EZEKIEL 8 - SHEEYU BAIBEL (BSI)

EZEKIEL NOU ZHO NGAOYU AHAI CHENA ( 8.1—10.22 ) Jerusalem hi Basharatao

¹ Etaoye vakou nüpoa tayu po arou vei khouh arou, khoukha angou zhou Judah hi süthai-apei maitao nou aki hi tave Eye koa nou bue, süteilebü hinou Mapao Ramai vei khouko hai ahi vere.

² Süthaisü Enou zhuyu phaki, mai ali zhai büa ngao-e. Puhvei khya khe hai mai büa nou bue, ae puhvei khya reilo hai southou reivava khaitouyu baosahu büa nou bue.

³ Puhnou bah ali zhai büa thaikou apeishu hinou Eye pailoure. Süthaisü zhokou nou Ramai vei Rako nou Eye ratei hi kusho-a nou pokhere ae Eye Jerusalem hi savere. Puhnou Eye rathoki hi taloure reilova vei rokhubomü hinou salou Ramai vei lekha rarou soupayu bashara khesü ngao-e.

⁴ Sühisü Israel maivei Ramai khouko ava, raichoki Enou Khebar rei hinou ngaoyu bütoua nou buyu sü ngao-e.

⁵ Ramai nou ahi haibüa paoe, “Thai-a bailaiyu mai nare, reilova sü zhukhe khaio.” Enou zhuyu phaki, rathoki hi taloure rokhubomü hinou nghia buyu posheelabu pehao hinou Ramai vei lekha soupapeiyu bashara sü bua nou zhingao-e.

⁶ Ramai nou ahi paoe, “Thailaiyu mai nare, vepa-a buyu vah haso khesü ne ngaoho moe? Israel mainou ngaorayu vah souyu khesü zhukhaio, puletao nou Eye sü avei sheeyu buh hinou doukhai doukhai-a tare donou soupeire. Nenou hai jünou shipuyu vah haso khesü puletao nou soupfüa ngaopulai hie.”

⁷ Puhnou Eye rathoki hi maisou nou vejüa buyu hi taloure kikhubomü hisü salou loure, ae Eye kivo vanou buyu kiqulu chayu ali hai ngao-e.

⁸ Puhnou ahi paoe, “Thai bailaiyu mai nare, kivo sü dakhaolo.” Enou kivo sü dakhao loure, ae kikhu ali büa ngaoloue.

⁹ Puhnou ahi paoe, “sühinou talouloua vah ashi soua buyu ae ngaorayu vah haso khesü zhukhaio.”

¹⁰ Südonou Enou talouloua zhue. Kivo vasü nghou ae sheemoyu khaonatao, alia Israel mainou tho-a buyu hatyatyali hai rüthou khaitoue.

¹¹ Israel maiye süthai-apei mai rainai hai sühinou bue, sühisü Shaphar nahpoutu Jaazariah-a louwe. Puletao mai hrülai nou poukai nüvei deiyu bvü chekhei hai poa nou bue, ae sütao hinou meikhao hai khaopa-a buyu hinou

¹² Ramai nou ahi haibüa nou noue, “Thai bailaiyu mainare, Israel maivei süthai-apei maitao nou kheikhei soua buyu vah haso sü ne ngaoho moe? Kide hinou zhurai soukhai touyu khesü puletao mai hrülai nou tho-a bure Puletao nou haibüa paoe, ‘Mapao nou etaoye ngaolai moe! puhnou etao vei teidei sü thaowua tare.’ ”

¹³ Süthaisü Mapao nou ahi paoe, “Puletao nou hai jünou shipuyu ae ngaora puyu vah haso sü soua buyu sü nenou ngaolai hie.”

¹⁴ Südonou puhnou Eye sa-a rathoki vei reilova buyu rokhubomü hisü save-e ae naotumai ali nou Tammuz rah thaire tea kra-a buyu sü ngao-e.

¹⁵ Puhnou ahi noue, “Thailaiyu mai nare, ne honapaiye ngaoho moe? Süjünou shipuyu ae ngaorapuyu vah haso khesü nenou ngaopu lai hie.”

¹⁶ Südonou puhnou Eye Rathoki lüvai sa-a louloure. Sheeyu buh hi taloure hinou nghia buyu posheelabu ae ludu kohinou mai kaingou phali hai bue. Puletao nou Rathoki hilova sü puletao vei phao hai khailoua teinghi palova reiloua nakou teinghei payu sü tho-a nou bure.

¹⁷ Mapao nou ahi paoe, “Thailaiyu mai nare, süsü ne ngaoho moe? Judah hi mai haitao hai vakou nou ngaorayu vah haso soua buyu ae teidei veishi hi züveiyu ae taidayu sü rukha more. Südonou puletao nou Rathoki hai hi tave loua ngaorayu vah haso khesü soupeia panou Eye raroupure. Zhukhaio, puletao nou Eye ngaophou mosho-a soupfüa buyu vah haso hai!

¹⁸ Avei lekha rarou nasü puletao mai hrülai hisü velai. Puletao mai ali koute-a Enou phapeilai moe, ae puletao hi zhuvea leshiyu hai ali-a ngaopeilai moe. Puletao nou pai chilou süyu koute pai chi-a nou shurasoua ahi veachi sü paolai, ana Enou puletao vei veachi sü kei peilai moe.”