HOSEA 11 - SHEEYU BAIBEL (BSI)

Ramai nou Israel maiye Leshiyu

¹ Mapao nou paoe, “Israel mainou nahlea buki, Enou puhye leshie, alia Ejipt hinou tapayu phaki Enou puhye ‘Anahpoutu’ tea kuloue.

² Enou chuo puletaoye kupu khaige, puletao hai Ahinou tadou pu ta-a baire; puletao nou Baal ye sü posheela peipua baire, alia basharaye sü kainüvei nou meidei peia tho baire.

³ Ephraim maiye sa-a tadou peiyu nasü Eye, Enou puletaoye sü kethaipoa kidu papeie; ana Enou puletaoye kidu papeie touyu sü puletao nou süloumore.

⁴ Zhuvea leshiyu rainou poa Enou puletaoye süthai tapeie, Enou puletao vei kou masüyu nasü southapeie, alia Enou kikouh loua puletaoye sü tomü peie.

⁵ “Puletao nou chuo Ejipt teidei hisü dakhai talai, alia Assaria mainou pa puletao vei veo sü souwulai, daivanou toulouzü puletao nou Ahi dakhai ve bare.

⁶ Puletao vei nuhdu khesü khoche nou souhawulai, puletao vei rokhubomü khesü pa meinou deihawulai, alia puletao nou lahdo soua tayu donou reih hinou pa thaikhaia bailai.

⁷ Amaitao hai ahinou turei talai tea tetei lou baire, südonou puletaoye pa kou süyu pfülai, puletao nou pfüyu kou nasü mai linoua pokouh peilou hoe.

⁸ “Oh Ephraim, kabüa nou E neye sü thaoloulai? Oh Israel maitaore, E neletaoye sü kabüa nou mai kukhe mai bah hi thaothou loulai? Kabüa nou E neletaoye sü Admah mai kua souha khailaige? Mokhaia kabüa nou Zeboüm maiye souveayu büa neletaoye sü souvea khailai? Neletao ye tudee-a souvealai toukhaie, Alesü neletao ye zhuveayu nou phoutsü loua baire.

⁹ Enou neletaoye sü avei lekha-rarou nanou poa souvea khailai more; Enou Israel maiye sü souha khailai more, daiolouzü E hai mai moe, Ramai-e, neletao hrohinou sheeyu nae, südonou neletaoye sü souha khailai more.

¹⁰ “Enou kipeikhaodu büa puletao ngaobamai hi rapayu phaki, Amaitao nou Eye thaifü ta-a bailai. Puletao nou ngaopi shoa teinghi loulo nou Ahi velai;

¹¹ puletao nou raohou li büa Ejipt hinou yaopoa velai, alia khao büa Assaria teidei hinou velai; Enou puletaoye ki hi sa-a dakhai ve peilai,” tea Mapao nou paoe.

Ramai nou Israel alia Judah Mai hi Aetou moyu

¹² Israel mainou madayu alia vah ashi souyu hai nou Eye sü sühao loua bubaire, alia puletao vei acheche alia sheeyu Ramai Eye Judah mainou chukoutea dua bu baire.