ISAIAH 40 - SHEEYU BAIBEL (BSI)

Ramai vei Maitaoye Sousava Peiyu

¹ “Amaitaoye souvasa peio,” tea Eletao Ramai nou paoe. “Puletaoye sousava peio!

² Jerusalem hinou hrüa buyu maitaoye pailako aveih nou keapeio, ae puletao hisü haibüa paopei khaio, süolouzü puletao hai teile taoli veaho shore, anou chuo puletao vei mahmo khesü khaipeiwure. Enou puletaoye sü mahmo souyu donou soutaosoua tudei peiwure.”

³ Pai ali haibüa sha-e, “Mapao ye donou ludu souda peio, Etao Ramai ye donou radeiki hisü ludu vapeio.

⁴ Deikaorao teitei sü thouchi khaiwulai, ae deichi deitao teitei sü souna kouwulai, alia thou-tao-a buyu dei teitei sü souchiwulai, ae makhukükou buyu dei khesü souzü khaiwulai.

⁵ Süthaisü Mapao vei khouko ava sü pongao peilai, ae deiphao mai hrülai nou süsü ngaokhai toulai. Haisü Mapao masha vuzünou paopawure.”

⁶ Pai ali nou haibüa paoe, “Shusoua shakhaio!” “Daitoua shalaige?” tea Enou noue. “Deiphao mai hrütou hai poube büa baie, ae puletao vei hüveiyu hai poupa ali büa baie.

⁷ Mapao nou teikhai seive hüshoyu phaki, poube sü kita-a baiwe, ae poupa sü raita-a baiwe. Cheche vuzünou maihrütou hai poudai büa baie.

⁸ Poudai khesü kita-a bailai, poupa sü raita-a bailai; ana Ramai vei chipao sü teisa nou bukou telai.”

⁹ Oh Zion, deichi pei hi taopa loua ko aveih nasü shapao peikhaio, pai chihsho-a nou shapao peikhaio, ngaopiso. Judah vei nuhdutao hisü paopei khaio, puletao Ramai hai velaire.

¹⁰ Khoukhoulai Mapao sü khouko noupu khasa-a hrüre donou velai. Puhnou khailupa peiyu maitaoye buu pfüve peilai alia puletao paozho khesü khaipeilai.

¹¹ Puhnou puhvei maitaoye sü zhaotu khoyu mainou zhaotuye kiko peiyu büa kiko peilai, ae zhaotu sü puh bah nou pove jüpeilai, alia zhaotu ke khesü zhutou poa sa-a tapeilai.

Paonada Louhoyu Israel Maivei Ramai

¹² Thao nou zai hi buyu dzü sü puh bah hi thouloua doulou süe, ae raki sü puh bah nou doulou süe? Thaonou dei hi buyu maitao sü pai ali hi thouloua doulou süe, ae deichi deitao khesü sühdou khao ali hi thou doulou süe?

¹³ Thaonou Mapao ye haibüa soulo tea paolou süe? Moa puhye thaonou paodou peilou süge?

¹⁴ Puhnou thaoye koa haibüa soulai tea chi phazhoyu bue, ae thao hinou puh hai kaozü nasü douloue? Thaonou puhye hasüyu ae sükulou süyu tsüdo khesü doupeie?

¹⁵ Mapao vei nghoujü hio tyahrütao hai hatoulia moe, dzükhou ali hinou dzü zhaota-ta kouyu büa baie, alia kadou shoa dzü nou sühao poa buyu nuh teidei ali hai naihü touli büa baie.

¹⁶ Lebanon hi hrüyu soukhaona veishi hai Ramai ye poa sheela peilou jüe, moa sühi buyu süü teitei hai poa sheelayu mei deilou jüe.

¹⁷ Tyahrü hrülai-a puh nghoujü hiolouzü hatou lia moe, puhye donou puletao hai hazho toulia moe ae sakhai-a buyu büa baie.

¹⁸ Südonou Ramai ye sü neletao thaoye nou poa nadalai, moyuma dai nou paonadalai?

¹⁹ Ramai hai shamara souyu mai nou zhurai ali souloua sünasü sana nou meaho loua ae shahu rai nou souhao khaitouyu bashara ali raimoe.

²⁰ Sübüa sana moa shahu nou soulou hoyu touha maitao nou taralou hoyu süü nou doloua shamara souyu maiye panou zhurai nasü kaodu more donou soukhai toue.

²¹ Neletao haisü sümovu? Hai nasü soushurai nou neletao hi paopei movu? Deiphao hai kabüa soushu-e touyu sü neletao sümovu?

²² Hai nasü deiphao ae raki pei hinou buyu punou soupeie; sükhe hinou hrüyu maikhesü chasei ali büa baie. Puhnou rakiva hai topa haosah ali hapayu büa baie, ae sahpao ali haokhai touyu büa haoloua baiwe.

²³ Puhnou veo maitao ae aduso maitaoye sü sounakou hazhotou lia moyu hisü khaipeiwe.

²⁴ Puletao hai rashibe shokhai touyu pha somoa buyu büa buhie. Mapao nou teirü teikhai seiveyu phaki, puletao hai thaita-a bailai, alia thouba hüpoa tayu büa puletaoye sü hüpoa ta-a bailai.

²⁵ Sheeyu Ramai ye sü neletao thaoye paona dalai? Mailia puhye raiyu buhae?

²⁶ Ne pei pfülashu rateiva sü zhukhaio! Thaonou teivu khesü buh kukua khaipeie, ae chokhai khaitoue, sükhesü alili nou zhih sapeie; daiolouzü puh hai khouko pfüshoe, ae khouko bushoyu donou ali koute-a maha moe.

²⁷ Oh Israel maitaore, neletao daisounou Mapao hi neletao vei veahoyu sü zhupei moe, ae kaozü nasü neletao hi soupei moe tea paowe?

²⁸ Ne sümo hivu? Ne choumo hivu? Mapao hai teisa bure Ramai nasüe, teideiphao sou-apeio nasüe. Puh sü lelouho moe moyuma veahoyu sü ha-e, Puhvei tsüdo hai mai lia sülou hoe.

²⁹ Puhnou lelouho maiye soukhoupu peiwe, ae khouko hayu maiye sü pfüchi peiwe.

³⁰ Nahlemai koute-a lelouho-a veata bailai alia shaloua kaodu talai.

³¹ Ana Mapao vei vu kholouyu maisü puletao vei pfüchi sü soukhoupu peilai. Puletao sü leche büa shouh pfüloua zhaoloulai. Puletao sü tuta loulai ana vealai moe, puletao hai talai anou holai moe.