ISAIAH 11 - SHEEYU BAIBEL (BSI)

Kaona Shoyu Vedei

¹ David vei veotya hai süübe ali vikhao khaitouyu raibüe; ana süübe hinou süübo lapayu büa David vei tyaosholea hinou veo mai ashu ali hrüvelai.

² Mapao vei Rako sünou puh hisü bupeilai, ae puh hisü ratsü, sükulou süyu tsü, maikhe maiye kholou süyu dokai, khouko, hasü alia Mapao ye piyu rako sü puh hi bulai,

³ ae puhvei asa sü Mapao ye pi-a puh chi züyu nasüe. Puh sü mai zhai zhua nou ae mainou paoyu chi nou poa chiku peilai moe,

⁴ ana acheche hisü nou touha laimai vei chi sü kupeilai, alia veaho laimai vei zü sü vupa peilai. Puhvei kharochi hisü nou kaozü moyu maikheye sü tudei peilai, alia mai ashi maitao sü thaita-a bailai.

⁵ Acheche ae louche louvei hisü nou puhnou maikhe maiye khasa-a nou hrülai.

⁶ Lakhao ae zhaotu sü chavei-a nou koa bubailai, alia khaoshira sü nghitu koa dazüa bailai, chotu ae chipeikhaodu sü koa nou to touzho-a bubailai, alia nahmaitao nou puletaoye sü kho-a bailai.

⁷ Cho ae vuh sü koa pou touzho-a bailai, alia puhai toutu khesü koa dazü bailai. Chipeikhaodu-a chode büa pou toua bailai.

⁸ Nahmaitu nou nghou poa marasoua buyuma puhye sü daolai moe.

⁹ Ramai vei sheeyu Zion Deichi hisü, hatara linoua ve soushi louhoe moyuma ha ashi touyu khesü bupulai moe. Sühisü Mapao ye süyu tsü nou zai hi dzü phoutao buyu büa bubailai.

Vakou Tutayu Maitao Dakhai Vere

¹⁰ Veo David vei tyaosholea hinou shee ali soua vemai ashu ali hrüvere teile sü velaire. Maikhe mainou puhye sü phoulai, ae puhye sü maikhe mainou tsükhoulai.

¹¹ Mapao nou süzhou teithe sü vakou tuho hrütayu puhvei maitaoye sü Assaria, Ejipt, Pathro, Ethopia (Sudan), Elam, Shinar (Babilon), Hamath ae zaipe hinou hrüa buyu maitaoye sü sa-a ki hi dakhai vepu peilai.

¹² Mapao nou tyahrütao hi panou sheeloure donou sahra pola peilai, sübüa puhnou tutayu Israel maiye sü save jüpeilai, alia Judah hinou porarou ta-a buyu maikhe maiye sü deiphao kainghou adai hinou save jüpeilai.

¹³ Israel mai-a Judah maiye ngaoraipu laimoe, ae Judah mainoua Israel maiye souchoropu khailai moe.

¹⁴ Puhai koa nou teinghi loulo buyu Philistin maiye sü reih soulai, ae teinghi palovatha nou buyu maikhe maivei kinangi khesü shaoloulai. Puhai nou reih hulou Edom ae Moab mai jünou veiloulai, alia Ammon mai nou puhai vei chi zülai.

¹⁵ Mapao nou Ejipt hi buyu zai (Suez) sü southe peilai ae puhnou Eupratis reidzü sü soushoyu teikhai nou seive southe peilai, sübüa panou taishoyu reitou hai soupeia maikhe maiye panou deithe hinou kachopo palou süyu soupeilai.

¹⁶ Daoh raiki Israel maitao puopao nou Ejipt thaokhaiwua tayu büa Assaria hinou poa veishoyu ludu sü soupeia hrüa buyu Israel maitaoye sü panou talai.