ISAIAH 31 - SHEEYU BAIBEL (BSI)

Ramai nou Jerusalem ye Vupeiyu

¹ Ejipt mai hi taho soukha khoyu maitao sü daizhou koute vealaisa! Puletao hai Ejipt maivei reihmai alao buyu donou, ae puletao vei rhei, rheiluki ae reihmaitao vei khouko nou loucheloua baire, ana Israel maivei Mashio Ramai Mapao ye louche more, moyuma puh hisü soukha khomore.

² Puhnou daie souwe touyu lah puhnou süwe! Puhnou veahoyu khesü seive peie, alia puhnou paopayu chipao thaipfüa mai ashi mai ae puletaoye soukha peiyu mai hrülaiye sü tudei peiwe.

³ Ejipt mai hai Ramai moe, puletao-a mai baie; ae puletao vei rhei hai-a vasou pfüa baie, rako moe. Mapao vei bah thaipayu phaki, khouko buyu tyahrü nasü kaodu talai, ae puletao nou soukha peia buyu maitao-a kaoduta-a bailai puhai mai ahai kheinou souha bailai.

⁴ Mapao nou haibüa ahi paoe; “Chipeikhaodu ali nou nghitu moa zhaotu aliye toulai tea southa khaitoua buyu phaki, zhaokho mai nanou dotyatyali soua ra-a buyuma ngaopi laimoe, sübütoua Khoukhoulai Mapao Enou Zion Deichi nasü vu peilai.

⁵ Raohoukü ali nou puh phe hinou zhaohao-a toutuye vupeiyu büa Khoukhoulai Mapao Enou Jerusalem sü vupeilai alia kho peilai.”

⁶ Mapao nou paoe, “Oh Israel maitaore, neletao hai Eye khaitya-a mahmo sü souwure. Ana chuo ahi dakhai velo!

⁷ Neletao nou shahu ae sana nou soukhai touyu bashara khesü polai khai toulaiyu teithe/teile sü velaire.

⁸ Assaria maiye sü soureih hinou souha laire, ana deiphao maivei khouko nou laimoe. Assaria maitao hai reihbu hinou tuta bailai, alia puletao vei nahle maitao hai panou maivei qila soulai.

⁹ Puletao vei veo sü ngaopi shopoa tutalai, alia peikho maitao hai-a pileyu donou puletao nou poa soureih souyu sahra nasü reihbu hinou thaowua tuta-a bailai,” tea Mapao nou paoe. Mapao ye sü Jerusalem hinou tho-a bue alia puhye meidei-a posheelare thaobvü sü Zion hi bue.