ISAIAH 32 - SHEEYU BAIBEL (BSI)

Kaozü Süyu Vemai Ali

¹ Zhukhaio, veo mai ali nou acheche hinou ae peikho maitao nou kaozü hinou nuh teidei sü khosa-a hrüpeilai.

² Puletao mai alili hai teikhai hinou bailoure buh ali ae teikhai teirü ashi veyu phaki tutsü louyu buh ali bülai, alia puletao sü radeiki hinou reidzü küyu büa ae halia hayu teidei hisünou chuhdu ali nou teihao soupeiyu bülai.

³ Puletao vei nghithou ae noubi sü maikhe maiye donou hepeilai ae kei peilai.

⁴ Puletao hai lesoua vah souhaha khailai moe, ana kaozü hinou vah soua bailai alia macha hi sünou sheesha-a chi sü paopeilai.

⁵ Vo-a chaoyu maiye sü mai linou aduso mai-e tea paopu peilai moe, moa mai ashi maiye sü tsükhoupu laimoe.

⁶ Daiolouzü vomai sünou voyu chipao pao-a baie, ae puletao vei tsüle hisü ashi tsü choa ae ashi vah soulai tea bubaiwe. Puletao nou chi paoyu ae vah souyu teitei sü Mapao ye paoshilai tea soua baiwe, alia puletao hai houzüa lai maiye pouphou reikha soupei moe.

⁷ Mai ashimai sü ashi nasü baie ae ashi vah soua baiwe. Puletao nou do ashi sünou souloua dahrührüa touha-sohalai maiye soushi peie, alia veahoyu mai vei kaozü hai-a poreilai peia baiwe.

⁸ Ana mai aveih mai hai vah aveih soupeie alia puletao hai kaozü hinou lachüa baiwe.

Tudei Peiyu ae Khaipeiyu

⁹ Leveayu halia ha-a vaphi-a buyu naotu maitaore, Enou paoyu avei chi sü keilo.

¹⁰ Chuo neletao hai sava-a buyuma, po ali thaisü neletao hai veaho talai, daiolouzü darkha dzü süyu sü ngaolai more, alia darkha shithou sü haipu khailai more.

¹¹ Vaphia-a buyu alia leveayu ha-a hrüyu naotu maitaore, chuo levea-a ngaopilo! Neletao vei sabanü khesü laolaiwo, alia neletao khya sü ngulousah nou kholo.

¹² Neletao vei ki-lu ae kipei aveih teitei sü soushi khaiwure, südonou neletao khao khoukhaio,

¹³ alia avei maitao teidei sü raishu nou paopa phouloure, ae sava sho-a hrüa buyu nuhdu hi ki aveih teitei sü soushiwure.

¹⁴ Veo vei fühao koute-a thaowulai ae mai alao hrüa buyu nuhdu hai-a thaowua bailai, alia kitao ae reihkhaobu sü teisa panou rekhaona nou hrüyu buh alia rheihsüh ae zhaotu khenou pou toua sühaoyu buh souwulai.

¹⁵ Ana Ramai nou Etao hi puhvei rako sü seive peilai, süthaisü soushi khaitouyu teidei taosü shinamara veishoyu teidei soutalai, alia chamou veisho-a chachi loulai.

¹⁶ Süthaisü nuh teidei teitei hisü acheche ae kaozü soua hrülai.

¹⁷ Daiolouzü mai hrülai nou kaozü nasü souwulai, alia sühisü kaonayu ae kaozhou veia teisa nou bulai.

¹⁸ Ramai vei maitao sü veahoyu ha-a kaona nou ae vasho-a nou hrülai.

¹⁹ (Ana vaobvü hisü reithou koulai, ae nuhdu sü soushi khaiwulai.)

²⁰ Reipe hinou shiramara thoulouyu mai ae kikhaorü khesü panou pou toua laiyu maisü daizhou koute sava laisa.