ISAIAH 17 - SHEEYU BAIBEL (BSI)

Ramai nou Sairia ae Israel Maiye Tudeire

¹ Mapao nou paoe, “Damaskas hai nuhdu ali sou-a bupu khailai more, soushi khaitouyu ae tangiyu nakhe nou phoutao poa bubailai.

² Sairia vei nuhdutao hai teisa panou mai hrümoa buyu buh souwulai. Buh sütao hisü zhaotu ae nghitu nou pou touyu ae dazüyu buh souwulai, halinoua puletaoye sü daichoro laimoe.

³ Ephraim maivei reihbutao ae Damaskas vei vedei sü hata bailai, alia shokhaitoua buyu Sairia maitao hai Israel nahmaitao büa khouko ava sü ngaolai,” tea Khoukhoulai Mapao nou paoe.

⁴ Mapao nou paoe, “Süzhou teithe Israel maivei kathe sü hata bailai, alia puletao vei hrübo aveih sü kita bailai.

⁵ Israel mai hai Rephaim Deikho hi buyu doutao chachiyu mainou routhou vakhai loua vaomü likhei shokhai touyu büa bailai.

⁶ Israel mai hai Oliv süübe hi rashithou haikhai touloua puhtao hi rashithou ahai-sü moa botao hinou rashithou asü-dai likhei shokhai touyu büa bailai, tea Israel maivei Ramai Mapao nou paoe.”

⁷ Süzhou teithe sü maikhe mainou puletaoye Souva-apeio Mapao hisü dakhai velai, ae puletao nou Israel maivei Amasheeo sü phoutalai.

⁸ Alia puletao bah nou soukhai touyu bashara khesü thaowulai, ae puletao bah nou soukhai touyu Ashera rapfüpai ae kainüvei pou dei-a posheelayu rathobu khesü louchemo ta-a bailai.

⁹ Israel mainou talouyu phaki Hiv mai ae Amor mainou puletao vei nuhdu khesü thao-a tutayu büa süzhou teithe veyu phaki puletao nou veishoa soukhai touyu nuhdu khesü thao-a tuta bailai.

¹⁰ Daisounou toulouzü neletaoye vupa-apeio Ramai ye sü neletao nou ngaiwure, ae puletao vei baibu chuhdu nasü licholou more. Neletao hai sheeyu kipei alao soukhailoua vakou maivei rahye thore donou soudakhai tou-a bure.

¹¹ Neletao nou shothou khaitouyu süübe khesü vipayuma ae shinamara vuthou khaitouyu khesü paopayuma neletao nou sükhesü touloulai moe, ae veilou hoyu sounou khaikho vedao-a bailai.

Ngaobayu Tyahrütaoye Hraongu Soupeiyu

¹² Khouko pfüsho-a buyu tyahrü khenou raoyu paisü zai hi dzü nou rayu pai büa ra-a bure, alia dzüdu kho payu büa ra-a bure.

¹³ Tyahrütao nou dzüdu külaiyu büa velai, ana Ramai nou puletaoye züpeiyu phaki, puletao hai tudakhai ta-a bailai, teikhai nou thouba hüpoa tayu büa alia teikhai ashi sünou halih hüpoa tayu büa puletaoye sü hüpoa ta-a bailai.

¹⁴ Koukhedao hai puletao nou khushoa veloulai, ana thainesho shona sü puletao hai ha-a bailai. Neletao vei nangi shaolouyu ae teidei soushiyu maitao sü haibüa hata bailai.