EZRA 1 - SHEEYU BAIBEL (BSI)

Sairas nou Jehudimaiye Ki hi Dakhai Velo tea Kharochi Peiyu

¹ Persia hi veo Sairas nou vekou louyu po araikou, Ramai nou rachi paolawo Jeremiah hi paokhai tiyu taosü cheche-a pare. Puhnou Sairas hisü thashoa khekou vei kharochitao hai rüpaloua seitapeio, alia paikushoa puhvei vedei teitei hisü phou peikhaio tea lepeie:

² “Haina hai Persia hi veo Sairas vei kharochie, Mapao, Raki buyu Ramai nou Eye panou teideiphao teitei hi veo soupeie alia Judah teidei, Jerusalem hi Rathoki soure vatao-a ahi peie.

³ Ramai nou Puhvei mai soua buyu mai hrülai hisü shiha peiyu soulou theo. Neletao hai Jerusalem hi taveloua Mapao vei Rathokisü soudakhai pakhaio, daiolouzü Puh hai Israel mai veie alia Jerusalem hinou thoyu Ramaie.

⁴ Alia buh tarali hinou hrüa buyu mai hrülai nou Puh hisü shah, sana, na alia khaorü ae süpeinou lahlah nou peinüyu taosü popa Jerusalem hi Rathoki donou peio.”

⁵ Süthaisü Judah alia Benjamin vei khü hi peikho maitao, napao maitao, Levi maitao ae Ramai nou lou le daipeiyu mai hrülai sü Jerusalem hi Mapao vei Rathoki souda khaire donou souda tare.

⁶ Alia puletao vei kinapamai hrülai nou puhmai taoye shah, sana, nakukhe, kikhaorü, muteiyu na alia lahlah nou peinüyu taosü popa soukha peie.

⁷ Süpeinou, Nebukhadnezzar nou Jerusalem hi Mapao vei Rathoki hinou na taoli poloua lah puhvei Rathoki hi khaitiyu taoa Sairas veo nou popa loua dakhai peie.

⁸ Persia hi veo Sairas vei kini pozüo Mithredath panou Judah hi veo nahpoutu Sheshbazzar bah hi chothou peie.

^9-10 Chothou peiyu natao sünou: Sana raikhao 30 Shahu raikhao 1,000 Raikhao kukhe 29 Sana khao 30 Shahu khao 410 Paikhao kukhetao 1,000

¹¹ Na veishi hai peih 5,400 haitao hai sana alia shahu vei na khaitoue. Babilon hi nüpotayu maikhemai Jerusalem hi khaiveyu teile hi Sheshbazzar nou na haitao-a koa pove-e.