HOSEA 9 - SHEEYU BAIBEL (BSI)

Israel maiye Souveare donou Hosea nou Paosüpeiyu

¹ Oh Israel maitaore, neletao asah soulaio, neletao mai kukhemai büa savayu sü soulaio; daiolouzü neletao nou khakha vah sü soutaloua nele Ramai ye thaowure. Neletao nou khakhayu vanou thouh-dzü ngaowe teanou sünaye jüpa tare.

² Ana thashoa nou neletao hisü thou-dzü alia theadzü hai chejüyu sü velaire, alia zhaoh-a hata bailai.

³ Israel maiye sü pa Mapao vei teidei hi bupu laimoe; puletao ye pa Ejipt teidei hisü dakhai tawulai, alia Assaria hinou pa sheemoyu touso nou toulai.

⁴ Puletao nou Mapao ye sü zhaoh nghoupei pulai moe; alia puletao nou poa sheelayu nanou Mapao ye sousa peilou laimoe. Puletao vei raokhao hai dopfüa laiyu maivei raokhao büa bailai; süna toulouyu mai hrülaiye sü zhaiwu bailai; daiolouzü puletao vei raokhao hai puletaoye pa houyu ki toure donou baie; Mapao ki hi peima pove loulai moe.

⁵ Paohkhai touyu nüh teithe hi alia Mapao vei khonüh zhou neletao dai soulaige?

⁶ Zhukhaio, puletao ye veahoyu nou ve soupho-rarouyu phaki, Ejipt mainou puletaoye sü save jüloulai, alia Memphis deichi hinou puletaoye sü daovu peilai. Puletao vei muteiyu shahu khesü hea nou muloua bailai, alia puletao vei sahpao khesü pounou tsüpa bouloua bailai.

⁷ Veahoyu teithe sü velaire, paozho khayu teile sü vere; haihai Israel maiye panou sülo. Rachi paolayu mai alia rakoloua vah souyu maiye sü avomaie teanou neletao nou paowe, daiolouzü neletao vei mah sü dushoyu donoue, alia neletao nou Eye sü ngaora shore.

⁸ Rachi paolayu mainou Israel maiye, Ramai vei maitao ye khopeiwe, ana puletao vei ludu teitei hisü raohou rüh southou khaitouyu büa neletao nou soukhaiwure, Rathoki hi buyu mai koutea puhye sü ngaobare.

⁹ Gibeah vei teile hi büa puletao hai kaozü moyu vah khaikho nou soua bubaire. Ramai nou puletao mah sü licholai, puletao nou souyu mah thaifüa puletaoye sü souvea peilai.

Israel Mainou Mah Souyu Thou

¹⁰ “Daoraikio Israel mai hai rekounou buyu darkhabe ali büa Enou ngaoloue. Teile kaovei hinou arai nasoua shipeiyu doushibe li ngaolouyu büa Enou puletao paipao ye ngaoloue. Ana puletao nou Peor deichi hi velou loukhaie Baal ye thotare, alia Enou ngaora shoyu basharah ye sü leshi tare.

¹¹ Israel maivei kathe nasü raohou alinou yaotayu büa panou hata bailai, puletaoye panou nahmaia napu laimoe, poua panou pfülou laimoe, alia nahmaia hrülou laimoe.

¹² Puletao nou nahmai hrüloua kidu palouyuma, Enou southawu bailai, panou mai ali koutea hrilai moe. Enou puletao ye thaoa tayu kisü puletao hai daizhou koute vealaisa.”

¹³ Vulihio Enou Israel mai hai veishoyu heiphao li hinou shokhai touyu nghashibe li büa ngaoe, ana chuo, puletaoye sü southawure donou süthai poa tayu zhaotu ali büre.

¹⁴ Oh Mapao wo, puletao ye peikhaio, nenou daie peilaige? Puletaoye sü nahapfü alia naodzü hayu pfümai büa nou peikhaio.

Mapao nou Israel Maiye Tudeere

¹⁵ Puletao vei ashi teitei hai Gilgal hinou haotare; buh sühinou puletaoye sü Enou ngaora tare. Puletao nou ashi souyu donou Aki hinou hulaiwulai. Enou puletaoye sü zhuvea peilai more; daiolouzü puletao vei peikhomai hrülaia Eye haia baire.

¹⁶ Israel mai haio kitayu süümaa ali büa bailai, puletao hinou shithou lia shipu khailai moe. Puletao nou nahmaia hrülou laimoe, hrükhaiyuma puletao vei leshiyu nah zütouye sü Enou southawu bailai.

Rachipaolawo nou Israel Maiye donou Paoyu

¹⁷ Daisounou touyuo, puletao nou Ramai chi zübare; puletaoye sü pa tyahrü kukhe mai hrohinou raroua tayu mai souwulai.