ISAIAH 43 - SHEEYU BAIBEL (BSI)

Ramai nou Puhvei Maitaoye Khailupa Peilai tea Apaopeiyu

¹ Oh Israel maitaore, neletaoye sou-apeio Mapao nou habüa paoe, “Ngaopiso, daiolouzü Enou neletaoye sü khailupa peilai. Neletaoye sü Enou zhih sa-a kupa khaitoue, neletao hai avei maie.

² Neletao nou reidzü kacho phaki, Enou neletaoye salai peilai; ae veahoyu ve daoyu phaki, sükheye panou neletao jünou veilou ngalou laimoe. Neletao nou mei tachoyu phaki, meiye sü panou neletaoye dei laimoe; ae neletao vei hrümai hi tatei shoyu vedao-a buyuma sükheye panou neletaoye soushiwulai moe.

³ Daiolouzü E hai neletao vei Ramai Mapao nasüe, neletaoye khailu-apeio, Israel maivei Amasheeo Ramaie. Enou Ejipt maiye poa rapha souwua neletaoye panou lamado soupeie, Sudan ae Seba maiye poa neletaoye lealoue.

⁴ Neletao hai avei nghingao hinou muh teishoe ae Enou neletaoye leshi-e alia tsükhou peie. Südonou deiphao hi hrüyu tyahrü hrülai nou pothou neletao vei hrirai lealoue.

⁵ Ngaopiso, daiolouzü Enou neletaoye koa bupeilai! “Enou neletao vei tyaosholea khesü teinghi palova nou save peilai, ae teinghi loulova nou kuve jüpeilai.

⁶ Enou teibekou hisü, ‘Puletaoye phapeio’ tea paopeilai, ae teizükou hi ‘Puletaoye nükhaiso, phapeio’ tea paopeilai. Adou kounou hrüa buyu avei maitao ae deiphao akhai hinou buyu khesü panou ki hi dakhai veloulai.

⁷ Puletao hai avei maitao-e, Enou puletaoye sü panou avei kathe ae vei-sodu soure donou soupei khaitoue.”

Israel Mai hai Mapao vei Shaki Soure Maitao-e

⁸ Ramai nou paoe, “Avei maitaoye sü chikuyu ki hi kupoa vewo. Puletao hai nghithou bue, ana nghichare, puletao hai noubei bue, ana noupere!

⁹ Chikure hisü tyahrü hrülaiye kuve jülo. Haithai vepare paolou süyu thaovei ramai bue? Chuchu vepayu khesü rai-a paopa peilou süyu thao bue? Puletao hai kao-e ae puletao vei chipao khesü cheche-e touyu shaki maitaoye sü panou paokhaio. Sükulouzü maikhe mainou chouloua ‘Haire acheche-e’ tea paopeilai.”

¹⁰ Mapao nou paoe, “Israel maitaore, neletao hai avei shaki soure maitao-e; E hai Mapao-e touyu neletao nou süloua Eye loucheloua tsü süku loure donou Enou dokupa louyu avei kilai maitao-e. Ajünou rai-a ramai kukhe ali-a ha-e; haithai-a ramai kukhe ali-a bulai moe.

¹¹ “E likhei Mapao sü baie, E baimoa neletaoye khailu peire kukhe mai ali-a ha-e.

¹² Enou daie vepalai touyu khesü paopa peiwe, ae neletaoye Enou tave soukha peiwe. Vakou maivei rah ali koute-a haibüa soupei mohie; neletao hai avei shaki soure maitao-e.

¹³ E sü Ramai-e ae teisa nou süna soulai. Mai ali koute-a abah hinou tupa louhoe; Enou souyu vah haso khesü mai linoua soudalai louhoe.”

Babilon hinou Tupalouyu

¹⁴ Neletaoye khailu-apeio Israel maivei sheeyu Ramai Mapao nou paoe, “Neletaoye khailupa loure donou Enou reihmai me ali Babilon hi seive peilai, ae puletao vei rokhubomü khesü souphe souphowulai, alia puletao nou shusoua rayu khosü dopfüa krayu kho hi soudathou peilai.

¹⁵ E hai neletao Mapao, Sheeyu Ramai-e, neletaoye sou-apeio, neletao vei Veo nasüe.”

¹⁶ Daoh vuli Mapao nou zai hinou ludu ali soupeie, dzü alao buyu hinou ludu ali vapeie.

¹⁷ Puhnou rheilukitao, rheitao dushoyu soureih mai me, ae reih souveih shoyu maitaoye sü save soushi souha peiwua panou zü zhiyu hisü nou kushupu more, meivabvü aliye sounghiyu büa sounghi peiwure!

¹⁸ Ana Mapao nou paoe, “Daoh raichoki vah haso khesü ngaiwo, alia raichoki vepayu khesü lichopu khaiso.

¹⁹ Enou ha ashu khesü souta laire, zhulo. Sükhesü vepa-a bure, chuo neletao nou ngaolaire, zhukhaio. Enou hiphao vaohro hisü ludu soupeilai, ae radeiki hisü pa reidzü küa bulai.

²⁰ Enou dokupa louyu avei maitaoye panou dzü kere donou hiphao laophao hisü reidzü kü peiyu donou rekhaona, lakhao, ae raohou khenou Eye tsükhoulai.

²¹ Puletao hai avei mai soure donou soupeie ae puletao nou Eye lou sousholai!”

Israel Maivei Mah

²² Ana Mapao nou paoe, “Neletao hai Eye thomore, Oh Israel maitaore, neletao hai Eye donou chathai tare.

²³ Neletao nou zhaotu meidei-a sheelayu khesü Eye pove pei more; neletao nou posheela peia buyuma Eye tsükhouyu sü hare. Neletao hi posheela na khesü peio tea kho-a neletao kou sü Enou sousü peimoe, moyuma kainüvei pou sü kho-a neletaoye souvea moe.

²⁴ Neletao hai Eye donou kainüvei pou khesü pousha pha-a hümoe, moa neletao nou Eye posheela peiyu southa sünou ale khyayu soupei moe. Ana neletao vei mahmo sünou akou sousü peia baie.

²⁵ Sübüa buyuma, Esü neletao vei mahmo khailu-apeio Ramai nasüe, ae Enou neletao vei mahmo khesü lichopu peilai moe.

²⁶ “Chikuyu buh hi velai she; ne hi mah duka peikhai touyu nasü ve paokhaio, koa chi kulai khe! Nevei kaozü nasü popa paongao peikhaio.

²⁷ Neletao vei paipaoh maitao nou mahmo sü souwure; neletaoye süthai-apei maitao nou ahi kaomo zümoyu vah khesü soupeie,

²⁸ alia neletaoye khasa-a buyu peikho maitao nou avei sheeyu rathoki nasü souzhai peiwure. Südonou Enou Israel maiye sü panou soushi khaiwure hisü peithouwure; Enou avei maitaoye sü panou hraongu ngaore donou souwure.”