EZRA 3 - SHEEYU BAIBEL (BSI)

Rathoyu Vah Soudakhaipu Louyu

¹ Khouh anai cheyu phaki Israel mai hrülai hai lah lavei nuh hi ve hrüloure, ae puletao nou Jerusalem hi ve dzüloure.

² Alia Jehozadak nahpoutu Joshua, puh ye koa sa-a vah souyu napao maitao alia Shealtiel nahpoutu Zerubbabel ae puhvei tyarai tao koa Israel maivei Ramai sheelayu buh sü soutare. Daiolouzü Moses vei chikha thaifüa puletao nou mei dei-a Ramai peiloure donoue.

³ Puletao nou buh sühaohi bumaiye piyuma sheelayu buh sü soushuloua shona ae khoukhe hi mei dei-a Ramai ye sheela-e.

⁴ Süthaisü rükhai peiyu na thaifüa puletao nou Sahpao nüh sü nüe, alia teithe lihi kazhu koute mei dei-a Ramai ye thoyu kao-e touyu nasü soua posheela peie.

⁵ Puletao nou teithe teithe vei Ramai ye sheela peiyu thai-a, khouh ngaorai teile hi sheelayu alia sheeshoyu Ramai vei khonüh sasü lahlanou peilousü taosü Ramai hi pove sheela peie.

⁶ Khouh anai vei teithe arai nazhou puletao nou meidei-a Mapao ye posheelayu sü soutare, Ramai vei ki beikhei soushu tamoyuma.

Rathoki Soudakhaipuyu

⁷ Persia hi veo Sairas nou kharochi peiyu na thaifüa puletao nou Sidon ae Tair hi buyu chuh ae süü vah soumai hisü sha peiwure alia touso ae theadzü-a peie. Daiolouzü homaitaoye panou Lebanon hinou Joppa hisü sedar süü hai panou zaipeinou pfüve peire donoue.

⁸ Puletao nou Jerusalem Rathoki soure buh hi velouyu po ahai navei khouh ahai cheyu phaki puletao nou vah sü soutare. Zerubbabel, Joshua alia nuhdu hi buyu maitao, napao maitao, Levi maitao alia maibah hinou bua khaiveyu mai hrülai po kai hinou poa taireih payu mai hrülainou Mapao vei ki souyu hi lou khaitoue.

⁹ Joshua ae puh sholyatao, Kadmiel ae puh nahpoutu tao, Bin-nui, Hodaviah alia Henadad nahpoutu tao, alia Levimai hrülai lou-a nou Ramai ki souyu hi sa-a zhupeie.

¹⁰ Mapao vei ki souyu maitao nou beikhei soupayu phaki, napao maitao nou naasouyu vei sabanü nouloua alia shabe nou poa Mapao ye paoshoe, alia Levimaitao, Asaph nahmaitao nou beibei poloua Israel hi veo David nou paoyu thaifüa Mapao ye paoshoe.

¹¹ Puletao nou Mapao ye paoshoe alia kalo paoyu noupu haibüa lousoue: “Puh hai veishoe; Puhnou Israel mai leshiyu hai teisa nou bue.” Mai hrülai nou pai kushoa Mapao ye shoe, daiolouzü Mapao vei ki beikhei sü soushure.

¹² Ana napao maitao, Levi maitao alia khü hi tsümaitao nou, raiki vei Rathoki beikhei soupayu ngaoyu maitao nou beikhei soupayu ngaoloua shusoua krae ana maisou louzü asa shoa shusou share.

¹³ Mailinoua asayu pai alia krayu pai nasü sükulou hore, daiolouzü maikhe mainou shura soulouyu vanou. Puletao nou shura souyu pai hai doushoyu buh hi koute-a süveire.