ISAIAH 35 - SHEEYU BAIBEL (BSI)

Sheeyu Ludu

¹ Hiphao ae radeiki sü sasho laire, radeiki hinou poupa khesü pah pata laire.

² Radeiki nasü sasho-a nou shusoua lou soulai, hüvei shoyu Lebanon Deichi büa hüvei sholai, alia Karmel ae Sharon nou dei veiyu büa veilai. Mai hrülai nou Mapao vei khouko ava ae puhvei aduso sü ngaolai.

³ Lelou hoa buyu bah khesü soukhou peio, ae talou hoa buyu phi khesü souchü peio.

⁴ Ngaopia nou areih hayu maitao hisü haibüa paopeio, “Khouchilo alia ngaopiso! Ramai nou tave neye khailupa peilai, ae neye ngaobayu maitaoye sü puhnou khüngu phoupeilai.”

⁵ Süthaisü nghichayu mainou ngaoloulai, ae noupe-a buyu mai nou chouloulai.

⁶ Phibah shiyu mai nou kho-shu büa tuta loulai, ae la hayu mainou sasho-a nou lou soulai. Radeiki hisü nou dzüla palai ae reidzü sü külai.

⁷ Mei büa soushoa buyu vünai sü zai datalai, ae radeiki hisünou dzüla küpalai. Lakhao khenou hrüa buyu buh hisü pounghou ae süünghou tsüpaloulai.

⁸ Sühisü dushoyu ludu ali talai, alia ludu sünasü “Sheeyu ludu” tea kulai. Mah souyu mai nou ludu süna talai moe, ae voyu mai-a hai hisü mota laimoe.

⁹ Sühisü chipeikhaodu-a bulai moe, moa rekhaona taralia talai moe. Ludu sühisü Mapao nou khailupa peiyu maitao nou ta-a ki hisü veloulai.

¹⁰ Puletao nou asasho-a nou lou soupoa Jerusalem hisü velou loulai, puletao nou teisa sava-a hrülai, alia veahoyu ae dongai pfüyu bulai moe.