HOSEA 13 - SHEEYU BAIBEL (BSI)

Israel Maiye Akhaina soua Chikure

¹ Daoh raikio, Israel mainou chipao khaie, puhye mai kukhe nou ngaopia tsükhoue. Ana puletao nou Baal ye thotayu donou mah sü soure alia süvanou puletao hai veata laire.

² Chukoutea puletao nou mah sü soupu khaikhaia bure, puletao nou lahye donou soukhai touyu razhu sü puletao vei tsüdo na thaifüa shahu nou bashara souloua baie, sütao teitei hai shara souyu mainou souloua sünaye thowe. Puletao nou “Haina hi poa sheela peio” tea paoe. Maikhe maitao nou chotoutu zhu hinou soukhai touyu basharaye sü mü nou mua thowe.

³ Süvanou puletao hai shona vei teihao alia vidzü büa hata zhia bailai, puletao hai teikhai nou hüpota-a buyu thouba büa bailai, alia vabomü hinou payu meikhao büa hata-a bailai.

⁴ Mapao nou paoe, “Neletao ye Ejipt hinou sapa peiyu Ramai nasü E-e. E moa nou rah kusü ali-a hae, E likhei nou neletaoye khailu peiloure Mapao sü baie.

⁵ Vaohro alia deiki hinou neletaoye kiko papeiyu nasü E baie.

⁶ Ana neletao nou teidei aveih hi loulou khaie, tousü-sosü ngaoloukhaie, neletao nou khaosouloua Eye ngaiwure.

⁷ Südonou kipeikhaodu ali büa Enou neletao ye dulai, alia shirakhao nou ludu pehinou dahyu büa Enou neletaoye sü dahloulai.

⁸ Tyoutu hawuyu vuhkü ali nou lekha shiyu büa Enou neletao ye sü thaopeilai moe, alia neletaoye sü daokhao sasalai. Kipeikhaodu nou soukhaonaye paide-paipho sasa-a toukhai louyu büa Enou neletaoye sü souha khaiwulai.

⁹ “Oh Israel maitaore! Enou neletaoye sü soushi-souhawulai; neletaoye sü thaonou soukha peilou süge?

¹⁰ Neletao nou ‘Etao ye vemai alia süthai-apeimai peio’ teanou kholouyu vemaitao sü chuo neletaoye khopeire donou daiki nou bue? Neletaoye vupei laiyu süthai-apei maitao kalo nou bue?

¹¹ Avei rarou hinou neletaoye sü vemai peia baie, chuo Enou Avei lekha hinou puletaoye sü potawulai.

¹² “Ephraim mainou soumah khaitouyu taosü Enou pokojü khaitoue, sütao hai soutao soua rükojü khaitoue.

¹³ Israel maiye donou hriloure ludu sü bue, ana puhnou voleyu donou hriloure ludu nasü tabare. Israel mai haio pfünou khyasoua nah nalai teanou buyu phaki nah nanou koubayu büa baire.

¹⁴ Enou mai haitao ye sü athai vei khouko hinou mokhaia rabedushao kouhlai ludu hinou vupa peilai moe. Oh athaio, nevei veahoyu nasü daiki nou bue? Oh rabedushao, nevei souha peilou süyu khouko nasü daiki nou bue? Neletao hisü Avei zhuvea leshiyu hai bupu khailai moe.

¹⁵ Israel mainou kheipaoyu büa veishoa paopa buyuma, souhshoyu teikhai ye panou teinghi palo vanou hüve puhmai vei dzühou sü southe bailai, alia puletao vei dzüla khesü theta bailai, alia muteiyu na teitei hai puletao hinou poa tawulai.

¹⁶ Samaria mainou Ramai ye ngaopi moa duyu vanou puletaoye sü tudee souwulai, puletaoye sü pa khoche mü hinou kaokhai touwulai, puletao nahmaiye sü daode sawulai, alia poupfüa buyu naotu maitaoye sü panou chaoyu buh halai.”