HAGGAI 1 - SHEEYU BAIBEL (BSI)

Rathoyu Ki Soushupulo tea Mapao nou Kharochi Peiyu

¹ Persia hi veo Darius nou vekou louyu po ahai-a khouh arou vei khouhngao lizhou Mapao vei chipao hai rachi paolawo Haggai hi ve-e. Chipao sünasü Judah teidei khowo Shealtiel nahpoutu Zerubbabel alia Jehozadeth nahpoutu, napao peicha Joshua ye donoue.

² Khoukhoulai Mapao nou paoe, “Mai haitao nou paoe, Mapao vei ki soure teile mohie.”

³ Süthai Mapao vei chipao sü rachi paolawo Haggai hi haibüa paoe,

⁴ “Aki shisasa-a bulikhu, daisounou neletao lah neletao vei ki sü veihsho-a nou buge?

⁵ Südonou chuo Mapao nou haibüa paore: Neletao hi dai vepawe tiyu neletao-a soutao sou-a tsücho khaio.

⁶ Neletao nou thoutai alao sou vuh thouwe, ana daotu chiloua baiwe, neletao nou touwe, ana rukha moe; neletao nou kewe, ana rukha khaimoe; neletao nou sabanü banouwe, ana neletao mailia lülou moe. Neletao nou zho kuyuma kupove lekha chayu hi thouwu baiwe.”

⁷ Khoukhoulai Mapao nou paoe, “Neletao dai souwe tiyu soutaosou tsücho khaio.

⁸ Deichi hi taopa lou-a süü pove Aki sü soutakhaio, sütilouzü E-a sühinou asalai alia Eye khuhao zü hinou khuhao khaio.”

⁹ “Neletao nou alao zhi-a bue, ana titya ngaolou baiwe; sütao koutea neletao nou ki hi poveyu phaki, Enou nghoulai bailai. Daisouyu donoue? tea Khoukhoulai Mapao nou nou-e. Süsü daisouyu donoue tilouzü Aki shisasa-a bulikhu, neletao mai hrülai hai lahkuku ki souvayu donoue.

¹⁰ Südonou neletao hi raki vanou vidzü sü seikou peimore, alia dei hinou shina mara papei more.

¹¹ Enou deikho, deichi, dou, darkha kipei, theadzü, dei hinou payu shiratao, mai ae kikhaorü ae neletao nou souyu vah teitei hie teikoyu pove peiwure.”

Maikhe Maitao nou Mapao vei Kharochi Zülouyu

¹² Süthaisü Shealtiel nahpoutu Zerubbabel, napao peichana Jehozadak nahpoutu Joshua alia mai hrülai nou puletao Ramai Mapao chi züloure, alia rachi paolawo Haggai hi Ramai nou seiveyu chipao sü züloure; ae puletao nou Mapao ye ngaopi loure.

¹³ Süthai Mapao vei chipao paolawo Haggai nou puhmaitao hi Mapao vei chipao sü haibüa paopeie, “E-a neletaoye koa bue”, teanou Mapao nou paoe.

¹⁴ Judah teidei khowo Shealtiel nahpoutu Zerubbabel alia napao peichana Jehozadak nahpoutu Joshua ae mai hrülai le sü Mapao nou souhro peiwua puletao nou tave Khoukhoulai Mapao vei ki sü,

¹⁵ Darius veo nou pa vekou louyu po ahai-a khouh arou vei teithe kaidai zhou Mapao vei ki sü soutare.