HOSEA 8 - SHEEYU BAIBEL (BSI)

Israel mainou Bashara ye Thoyu vanou Mapao nou Aetoumoyu

¹ Mapao nou paoe, “Ngaoba mainou Amaitao vei teidei hi loure donou rashopeiki büa laire, shabe sü houre donou soudalouo, daiolouzü puletao nou Eye koa Vo soukhai touyu nasü souphewure, alia Avei chikha khesü pfüthouwure.

² Puletao nou Eye sü ‘A Ramai, Eh Israel mainou neye süwe’ tea paowe,

³ Ana puletao nou vah aveih nasü soumoa malaiwure; südonou puletaoye sü ngaoba mainou ngoulaiwulai.

⁴ “Puletao nou Ahi noumoa vemaiye doloua baiwe, alia puletao nou Avei tsü loukhai moa peikho-apeimai ye dolou baiwe. Puletao nou shahu alia sana nou lah puletao ye soushi loure bashara taosü souloua baire.

⁵ Oh Samaria, nenou chode zhu hinou bashara soukhai touyu nasü Enou aetou moe, Avei lekha-rarou sü sütao hinou bue. Neletao teile kasho shee-a hrülou holai hie?

⁶ Haihai Israel hi shara soumai nou soua baie, sühai Ramai moe. Samaria vei chode zhai hinou razhu soukhai toua buyu nasü souphe-souphosa wulai.

⁷ Daiolouzü puletao nou teikhai vuthoua baie, südonou puletao nou rürai chiloua bailai. Meimoyu dourou haio hasou chileea thoushi peilouhoe, peikhai yuma vakou maiye panou touloua bailai.

⁸ Israel maiye yaoloure; chuo puletaoye pa tyahrü tao hrohinou muhayu likhao li büa bailai.

⁹ Daiolouzü Israel mai hai rekounou buyu rheisüh li büa lah dosoua taho Assaria mai hinou soukha khowe, alia tyahrü kukhe mai hinou vupeio tea seihla peiwe.

¹⁰ Puletao nou tyahrü kukhe maiye ngaloua me soulou yuma, chuo Enou puletaoye sü pove dzüloua souvea talai. Puletao nou vemai alia peikhomai khakhe hinou thashoa veasho talai alia choroa hrülai.

¹¹ “Israel mainou mah sousheere donou posheelayu chukho sü soupu pakhaie, puletao nou mah soupu loure buh sü poupa-a baire.

¹² Enou puletao ye donou Avei kharochi thethe rüpeia buyuma, puletao nou sühai sükho moyu büa poba-a laiwu baire.

¹³ Puletao nou Mapao ye poa sheela yuma, sheelayu sou toua buyuma; Mapao nou süsü jüpa more. Chuo, puhnou puletao mah sü licholaire, alia mah sütao donou puletaoye sü tudee apei sü souwu laire; puletaoye pa Ejipt hi dakhailou hrülai.

¹⁴ “Daiolouzü Israel mainou bure ki aveih souloua Mapao ye sü ngaiwure; Judah mainou reihbu aveih taoli soukhai toua buyuma; Enou reihbu sütaoye sü meinou deiwulai alia puletao vei fühao teitei sü souhawulai.”