HOSEA 7 - SHEEYU BAIBEL (BSI)

¹ “Enou Amaitaoye kaozhou aveih peida khailai touyu phaki, Enou Israel maiye souvei peilai touyu phaki, puletao vei mah alia vah ashi khaikho nou ngaoa baire; daiolouzü puletao nou dayu vah souwe, avao mainou mai ki dakhao louwe, alia maivei saotou mainou ludu kinou dua saolaiwe.

² Ana puletao nou ashi vah soua laiyu hai Enou lichowe touyu puletao nou chomoe. Chuo puletao nou soukhai touyu vahtao nou puletaoye sü sühao loure, vah sütao teitei hai anghoujü nou buwe.”

Veo vei Fühao hinou Vah Ashi Souyu

³ Mapao nou paoe, “Puletao nou vah ashi souyu nanou veo sü poa le sousa peiwe, alia puletao vei shodo ashi nanou peikhoyu maitaoye le sousa peiwe.

⁴ Puletao hai maiye sapayu mai khai toue; puletao vei lekha-rarou haio raokhao khaoyu mainou deipa souhshoa khaitouyu meifü libüa baie, süsü raokhao khaoyu mainou chemo koute mei chüthoyu hai komoyu büa baie.

⁵ Puletao nou veo vei nüh hisü zhaoh shozhia baiwe; alia mai-ashi maiye koa vah souzhowe.

⁶ Daiolouzü puletao lekhe hai tsü-ashi teanou souhshoa buyu meifü ali büa bue, kheimathe puletao vei rarou nasü hokhai touyu hai meikei li büa shona sü taopawe.

⁷ “Puletao mai hrülai nou lekha shiyu hai meifü ali büa souhwe, puletao nou puhmaiye tukhasa-a hrüyu maitaoye sü deipeiwe. Puletao vei vemai hrülaia kaotare; ana puletao mai linoua Eye phoumoe.”

Israel alia Tyarüh Kukhe Maitao

⁸ Israel mainou tyahrü kukhe maiye koa do zholoure; puletao hai podamoyu raokhao ali büre.

⁹ Vakou mainou puletao vei khouko sü potare, ana haihai puletao nou sümoe; puletao vei teile sü khadawure, ana süsü puletao nou sülou more.

¹⁰ Israel mainou khaosouyu hai nou puhye hraiyu shee soungaowe; puletao hi pa-a buyu vah hasotao donou puletao hai Ramai Mapao hi dakhai velou moe, mokhaia haikhe donou puhye phoumoe.

¹¹ Israel mai hai tsü hayu khao büa zhaoa laibaire; puletao nou Ejipt maiye soukhapeio tea kuwe, alia Assaria mai hi tuvewe.

¹² Puletao nou tayu thaifüa, Enou avei rüh sünou puletao ye beloulai; Enou puletaoye tei hi raohou li büa ponya kouwulai; puletao nou vah ashi souyu thaifüa Enou puletaoye sü tukha souwulai.

¹³ “Puletaoye sü panou veatheo, daiolouzü puletao nou ahinou tarei tare! Puletaoye sü pa hatheo, daiolouzü puletao nou Eye ngaopi moa dure! Enou puletaoye vupa peinüwe, ana puletao nou da-a Eye paoshia laibaire.

¹⁴ Puletao nou chechea kra-a ahi khomoe, ana rashiye thoyu mai büa kaodua thowe. Puletao nou thou-dzü alia zhaoh ye donou pfüphao souvea-a zheemü soupaloua akho souwe, süsü daizhou koute Eye ngaophou moa souwe.

¹⁵ Enou puletaoye sü mai büa soudu-sousho papeie, alia puletao vei reih baseia soukhou-souvei peie, ana puletao nou chuo do-ashi phoua Eye sü dua baire.

¹⁶ Puletao nou khouko hayu Baal rahye thotare; puletao hai chuo louche loushiyu voulou büa baire, puletao vei peikho maitao hai khoche vanou kaolai, daiolouzü puletao nou chidu-ladu paoa laibaire, haka tayu phaki puletao hai Ejipt mai dzünü souwulai.”