GALATIAMAI 5 - SHEEYU BAIBEL (BSI)

Neletao vei Mado nasü Pokhaitoulo

¹ Madosoua hrüloure donou Khrista nou Eletaoye do soupeire! Südonou do soulouyu mai kua latoulo, alia lah neletao khailou kilaivei kousü pfüpuwuso.

² Keiloukhaio! Paul Enou neletao hi paowe süolouzü neletao nou hee rodeyusü polouzü Khrista hai neletaoye donou ha muhlia hazheire.

³ Hee rodeyu maitali hisü Enou zhopaoh soua paopuwe. Süolouzü puhsü razhai teitei züvuzülai.

⁴ Razhai vanou Ramaiye koa souzü loure teyu neletaowo louzü Khrista hinou kotare. Neletaowo Ramai zhuvea hinou kaotare.

⁵ Ana Eletao nou lü vanou vahsoua buyu Ramai Rako süna vanou achechena vei areih sünaye sü Ehnou khoshopoa bue.

⁶ Daiolouzü Eletao nou Khrista Jisu ye koa ali soua bubu kisü hee rodeyu moa hee rodemoyu sünanou halia soukuyu hae; soukuyu süwo louzü leshi vanou vahsoua buyu lü sünasüe.

⁷ Neletaosü soutaosou tu-a bue! Neletaoye thaohnou achechenaye zülou more nukhaire?

⁸ Haibüa nukhaiyu süsü neletaoye kulouyu Ramai puh hinou vemoe.

⁹ Maikhe mainou paoyu kua, “Kheih daotunou sou teiteiye soulah peiwe.”

¹⁰ Ana chukoute neletao nou mai kukhe chinou moa Achinou popei baishulai touyu sü Mapaowo hinou Enou louche-a bue; alia neletaoye tsübo souha-a buyu maitaliye sü Ramai nou chikulai.

¹¹ Ana Athaihou jürai khemai, chu koute Enou hee rodeyu vanou paodoua bulouzü daidonou Eye chukoute-a souveawe? Sübüa paodoua bulouzü Enou Khrista vei kros vanou paodoua buyu hisü halia phi süloure hae.

¹² Neletao le souchoro-a buyu puletao donou louzü hee rodeyu likhei baimoa lah puletao vei vasou süna teitei-a vadelaiyu sü Enou züpawe!

¹³ Athaihou jürai khemai, neletaoye sü mado souloure kuloure. Ana neletao vei mado nasü vasou züpa thaifüa po vah souwu moa leshi hinou neletao alinou liye kuvah souloukhaio.

¹⁴ Daiolouzü razhai teiteisü chikha alikhei hinou vetekhou baie: “Nenou lah neye leshiyu kua nevei kinapaye leshilo.”

¹⁵ Ana neletao nou rekhaosou kua alinou liye soushi soukha-a bulouzü, zhutou loukhaio, molouzü neletao nou alinou liye souhakhai bailai.

Rako ea Emai Zhai

¹⁶ Ana Enou paowe, Rakoye panou neletao hrümaisü süthaia taloukhaio, sübülouzü neletao nou vasou züpa rukhasü souwu laimoe.

¹⁷ Daiolouzü vasou züpa sünanou Rakoye motouwe, alia Rako züpa sünanou vasouye motouwe: daiolouzü neletaoye panou neletao züpasü soulou more donou sühaisü alinou liye motouwe.

¹⁸ Ana neletaoye Rakonou süthaipeia bulouzü neletaowo razhai khehi bumoe.

¹⁹ Chuo vasouvei vahtaosü sheesha-a ngaowe: sütaowo louzü, khulou souyu, sheemoyu, chaochao soua hrüyu;

²⁰ bashara thoyu, maiye shuyu, alinou liye ngaobayu, züvayu, maiye ngaoraiyu, rarouyu, dutounüyu, lathao-lamü moyu, mesoukuyu,

²¹ avei zhai ngaobayu, zhaoh shozhiyu, zhaohra payu ea sükuyu kukhetaoe. Enou neletaoye raichokinou tukhayu büa chua neletaoye Enou tukhawe, süolouzü, sübüyu vah souyu maitaosü Ramai Vedei ngaolou hoe.

²² Ana Rakovei shithouwo louzü, leshiyu, sayu, kaonayu, shameayu, zhuveapeiyu, aveina, louchelou veiyu,

²³ nataiyu, alia lahye tukhayu haitaoe. Haitaoye motouyu zhai tali-a hae.

²⁴ Alia Khrista Jisu vei soulouyu puletao nou vasouye sü sünavei züpa ea chaochaosoua hrünüyu teiteiye koa kros vanou veatheare.

²⁵ Rako nou Eletaoye sü ahri peie; puhye panou Eletao hrümai-a tukha sahrü vuzülou laikhe.

²⁶ Alia alinou li züphei soua moa alinou liye ngaorai-a Eletao nou khaophu souwu laimokhe.