EZRA 7 - SHEEYU BAIBEL (BSI)

Ezra nou Jerusalem hi Velou Louyu

¹ Po taoli thai, Artaxerxes nou Parsia hi veo soua buki, Ezra tea kuyu maili bue. Puh hai Aaron napao peicha tyarai hilo nou haibüa ve-e: Ezra hai Seraiah nahpoutu-e, Azariah nahpoutu, Hilkiah nahpoutu,

² Shallum nahpoutu, Zadok nahpoutu, Ahitub nahpoutu,

³ Amariah nahpoutu, Azariah nahpoutu, Meraioth nahpoutu,

⁴ Zerahiah nahpoutu, Uzzi nahpoutu, Bukki nahpoutu,

⁵ Abishua nahpoutu, Phinehas nahpoutu, Eleazar nahpoutu, Aaron nahpoutue.

⁶ Ezra touyu maipu haina nou Babilon thaowua tare. Puh hai Israel maivei Ramai Mapao nou Moses hi peikhai touyu chikhatao hai süveih shoyu mailie. Südonou puhnou khoyu teitei hai veo nou puh hi peikhai toue, daiolouzü Ramai nou puhye koa zhopeiyu donou.

⁷ Artaxerxes nou veo koulouyu po anai kouhai, Israel maitaoli, napaomai, Levi mai, Rathoki hi lou souyu mai, Rathoki khoyu mai alia vah souyu mai haitaoye koa velou loue.

⁸ Puletao hai veo nou pa vekou louyu po anai khouh angou zhou Jerusalem hi velou loue.

⁹ Puletao nou Babilon hinou tapayu hai khouh ngaorai teithe araikai hinou tapae alia puletao nou khouh angou zhou teithe araina hinou Jerusalem hi velou loue, daiolouzü khouko bushoyu Ramai nou puhye kozho peie.

¹⁰ Ezra nou Ramai vei chikha nasü soutao soua süloure donou puhvei lü teitei nou peia phouwe, daiolouzü Israel mai hisü haitao hai poa vah soure donou alia maikhe mai hi doupeire donou.

Artaxerxes nou Ezra hi Matsü Shoyu Larü Peiyu

¹¹ Artaxerxes nou larü peiyu hai Ezra, Napao maitao alia Israel mai hinou Ramai vei chikha süveih shoyu maitao hi haibüa peie:

¹² “Veo Artaxerxes hinou napao Ezra, Rakiva buyu Ramai vei Chikha süveih shoyupu, kaonayu sü pa ne hi bulou theo.

¹³ “Enou kharochi peiwe, süolouzü avei vedei hinou buyu Israel mai, napao mai alia Levi mai hrülai, neye koa Jerusalem hi venüyu maisü ve-o.

¹⁴ E alia Eye koa vah souyu mai anai nou neye sü seive Jerusalem alia Judah hisü Ramai vei chikha na thaifüa panou zhulai, süsü chuo ne bah hi bure.

¹⁵ E alia Eye koa sa-a vah soupeiyu maitao nou Israel maivei Ramai ye peinü shoa sana ae shahu haitao hai Jerusalem hi Rathoki na soure donou peiwe.

¹⁶ Süpeinou Babilon vei ve teidei hinou nenou ngaolousüyu shahu alia sana teitei, Israel mainou alia napao maitao nou Jerusalem hi Rathoki na poa soure donou peithouyu teitei hai polouwo.

¹⁷ “Pousha haitao hai, ne soutao soua laitou touloua nou poa chode, nghitu, zhaotu, thou alia darkhadzü haitao hrüloua Jerusalem hi buyu Ramai ki nahisü posheela peilai.

¹⁸ Shahu ae sana tao hai nenou alia neye koa sa-a vah souyu maitao nou dai-e souzü touyu nasü Ramai jüpa hinou poa vah soulo.

¹⁹ Rathoki hi po-a vah soure donou ne hi peikhai touyu pai-khao taosü Jerusalem hinou buyu Ramai vei ki hi pove thoupeio.

²⁰ Alia nataralia Rathoki donou molouzü shiyu taosü veo vei kini pozü khaitiyu hinou popa peiloua bailai.

²¹ “E, veo Artaxerxes nou rei dapolova buyu teideitao hi kini pozüa buyu maitao hisü kharochi peiwe: süolouzü Ramai vei chikha süveih shoa buyu napao Ezra nou, darka-a neletao hinou khoyu nataosü puhye peio;

²² puhye sü haizhou khete peia bailai: shahu sühcho 3,400, southou sühcho 10,000, rashidzü bvü 2000, oliv theadzü nou likhou 2000, alia tai hai moloushi teitei hai peia bailai.

²³ Puhvei Rathoki donou rakibu Ramai nou khoyu teitei hai leloutoua sütao sü peilouo, molouzü Puhvei rarou-lekha nasü Eh veo teidei hi veshilai.

²⁴ Rathoki hai hinou vah soua buyu napaomai, Levimai, lou soumai, ki khoyu mai, vah soumai haitao hisü panou kiphao kha khalai moe.

²⁵ “Ne, Ezra, Ramai nou ne hi peikhai touyu dokai hai poloua, rei dapolova nou buyu maitao donou tukha apeimai alia chiku apeimai ye dopalo, alia chikha sümoa buyu maiye sü nenou doupeio.

²⁶ Mai taralinoua Ramai vei chikha alia veo vei chikha züba louzü, puletao hisü chishoyu tukha soupeio, süsü athai, moa nuh hinou hutayu, moa puhvei kini teitei nou polouyu moa hukhaki hi thoulai.”

Ezra nou Ramai ye Paoshoyu

²⁷ Ezra nou paoe, “Etao puopaoh Ramai Mapao ye sholo! Puhnou veo lehi lou peia panou Jerusalem hi Ramai vei ki nahai kathe soure donou souloure.

²⁸ Ramai vei leshi loupeiyu vanou veo alia puhye koa chipha peiyu mai, alia khouko bushoyu puhvei maitao züpasü Enou ngaoloue, Mapao avei Ramai nou Eye khuveiyu peie, alia Israel mai khü hinou peikhoyu maitao-a koa chavei-lathao-a vah souzho louyu hai peie.”