GALATIAMAI 2 - SHEEYU BAIBEL (BSI)

Paul ea Kukhe Sei-atamaitao

¹ Süthaisü po kiadai buloua Enou Barnabasye koa Titaye saloua Jerusalem hi dakhaikhe.

² Ramai nou Ahi takhaio tea paongao peiyu donou Enou tae, alia Enou tahrüh kukhe maitao hrohinou paodouyu Ko Avei chipao nasü kheikhei soua süthai-apei maitao nghojü hi paongao peie, molouzü raiki Avei vahtaosü moa chu Enou soua buyu taosü raohata bailai.

³ Ana Eye koa laiyu Tita hai Greekmai alikhai-a puhye sü hee rodere donou nutaimoe.

⁴ Ana madayu thaihou jüraimai kamainou khei-a panou süsü sounüwe. Mai haitao nou lüloumai zhai souloua Eletao nou Khrista Jisu ye koa ali soulouyu hinou buyu mado sünasü kheikheisou phoupaloua Eletaoye panou kilai soua buloure donou Eletao me hrohi velou loure,

⁵ ana Ko Aveina vei acheche nasü teisanou neletao hi panou buloure donou Enou puletao khakhehi nghiphei ali koutea lou hrüpei moe.

⁶ Ana süthai-apeimai zhaisoua buyu maitaowo (Enou sübüa paoyu süolouzü puletao nou daidai soua bukhaia sünanou Ahi halia soukuyu hae; Ramaiwo maizhai zhumoe) puletao nou Avei chipao jünou halia thoupure hae.

⁷ Ana tyakushoa Jihudi maitao hi Ko Avei paodou peire vahsü Pitar hi thoupeiyu kua tahrüh kukhe maitao hi Ko Avei paodou peire vahsü Ramai nou Ahi thoupeire touyu sü puletao nou ngaoloure.

⁸ Daiolouzü Jihudi maitao donou Pitarye sei-atamaili soupeiyu sübüa Ramai vei khoukonou Eye tahrüh kukhe maitaoye donou sei-atamaili soupeire.

⁹ Alia Ramai nou Ahi peikhai touyu zhuvea nasü puletao nou sülouyu kisü, süthai-apeimai soua zhihta-a buyu Jems, Pitar ea Johan nou Eletao hrülai hai koa vah souzhoyu maitaoe touyu shee soua Barnabas Ahaiye bahsüe, alia Barnabas Ahainou tahrüh kukhe maitao hrohinou ea puletao nou Jihudimai hrohinou vah soure puletao nou ae-ao toupeire.

¹⁰ Puletao nou Eh hinou khoyu sünawo louzü Enou sounüshoa buyuna süolouzü Ehye nou puletao mehi buyu toure hamaitaoye licho peikhaio touyu süna likhei baie.

Paul nou Pitarye Züpeiyu

¹¹ Ana Pitar nou Antiok hi velou louyu kisü, Enou puhye sü dua motoue, daiolouzü puhsü kao-zümosho loure.

¹² Daiolouzü Jems hinou taveyu mai kamaitao nou buh sühi veloumo jühi toulouzü, Pitar hai tahrüh kukhe maitao thaihou jürai maitaoye koa touzho-a bue. Ana mai haitaonou velou louyu kisü puhsü thaitsü taloua tahrüh kukhe maitaoye koa toukhai bare, daiolouzü puhsü hee rodeyu züpayu mehi buyu maitaoye sü ngaopiwe.

¹³ Alia puhye koa kukhe Jihudimai thaihou-jürai maitao-a khuha-a thaitsü tare, alia Barnabas koutea puletao vei khuhayu vah sünanou pfüa tare.

¹⁴ Ana Enou puletao hai Ko Avei navei acheche naye koa latoua talou moyusü ngaolouyu kisü, Enou puletao hrülai nghojünou Pitar hi haibüa paoe, “Newo Jihudimai alikhaia Jihudimai ali bümoa tahrüh kukhemai alibüa hrüloua, kabüa nenou tahrüh kukhe maitaoye nou Jihudimai büa hrüre nuwe?”

Lü vanou Jihudimai ea Tahrüh Kukhe Maiye Khaipeiyu

¹⁵ Chechenou, Eletaowo Jihudimai alisoua nakoue ea paoyu büa, “Mahmai tahrüh kukhemai,” moe.

¹⁶ Sütoukhaia Eletao nou süwe süolouzü mai taliye Razhai thaifüa moshilaiyu vah süna souyu donou Ramaiye koa souzü peimoe, ana Jisu Khristaye lülouyu vanou likhei baie. Eletao-a Khristaye lülouyu vanou Ramaiye koa souzü loure donou Khrista Jisu ye louche loure, alia Razhai thaifüa moshilaiyu vah souyu vanou moe.

¹⁷ Ana Eletao nou Khristaye koa ali soulouyu hinou Ramaiye koa souzü loure te-a bulouzü, Eletao lahnou Eletao hai tahrüh kukhemai zhou mahmaitao baie touyu sü ngaoloure; sükulouzü Khristawo mahvei vahvamai aliwu? Süsü hakia moe!

¹⁸ Enou souhayu Razhai sünasü Enou soushupa khailouzü, Enou lah Eye sü razhai soukhoyu maibaie touyu sü pongaowe.

¹⁹ Daiolouzü Esü, Ramai hilonou hriloure donou razhai vanou Ehai razhai hilosü thaire.

²⁰ Khristaye koa Eye sü Kros vanou veatheare; chu hria buyu nasü Emoe, ana Alekhe hinou hria buyu puhsü Khristae. Chu Enou vasou hinou hria buyu hrü haina hai Enou Eye leshi peiyu ea Adonou lah puhye thoupeiyu Ramai Nahpoutuye lüyu vanou hria bue.

²¹ Enou Ramai zhuvea nasü raoha-a pokhaiwu moe, daiolouzü razhai vanou maitaliye Ramaiye koa souzü peire toulouzü Khrista sü hako hinou thaibaire.