ISAIAH 3 - SHEEYU BAIBEL (BSI)

Jerusalem hi Büroyu

¹ Chuo Mapao, Hali-hala Soulousüo Mapao nou Jerusalem ae Judah hi buyu na veishi sü pota laire. Puhnou puletao vei touso ae dzü,

² puletao hi khouko pfüyu maitao ae reihmaitao, puletao vei chiku peiyu maitao ae rachipaola apei maitao, puletao vei keingu maitao ae chi paoveiyu mai hrülai,

³ puletao vei reihmai peikho maitao ae nuh teidei khasa-a hrüyu maitao, alia vepare khesü süa kheikhupado nou poa vah soulou süyu mai hrülaiye sü potawulai.

⁴ Süthaisü Mapao nou maikhe maiye pa nahmaitou nou khasa-a hrülai.

⁵ Maikhe mai hai ali nou aliye souchoroa hrülai. Nahle mai nou tsümaiye ngaophou laimoe, ae maikhe mainou puletao jünou aduso maiye tsükhouyu sü hatalai.

⁶ Mai ali nou lah puhvei kityarai mai aliye nüloua “Newo banoure sabanü buyu thaifüa Etao vei süthai-apeio soupeio” tea paoyu teile sü velaire.

⁷ Süzhou teithe sü puhnou haibüa chila peilai, “Ewo soulou hoe! Neletaoye soukha peire donou ahi halia ha-e. A ki hi touso ae sabanü-a ali-a hae. Südonou Eye panou neletao vei süthai-apeio nasü pa souso!”

⁸ Jerusalem hai phi süloure, ae Judah hai kaotare; daiolouzü puletao nou Mapao vei aduso nasü ngaophou moa puletao vei chi lako ae vah haso teitei sü Ramai ye hraiyu hinou soutare.

⁹ Puletao vei shodo ashi nasü nou lah puletaoye sü zhiloua baie. Puletao hai Sodom hi maitao büa mah khesü dukhya-a nou soua bubaire. Puletaoye sü panou hakata theo, daiolouzü puletao hai lah nou lah hisü souka sounghi loua baie.

¹⁰ Acheche mai louzü kaozhou vei-a bailai tea puletao hi paopeio. Puletao louzü lah nou soupfü khaitouyu rashithou sü touloulai.

¹¹ Ana mai ashi maitaoye donou daizhou koute vealaisa! Puletao nou vah ashi soukhai touyu khesü chuo lah puletao pei hisü velaire.

¹² Nahle maitao nou avei maitaoye sü souchoro pei-a bure, ae naotu maitao nou puletaoye sü khasa-a hrüa bure. Oh avei maitaore, neletao vei süthai apei maitao nou neletaoye sü süthai mah peiwure, südonou neletao hai ludu kalo talai touyu sümoa bure.

Mapao nou Puhvei Maitao hi Chikure

¹³ Mapao nou chikure donou chikuyu ki hisü talou buloure, ae puhvei maitao pei hi chikure donou souda-a bure.

¹⁴ Mapao nou tsümaitao ae süthai apei maitao pei hi chikure donou haibüa paoe, “Neletao nou avei darkha kipei sü soushiwure; ae neletao ki hisü touha laimai hinou polouyu natao nou pove phoutao-a khailoure.

¹⁵ Neletao nou avei maitaoye soushiyu ae touha sohayu maiye soutai sounou peiyu zü aliro hae. Khoukhoulai Mapao, Enou haisü paowe.”

Jerusalem hi Hrüa buyu Naotu maitao hi Chi Deipeiyu

¹⁶ Mapao nou paoe, “Zhukhaio, Jerusalem hinou hrüa buyu naotu maitao hai daizhou koute khaophu sousa! Puletao nghou sü pfülachü touloua tabaiwe. Puletao hai baonü shopoa phi hisü baosa khipfüa holo rei ae hailo phea nou reikhokho poa tawe.

¹⁷ Ana Enou puletaoye sü tudee peilai — Enou puletao pei sü biwulai sübüa panou pei kilei-a bailai.”

¹⁸ Jerusalem hi naotu maitao nou khaophu soua banouyu sabanü ae zhusana khesü Mapao nou pota laiyu teithe sü velaire. Süzhou teithe sü puletao nou phi-bah hi thou khipfü buyu zhusanatao, pei hi phupfüa buyu zhusana, touh,

¹⁹ baosatao, zhuh hosah,

²⁰ pei phuyu sahtao, kainüvei poubvü, phi-bah hi zhainga southou pfüa laiyu natao,

²¹ puletao vei bahtou ae nghou hinou pfülai-a buyu bahtoukha,

²² puletao vei sabanü aveih teitei, lekhabvü,

²³ maiye panou thainüre donou banouyu sabanü teitei, züzüyu sabanütao, alia pei phuyu sahtao ae zhuhosah khesü puletao hinou polai peiwulai.

²⁴ Puletaoye sü pou kainüvei panou poyu thaosü tangiyu kai sünou peilai, khyakho veihtya nou phupfüyu thaosü panou rai phupfülai, peishu veihsho-a pfüyu thaosü panou pei kilei toulai, sabanü aveih banouyu thaosü pa soukou sah nou banoulai, sava-a hüvei sho-a bure thaosü panou hraongu pfüa bulai.

²⁵ Nuhdu hinou khouchi kayu mai koute-a pa soureih hinou thai-a bailai.

²⁶ Nuhdu vei robomü khesü soushi sasawua panou baitoua buyu naotumai ali nou dopfüa krapoa buyu bülai.