ISAIAH 34 - SHEEYU BAIBEL (BSI)

Ramai nou Puhye Ngaobayu Maiye Tudeire

¹ Oh tyahrütaore, tave jüloua keilo! Deiphao teitei ae sühinou hrüa buyu mai hrülai panou tave keikhaio.

² Daiolouzü Mapao nou tyahrü hrülai ae puletao vei reihmai hrülai pei hi rarou loure. Puhnou neletao mai hrülaiye sü souhakhaire donou soudawure.

³ Puletao vei thaiphao sü daovu peilai moe, ana laikhaiwua panou tangua bailai, alia deichi teitei hisü panou zhe nou külai.

⁴ Rakiva buyu khouh teinghi ae teivu khesü dekou ta-a bailai, ae raki teidei sü larükao ali büa zhaota-a bailai, alia rakiva buyu teivu khesü darkhabe vanou moa doushibe vanou süünghou raitayu büa raita-a bailai.

⁵ Mapao nou raki vanou puhvei khoche sü soudaloure, haina sünou Edom mai pei hi ae puhnou soushi souhawulai tea buyu maitaoye sü souhawulai.

⁶ Puhvei khoche hisü zhaotu alia nghitu hai poa sheelayu phaki zhe ae southa neakhai touyu büa taolai. Daiolouzü Mapao nou Bozrah nuhdu hinou posheelayu sü soulai, ae Edom teidei hisü nou maiye southa sholai.

⁷ Maikhe maiye chode dathayu büa dathawulai, sübüa puhtao vei teidei sü zhe nou külai ae southa nou holoulai.

⁸ Daiolouzü Mapao nou khüngu phoure teile ali bue, ae Zion ye khailupa peire po ali bue.

⁹ Edom hi rei khesü kolas data-a bailai, ae nai sü meithou chuh vitalai, alia teidei teitei sü mei deiyu buh souwulai.

¹⁰ Hea-khei sü mei tao-a bulai, meikhao sü teisa nou khaoa bukoutelai. Teidei sü maiphao teitei hinou shi-a bailai, alia mai ali koute-a teidei sünasü tacho talai moe.

¹¹ Teidei sühisü tuturu ae leche nou buyu buh soutawulai. Mapao nou Edom sü soubürarou peilai ae southou shizhu mosou khaipeiwua panou hasü maiye choha-a bailai.

¹² Teidei sühisü vemai ali-a bulai moe, ae süthai peiyu mai ali koute-a ha-a bailai.

¹³ Raishuh khenou veo fühao hi ae reihkhaobu khesü tsüpa phouloua bailai, alia hai hisü lakhao ae rehou nou hrüyu buh soua bailai.

¹⁴ Rekhaona khenou buh sühisü takou takhe-a bulai, alia khei vei rashitao-a sühinou ve daolai. Buh sühi sünou kheikou hai rapfüpai nou ve soyu sü soulai.

¹⁵ Buh sühisü raohou khenou phe souloua dzü dzülai, toutu koloulai alia leche hai-a lahkuku vei reidzü ae reikü koa bulai.

¹⁶ Mapao vei larübvü hi rüthou khaitouyu hrikhaona taosü phoukhaio. Haitao hai ali koute-a sühisü halai moe, ali koute-a lahkuku vei reidzü ae reikü hai halai moe, papa buche khai-a bulai. Daiolouzü Mapao nou sübüa soulai tea kharochi peiwure; puhnou sükhesü pove jüpeilai.

¹⁷ Mapao nou puletao hisü teidei zhi peilai, ae lahkuku vei zha sü peilai. Puletao nou buh sühisü teisa nou hrüyu sü souwulai, ae khaphao teitei nou buh sühisü hrüa bubailai.