EZRA 9 - SHEEYU BAIBEL (BSI)

Jihudimai Moyu Maipfüye Nayu hi Ezra nou Aetimoyu

¹ Vah haitao hai soucheyu thaisü, Israel mai hi süthai-apei maitao nou Ahi ve haibüa paoe, “Süolouzü Israel mai, napaomai ae Levi maitao hai tyahrü kukhe mai hinou kupalou more, puletao hai Ammon mai, Moab mai ae Ejipt mai, moa Kanaan mai hinou veyu mai, Hit mai, Periz mai, Jubush mai ae Amor maitaoye koa ngaorayu vah haso teitei sü soua bure.

² Jihudimai nou vakou maipfüye nayu donou sheesho-a buyu Ramai nahkhe maiye sü souzhaiwure, süthai-apei mai alia adumaitao nou haibüyu mah hisü peicha soue.”

³ Haibüyu Enou sülouyu phaki, ale veasho loua avei sabanütao-a daophawure alia apeishu ae khoumai tao-a paipawua levea sho-a kaolou butare.

⁴ Süthaisü nüpoa tayu hinou dakhai velouyu maitao nou mah souyu vanou Israel maivei Ramai vei chipao choulou-a ngupoa buyu mai hrülai nou koukhe vei posheelayu teile hi koute Eye haopoa bue.

⁵ Koukhe vei posheelayu teile veyu phaki, Enou dopfüa buyu hinou lashu loure alia avei sahnü payutao noupoa Enou Ramai hi khoukhü loua ae abah khapaloua

⁶ Puh hi paoe, “Oh A Ramai, E mai jünou haolere alia apei pfülashu Neye zhulou hore, daiolouzü Etao vei mah hai Eh pei jünou kushore, alia Etao vei mah sü raki khe nghire.

⁷ Daoh Eh puopaoh hinou poa chukoute Nevei mai Etao hai dushoyu mah souwure. Etao vei mah vanou, Etao vei veo maitao mah donou, alia napao maitao mah vanou, vakou veo maitao bah hi loure, southayu, nüloua hukha hi thouyu, soushi peiyu alia hrao ngaoyu hai zhaodo koute soupeie.

⁸ Ana chuo, pha jütouli hai, Eh Mapao Ramai nou zhuvea peia Etao mai daotuli hai Puh vei sheeyu buh hai hi save khaipeie alia Ramai nou Etao nghi hai souva peie alia Etaoye mai kilai hinou phapeia hrü ashu sü peie.

⁹ Etao hai kilai maibaie, ana Etao Ramai nou Etaoye ngaipeimoe. Nenou Persia hi veo ye panou Etaoye jüpayu hai soupeie, alia raiki soushi khaitouyu Rathoki ae bouvo nasü soudakhai paloua Etaoye panou Judah ae Jerusalem hi dakhaive hrüpuloue.

¹⁰ “Anou chuo, Oh Ramai, Eh haithai daichi paolai? Daiolouzü Etao nou Nevei chikhatao hai pfüphewure,

¹¹ Nenou Nevei kilai rachi paolayu mai hi haibüa paoe, ‘Neletao nou talou polou laiyu teidei nahai hashinou phoubue ae sheemoyu mai khaitie,

¹² südonou neletao nahnaotu mai hai homaiki pa veso, mokhai-a panou homaitao nahnaotu maiye naso. Alia teile tarali hia, homaitaoye chavei-a bailai tiyu souwuso, sükoulouzü neletao hai khouchia dei hinou payu haveih taosü toulai alia neletao tyaonah hi kika nasü teisa donou thaothou peiloulai.’

¹³ Haibüa Etao nou vah ashi souyu ae mah souyu donou veayu teitei hai, Etao Ramai-o louzü Etao vei mah jünou tai-e Etaoye tudee baie, alia süpeinou Etaoye haibüa soukha peie.

¹⁴ Sükua buyuma, Etao nou Nevei chikha khesü souphea ae Nenou ngaorayu vah soua buyu maiye sü napu laiwu? Ne, Eye souhakhai touwua panou mai ali-a shokhai mokoute E hi rarou lekha laivu?

¹⁵ Oh Mapao, Israel maivei Ramai, Newo louzü acheche Nae, daiolouzü Etao nou haibüa hrilouyu hai Ne vanou baie. Südonou chuo Etao vei mah hai ne hi pfüve paopawe; Etao mai ali-a ne nghoujü hi ve lalou hore.”