ISAIAH 28 - SHEEYU BAIBEL (BSI)

Reilo Vedei hi Hrüyu Maitaoye Tukhayu

¹ Israel maivei vedei hai daizhou koute vealaisa! Puhvei hüveiyu ae kathe hai vütayu poupa peirü ali zhaoh sozhi-a peikhoyu mai ali nou puh pei hi thou pfüyu büa baie. Puletao vei khaophu souyu sü pei hi kainüvei theadzü napfüa laiyu büe, ana sozhitei touyu mai ali nou kou dazü tayu büa sühi sünou kou zütare.

² Mapao nou khouko bushoyu mai aliye panou teikhai teirü ashi veyu büa reithou kouyu büa ae dzüdu nou ve soushiyu büa puletao teidei sü soushire donou soudawure.

³ Touzhi sozhia buyu süthai-apei maitao vei khaophu sü phinou taidei khaiwulai.

⁴ Khaophu souyu süthai-apei maitao vei kathe sü houki doushi meipa raikayu taosü mainou ngaolou khaie haitouha louyu büa bailai.

⁵ Velaiyu teithe hisü Khoukhoulai Mapao nou puhvei shokhai touyu maitao hisü veishoyu vepeirü ae hüvei shoyu poupatou kulai.

⁶ Puhnou chilou kuyu maitao hisü kaozü soulou süyu tsüdo peilai, ae reihkhaomai hisü khuvei ae khouko sü thoupeilai.

Isaiah ae Judah hi Zhaoh Sozhi-a buyu Rachipaola-apei Maitao

⁷ Rachipaola-apei maitao ae napao maitao koute-a zhaoh sozhi poa chaorara-a baire. Puletao hai zhaoh sobaleyu donou choha-a laire. Ramai nou vepare donou zho ngaopeiyu sü sükulou hore, alia napao maitao-a kaozü hinou chidei soupeilou more.

⁸ Puletao nou buyu buh teitei hisü rüpa phoutsü khaiwure, sheeyu buh ali-a hare.

⁹ Puletao nou Eye paoshiwe, alia haibüa paoe, “Puhnou thaoye doupeilai touwe, ae thao hi ko sü paongao peilai touwe? Süsü naokhokhai touyu nahmaitou ali donou vei-a baie.

¹⁰ Puhnou Etaoye larücha alili nou, lu alili nou, ae daodao tinou doupeilai tea tewe.”

¹¹ Neletao nou achi keipei ba louzü, Mapao ye panou la kukhe rao-a buyu vakou maiye panou neletaoye doupeilai.

¹² Ramai nou neletao veahoyu mai hrülaiye panou bu-so loure donou soupeie, ana puletao nou puh paisü keipei bare.

¹³ Südonou Mapao nou neletaoye sü larüchah alili nou, lu alili nou, ae chichi nou doupei laire. Süthaisü neletao hai phika kapayu chüsü phisü loulai. Neletao hai zhizhu loulai, rüh hinou muloulai, alia hukhamai soua nüpoa talai.

Zion donou Kainghou hi Thoure Beikhei Chuh

¹⁴ Südonou sükhokho soua Jerusalem khasa-a hrüa buyu maitaore, Mapao vei chipao sü keilo.

¹⁵ Neletao hai khaophu soua bure, daiolouzü neletao hai thaiyu maiye koa vo souwure, ae rabedushaoye koa nou ae-ao soukhaiwure tea nou neletao hai hashi tarali veyuma neletaoye soushi lou hore, daiolouzü neletao hai dayu ae kaozü moyu hinou bailou süre tea bure.

¹⁶ Chuo, haibüa Khoukhoulai Mapao nou paoe, “Zukhaio, Enou Zion hisü poa beikhei soure donou veishoyu ae khoushoyu chuh ali soukhaitoue. Chuh sünasü pepolou hoyu kainghou chuh soua beikhei hi thoulaie alia chuh sühisü haibüa larücha rükhai touwe, ‘Lüloucheyu maisü pilai moe.’

¹⁷ Enou kaozü sünou poa chiho chimoyu doure rai sü soulai alia acheche sünou poa thou-taoyu dou zhulai.” Kaomoyu baibuh teitei sü reithou nou kou deihawulai, alia dzüdu nou buh sükhe veishi sü phaipoa takhai bailai.

¹⁸ Süthaisü neletao nou koa athaimaiye vo soukhai touyu sü thaowua bailai, ae neletao nou rabedushao ye koa nou ae-ao soukhai touyu nasü lalou hoa bailai. Veahoyu ae kaozhou ashi sünou neletao jünou veiloua bailai.

¹⁹ Veahoyu ae choroyu sünou neletao hisü thaokhai tumoa teithetsü ae hea-khei sü velai, alia neletao hi ko paoveyu teitei sü ngaopiyu ko khaikho bailai.

²⁰ Neletao hai tsüchi hinou paoyu mai ali büa züphao titouli hinou phi tolujüa ae sahba holoujüa züyu büa bailai.

²¹ Mapao nou Perazim Deichi vanou reih souyu büa soulai, ae Gibeon deikho hinou souyu büa soulai. Puhvei khupayu vah haso khesü puhnou souchekhai toulai.

²² Ramai nou soulai tea paopi peiyu khesü konüso, neletao nou ngaophou moa konü louzü haijünou tateipua neletao hisü peilai; daiolouzü teidei teitei nou soushi souhare donou Khoukhoulai Mapao nou lela chewure touyu paisü Enou choure.

Ramai vei Tsüveih

²³ Enou paoyu paisü keipeio; Enou neletao hi paongaoyu khesü leloua noupeio.

²⁴ Tatamai nou taimou thoure donou dou sha koute-a bubaiwu? Puletao nou ke da-a hrü koute-a bubaivu?

²⁵ Tatamai nou dou shaloua hrüchi cheyu thainou rachipou (dill) ae deihathou (cumin) daothou movu, ae southou alia shithou hai buh macha soua daothou movu, alia tai-mou kukhe hai-a puhvei dou kainghou kainou ki thoumovu?

²⁶ Puhnou puhvei vah haso khesü kabüa soulai touyu sü süwe, daiolouzü Ramai nou puh hisü soutaosou doupeiwure.

²⁷ Rachipou (dill) hai süüpo nou poa dacha moe, moa deihathou hai lukiphi nou poa luwu moe, ana rachipou thou ae deihathou hai süü tai tyanou poa da baiwe.

²⁸ Raokhao soutoure donou sou saowe, ana mai ali nou thou da-a taikoute moe, puletao nou rheiluki pfüa thou dayuma, thou sü reiphe reipho sasa khaichamoe.

²⁹ Tsüdo haitao teitei hai Khoukhoulai Mapao hinou ve-e, ae puhvei tsüdo hai veisho-e.