HOSEA 14 - SHEEYU BAIBEL (BSI)

Hosea nou Israel Mai hi Khoyu

¹ Oh Israel maitaore, neletao Ramai Mapao hi dakhai velouo, daiolouzü neletao nou mah souyu vanou neletao phi süloua baie.

² Mapao hi dakhai velou baio, alia haibüa puh hinou veachi paolo, “Etao vei mah teitei nou khaipeio alia zhuvea nou Ehye podakhai peio, sükulouzü teisa nou Neye paosholai.

³ Assaria mainou Ehye khailu peilou hoe, alia rhei pfüa reih souyu hainou Etao ye vupei louhoe. Etao nou bashara naye ‘Etao Ramai,’ teanou paopu khailai more. Daiolouzü pfüpuo ha-a veahoyu maiye zhuvea peire hai Ne likhei baie.”

Mapao nou Israel Maiye Hrü Ashu Peilaiyu

⁴ Mapao nou paoe, “Enou puletaoye sü Ahi sa-a dakhai veloulai, puletaoye sü Ale teitei nou peia leshi peilai, daiolouzü Avei lekha-rarou nasü puletao hi bupu khailai more.

⁵ Deithe hi teirü kouhpeiyu büa Enou Israel mai hisü rükouh peilai, puletao nou hüvei shoyu poupa büa veishoa papalai, alia Lebanon hi süübe büa puletao maasü chülou loulai.

⁶ Puletao vei bo hai veishoa holo-hailo vikhelai, puletao hai hüvei shoyu poupa ali bülai, alia puletao hai kaivei shoyu Lebanon vei Sedar süübe kulai.

⁷ Puletao nou Ahi dakhai ve Avei shouh khenou hrüpulai, alia puletao nou routhou be libüa veishoa hrükhelai; puletao nou darkha shibe libüa veishoa vikhelai, alia zhih tashoyu Lebanon vei zhaoh büa puletao zhih sü talai.

⁸ Oh Israel, neletao vei bashara nasü E poa daisoulai? Neletao ye kikopa peiyu nasü E baie. Teisa nou daia buyu süübe ali büa Ewo bubaie, Ahinou neletao vei rashithou sü ve-a baie.”

Akhai chipao

⁹ Tsüveia buyu maiye sü panou chipao haitao sülo, vei-shi sükulou süa buyu maiye sü pa haitao polo; daiolouzü Mapao vei ludu sü kaowe, alia acheche mainou ludu süna hai talouwe, ana mah maio louzü süna hinou phi süloua bailai.