ISAIAH 25 - SHEEYU BAIBEL (BSI)

Paoshoyu Lou

¹ Oh Mapao, ne hai avei Ramaie, Enou neye tsükhoulai alia ne zhih sü Enou paosho peilai. Daiolouzü nenou khupayu vah tyatyali soupeie, raichoki nou tsüchoda khaitouyu teitei sü nenou veikhai toumoa souvete peie.

² Nenou nuhdu khesü soushi khaiwure, alia puletao vei veihshoa soukhai touyu kivo ae robomü khesü soupepo khaipeiwure. Eletao ngaobamai vei veo fühao teitei sü souhakhai toupeiwure, sükhesü soushupu laimore.

³ Südonou khouko pfüshoa buyu tyahrütao nou neye paosholai, zhaipou shishoa buyu nuhdutao vei tyahrü khenou neye ngaopilai.

⁴ Daiolouzü touha sohayu mainou bailoure buh sü ne-e, veahoyu mainou bailoure buh sü ne-e. Teikhai ae teirü ashi veyu phaki bailoure buh sü ne-e alia teinai soushoyu phaki panou soukao loure sü ne-e. Daiolouzü lekhashi mainou kaki teikhai hüve kivova shoyu büa,

⁵ alia teikoyu phaki soushoyu teikhai hüveyu büa nou ve-e, ana Mapao, nenou ngaoba mai paisü souha peiwure, teinai soushoyu phaki teihao nou kou chaolea loua kaotayu büa lekha ashi mainou lou souyu khesü souha peie.

Ramai nou To Vaire donou Soudayu

⁶ Khoukhoulai Mapao nou Zion deichi vanou deiphao hi buyu tyahrü hrülaiye donou touso aveihli nou vaire donou souda peilai.

⁷ Alia puhnou deichi vanou tyahrütaoye veahoyu sünou hopfü buyu nasü souha peiwulai.

⁸ Puhnou athai nasü teisa polaiwulai, ae Mapao nou mai hrülai nghithou hisü nghidzü southe peilai, alia deiphao hinou hrüa buyu puhvei maitao nou veaho-a chaa pfüa buyu nasü polai peilai, daiolouzü Mapao nou haibüa paoe.

⁹ Teithe haizhou sü mai hrülai nou haibüa paolai, “Puh hai Etao Ramaie, Eletao nou puhye louchewe, alia puhnou Etaoye khailupeie. Puh sü Mapao, Etao nou puhye lüloucheyu vanou chuo Etao hai sava-a nou bure, daiolouzü puhnou Etaoye khailupa peie.”

Ramai nou Moab Maiye Tudeire

¹⁰ Mapao nou Zion Deichi sü vupeilai, ana Moab maiye sü puhnou dou hi rouvao taifüyu büa taifü khaiwulai.

¹¹ Sühi sünou puletao nou dzü dayu mainou bah thaipayu büa thaipalai, ana puletao vei khaophu souyu sü Mapao nou sounakou peia bailai.

¹² Puhnou Moab maivei kushoa soukhai touyu kivo ae reihkhaobu khesü deiphi hi soulakou khaipeilai.