HOSEA 2 - SHEEYU BAIBEL (BSI)

¹ “Neletao hai amaie” alia “Neletaoye sü zhuvea peiwure,” tea ne thaihou-jürai maitao alia ne tu maitao hi paopeio.

Chilee moyu Gomer - Chilee moyu Israel

² Anah maitaore, ne pfü hi paopeio, puh hai Achapfü more, alia E-a puh cha more teanou, ne pfüye nou khakhayu alia chilee moyu vah sü soupu sou baio tea paopeio.

³ Molouzü Enou puhye sü sabanü laoshawulai alia nakou raiki büa panou baitou bailai, alia puhye panou mai hrümoyu rekou büa bailai, alia puhye sü pa teinai nou phukiyu deili bü peilai ae puhye sü panou rei-zü shoa thailai.

⁴ Puh nahmaitao hia Enou zhuveayu bulai moe, daisounou touyuo puletao hai khanah baie.

⁵ Daiolouzü puletao pfü hai khakha wure, puletao ye poupfüyu paisü hraongu vah souwure. Daiolouzü puhnou paoe, “Eh aleshi maitao thaifüa talai hie, puletao nou Eye touso, dzü, soumai, louhsa (sabanü), theadzü alia zhaoh sü peiwe.”

⁶ Süvanou Enou puhvei ludu sü shunou khahaowulai; alia Enou puhye sü bouvo nou vo nuwulai, sükure toulouzü puhsü puhvei ludu phouha-a bailai.

⁷ Puhnou puhvei leshi maitao thaisü hutalai, ana puletaoye sü ngoulouhoe; alia puhnou puletao ye sü phoulai, ana puletaoye sü ngaolou laimoe. Süthai puhnou paolai, “E talaire alia dakhaive acha raina hi vebai laire, daiolouzü Eye donou chujünou raikia veipua baire.”

⁸ Enou puhye sü thou-dzü, zhaoh alia theadzü peiwe touyu hai honapai nou sümoe, alia puletao nou Baal ye poa sheelayu hu alia sanatao hai daichi nou vewe touyu sülou moe.

⁹ Südonou Enou chachiyu pha koulouzü Athou sü pokhai loulai, alia zhaoh cheyu pha koulouzü, Enou po dakhailou bailai; alia puh vasou holouyu Avei soumai alia sabanü sü Enou laoloua bailai.

¹⁰ Chuo Enou puh leshi maitao nghoujü hinou puhye hrao soupeilai, alia puhye sü mai linoua abah hinou vupa louhoe.

¹¹ Enou puhvei savayu, khonüh, rah thoyu teitei, alia dopakhai touyu nüh pfüphou panou soupulai moe.

¹² Honapai nou puhvei darkha shibe alia doushibe taohai “A leshi maitao nou peiyu avei vahshie” tea paoyu tao sü Enou soushi wulai, alia Enou sükhesü rekhaona panou touloua bailai.

¹³ Puhnou kainüvei nou dei poa Baal ye posheelayu donou, alia mutei noubo ae touhnou tupfüa/maipoa puh leshi mai thaifü taloua Eye ngaiyu vanou, Enou puhye sü tudee souwulai tea Mapao nou paore.

Mapao nou Puh Maiye Leshiyu

¹⁴ Südonou, chuo Enou puhye seiloulai, alia puhye sü rekou save khaiwulai, ae puhye sü pai süla veinou cha-a bailai.

¹⁵ Alia sühinou puhye sü Enou puhvei darkha kipei sü peilai, alia Ankhor deikho sü panou areih kikhu soupeilai. Sühinou puhnou nahlea buki Ejipt teidei hinou tapalouyu phaki büa chila peilai.

¹⁶ Mapao nou paoe, süzhou teithe nenou Eye “A khapu” tea kulai alia nenou Eye “Apaopu” tea kupu laimoe.

¹⁷ Daiolouzü puh mü hinou Enou Baal zhih sü popa laiwulai, alia puletao nou zhih sünasü pao pulaimoe.

¹⁸ Süzhou teithe Enou rekhaona, teihi raohou alia dei hinou kei-a laiyu poudai koa ne maiye Vo souwulai; süthai Enou voulou, khoche, alia soureih sü nemai teidei hinou souhawulai; alia Enou nemaiye pa kaozhou shilia ha-a hrülai.

¹⁹ Enou neye teisa nou akhapfü soure donou poloulai; Enou neye acheche alia souzü hinou, tobai soumoa leshiyu alia zhuvea hinou akhapfü soure donou poloulai.

²⁰ Enou neye acheche hinou poloulai, alia nenou Mapao ye süloulai.

²¹ Mapao nou paoe, “Süzhou teithe Enou rakiva hi chila peilai, alia puletao nou deiphao hi chila peilai;

²² alia deiphao nou thou, zhaoh alia theadzü hi chila peilai, alia sütaonou Jezreel hi chila peilai;

²³ alia Enou puhye A deihie vukhai peilai. Enou raiki zhuvea moyu taoye zhuvea peilai, alia Enou Amaimotao hisü paolai, ‘Neletao hai A maiye,’ alia puletao nou ‘Ne hai Avei Ramai-e,’ tea paolai.”