ISAIAH 4 - SHEEYU BAIBEL (BSI)

¹ Süzhou teithe sü naotumai anai nou poutumai aliye nüloua haibüa paolai, “Zhuvea nou Etaoye panou nevei khapfüe teanou paolo, Etao lah nou toure touso ae sabanü khesü phouloua bailai, sübüa panou Etao hai nghimo hie touyu vei hraoyu nasü polai peio.”

Jerusalem ye Souvei Dakha Peire

² Süzhou teithe Mapao nou teidei sühi poube ae süübe khesü soudusho peilai, alia teidei sühinou pa-a buyu shinamara khesü panou shokhai toua buyu Israel maitao vei kathe ae khaophu panou soulai.

³ Jerusalem nuhdu hinou shokhai tou-a buyu maitao, Ramai nou thaimo-a panou dopapei khaitouyu mai hrülaiye sü sheeyu maitao tea kulai.

⁴ Ramai vei khouko sünou chiku pei-a tyahrü nasü soushee peilai alia Jerusalem vei mahmo ae sühinou zhe kükou khaitouyu khesü khüshee peilai.

⁵ Süthaisü Zion Deichi teitei ae sühinou vejüa buyu mai hrülai pei hisü Mapao nou heako hai teihao nou seive khaipeilai. Alia khei hai meikhao ae meikei ali panou khopeilai. Mapao vei khouko sünou puletao vei nuhdu teitei sü khopeilai.

⁶ Mapao vei khouko ava sünou nuhdu nasü heaki teinai hinou pa soloure buh soupeilai alia teikhai teiro ashi veyu phaki-a panou bailoure buh soupeilai.