ISAIAH 16 - SHEEYU BAIBEL (BSI)

Moab Maiye donou Areih Hayu

¹ Radeiki hilonou buyu Sela nuhdu hisü nou Moab mainou zhaotu ali sü Jerusalem hi khasa-a hrüyu maitao hisü seive peie.

² Raohou phe hinou hulai khaitoua zhaokou zhaokhe-a buyu raohoutao büa Moab maitao hai shizhumoa Arnon reipe hinou takou toukhe-a bure.

³ Puletao nou Judah maitao hisü paoe, “Etao dai-e soulai touyu paopeio. Hea tei soushoyu phaki süübe phinou ve bailouyu büa Etaoye panou neletao phi nou bailo, Etao hai shetumai baie, Etaoye pokupeio, do ashi tya soupeisho

⁴ Etaoye panou neletao teidei hinou buwo, Etaoye souhalai tea phouyu maitao bah hinou vupeio.” (Souchoroyu maikhe sü hata laire, ae veahoyu sü akhai laire, alia maiye soutai sounouyu maikhe sü teidei sühinou halaire.

⁵ Süthaisü acheche ae leshi hinou vebuh ali soushulai, vebuh sühisü David vei tyaosholea hinou hrüveyu mai ali nou bulai. Puhnou acheche hisünou chiku peilai, kaozü nasü phoulai, ae checheyu nasü thashoa soupeilai.)

⁶ Judah mainou paoe, “Etao nou Moab mai hai khaophu soushoyu ae rochiyu sü choue, ana puletao nou khaophu souyu sü hamako baie.”

⁷ Moab mainou puletao veahoyu donou dopfüa kralai. Puletao mai hrülai nou Kir Heres hinou touso aveihli potouyu sü licholoua kralai.

⁸ Hebron hi buyu doutao ae Sibmah hi darkha kipei khesü soushire— daoh teile ali hio tyahrü vei peikho maitaoye panou vashoa sozhiyu vei darkhabe khesü Jezer nuhdu hi ae teinghi palo hai radeiki khete kipoa ta-e, alia teinghi loulo hai athai zai hi koute kikou-e.

⁹ Chuo Enou Jezerye donou krayu büa Sibmah hi darkhabetao donou krawe, Oh Hebron ae Elealeh, Enou nehai donou avei nghidzü kouwe, dai sounou toulouzü neletao vei thoudzü meipa-a chachiloua asashoa shusoure sü hare.

¹⁰ Chamou veisho-a chilouyu doutao donou mailiro savayu sü hare, ae darkha kipei hinou lou soua shusouyu sü hatare. Darkha dzü süa shusoua hihiyu sü raomozhi tare.

¹¹ Südonou Enou Moab ae Kir Heres donou levea-a dopfüe.

¹² Moab hi maitao nou deichi vanou taopa puletao vei rathoki kinou veachi paota-e, ana puletao donou veiyu hali-a ngaolai moe.

¹³ Mapao nou Moab maiye donou rai-a paopeiyu chipao sü haitao-e.

¹⁴ Alia chuo Mapao nou paoe, “Po asü levai hinou Moab maivei nangi teitei sü hata bailai, ae mai alao buyu sü mai daotu shokhaipei bailai alia mai sütao hai-a lelou hoyu maitao nou bubailai.”