodu nou rayu büa ae nülouyu soukhaona sü puletao bah hinou vupa louhoyu büa bue.

³⁰ Süzhou teithe sü zaidu hi buyu dzü khüpayu büa ae rayu büa Israel mai pei hisü mainou ralai. Teidei süna zhuyu phaki, maikhe mainou teizhi ae veahoyu likhei ngao-a bailai. Alia ava hisü azhi nou züloua ngao-a bailai.