ISAIAH 38 - SHEEYU BAIBEL (BSI)

Veo Hezekiah Souyu ae Veilouyu

¹ Teile hai phaki Hezekiah veo sü souloure alia thainore. Rachipaolawo Amoz nahpoutu Isaiah nou puhye ve cha-a haibüa paoe, “Mapao nou haibüa paorae; ne ki sü kaozüsoua tubai khailo, daiolouzü ne hai veilou moa thai bailaire.”

² Süthaisü Hezekiah nou puh pah hai kivolo pfüa reiloua nou veachi paoe;

³ “Oh Mapao, Eye licho peikhaio tea ne hi khowe, süolouzü Enou kabüa ne nghoujü nou cheche-a avei tsüle teitei nou peia nevei kuvah sü soupeie, ae nevei nghingao hisü nou aveih vah teitei sü teroupoa soupeie.” Sübüa paowua puh sü leveashoa kra-e.

⁴ Süthaisü Mapao nou Isaiah hi haibüa paoe,

⁵ “Ne taho Hezekiah hi haibüa paopeio: Ne puopaoh David vei Ramai Mapao nou paoe, nenou veachi paoyu sü Enou chouloure, nenou nghidzü kouyu sü Enou ngaore; Enou nevei hümai sü po kiangou thoupu peilai.

⁶ Enou neye alia nuhdu hai nasü Assaria mai bah hinou vupa peilai alia kho peilai.”

²¹ Isaiah nou paoe, “Doushi ali leakho loua chopayu zhime hisü mealo, sübülouzü puh sü veiloua bailai.”

²² Süthaisü Hezekiah nou noue, “Enou Mapao vei Rathoki hi tave loulai touyu vei shee sü daie?”

⁷ Isaiah nou paoe, “Mapao nou apaokhai touyu nasü soupeilai touyu Mapao vei shee nasü hai nae:

⁸ Ahaz veo nou soukhai touyu phiheadou hisü nou pa khungu nasü phika kirou thailo dakhai talai.” Südonou khungu sü phika kirou hai thailo dakhai ta-e.

⁹ Hezekaih nou veilouyu thai, puhnou Mapao ye lou sou shoyu hai nasü rüpeie;

¹⁰ Enou tsü choe, avei pfüphao veishoa bukinou Esü rata laire, Avei hümai shokhai touyu taosü thai maivei deiphao hisünou ho hrüta laire.

¹¹ Enou cho-e hria buyu mai vei deiphao hisü E hai Mapao ye ngaopulou hore, alia hrimai ali koute-a ngaokhailai more.

¹² Zhaokho maivei sahpao ali büa avei buyu buh sü hrakouwure. Sah doyu mainou sah sü zükhaiyu büa avei hümai sü zükhai peiwure; Ramai nou avei hrü sü panou akhai soulaire tea Enou tsüchoe.

¹³ Chipeikhaodu ali nou arao souchayu büa souleyu donou kheimathe sü kra Enou soukha kho-e, Hea nou polou khei soupeia puhnou avei hümai sü akhai soupei laire tea Enou choe.

¹⁴ Khaitu ae raohou büa Enou ra-e, alia rahou büa E sü lüe, Enou rakiva sü zhungere, Mapao, veahoyu haitao hinou Eye vupa peio.

¹⁵ Ana Enou daie tea paolaige? Daiolouzü haikhe teitei sü Mapao nou soua baie. Ale vealeyu donou Esü zhithoulou hore.

¹⁶ Oh Mapao, E neye donou hrilai, neye donou likhei hria bailai; Eye souvei peio, Eye panou hrilo.

¹⁷ Cheche vuzünou veahoyu haitao teitei sü Eye panou veiloure donou baie. Nenou avei hümai hai sü kaoshi-a raobvü hi loure hinou khailupa peie, Nenou avei mahmo teitei khaipeie.

¹⁸ Daiolouzü athai maivei teidei hisü mailia neye paosholou hoe, Thaitayu mainou nevei tobai soumoa leshiyu nasü zhipu laimoe.

¹⁹ Enou chu neye paoshoyu büa hria buyu mainou neye sü paoshoa bue. Ne hai tobai soumoa leshi peiyu nasüe tea puo khemai nou nahmaitao hisü paodou peiwe.

²⁰ Mapao nou Eye souvei peie, Etao nou hria bukisa sü Mapao vei ki hinou puhye sü lou sousholai.