EZEKIEL 44 - SHEEYU BAIBEL (BSI)

Teinghei Palova vei Rokhubomü

¹ Süthaisü mai nanou Eye süthaisa-a Rathoki vei teinghei palova rokhubomü hisü sakou-e. Rokhubomü nasü khuwure,

² ae Mapao nou ahi paoe, “Rokhubomü hai nasü khukhai koute-a bua bailai, ae houkhai toulai moe, daiolouzü Israel maivei Ramai Mapao Enou hai hinou tawe. Südonou rokhubomü hai nasü khukoute-a bubailai.

³ Veo vei nahpoutu likhei nou hai hisü talou sheeyu touso hai avei nghoujü hinou toua bailai. Puhnou kikha taloure hai rokhubomü vei ludu hinou kikha taloure vei kidena hinou loulai ae sühinou dakhai pa-a bailai.”

Rathoki hi Loure Zhaitao

⁴ Süthaisü mai nanou Eye sapoa Rathoki vei nghoujü nou buyu reilova vei rokhubomü hi sakou-e. Enou zhuyu phaki, Mapao vei Rathoki hisü puhnou buyu khouko ava sünou lou phoutao-a buyu sü zhingao-e. Enou apei sü pfüa deiphi hi nakou loure,

⁵ ae Mapao nou ahi paoe, “Thai-a bailaiyu mainare, nenou ngaoyu ae choyu veishi sü soutaosoua licholo. Enou ne hisü Rathoki hi tare zhaitao ae soupfüre vahtao hai paongao peilai. Kabüyu maiye panou Rathoki hi talou tapalai ae kabüyu maiye panou loulai moe touyu khesü leikei-a sütou toulo.

⁶ “Khaitya-a rochiyu Israel maitao nou ngaorayu vah haso soupfüa buyu sü Ramai Mapao Enou heameapoa bupulou hore tea puletao hi paopeio.

⁷ Puletao nou avei Rathoki sü heebi moyu vakou maitao, achi zümoyu maitaoye panou souzhai khaiwure, ae Eye posheela khaitouyu southa ae souzhe hisü puletaoye panou taloure. Avei maitao nou ngaorayu vah haso teitei sü soua nou avei vo soukhai touyu nasü pfüthowure.

⁸ Puletao nou avei Rathoki hi sheeyu naanou hai soure thaosü vakou maitaoye panou souloure.

⁹ “Ramai Mapao Enou heebimoyu vakou maitao, achi zümoyu maitao, ae avei Israel maiye koa hrüzho-a buyu vakou maitao koute-a panou avei Rathoki hisü loulai moe tea kharochi peikhai toue.”

Levi Maitao Panou Napao vei Kuvah Souyu hi Loumoyu

¹⁰ Mapao nou ahi haibüa paoe, “Enou Levi maitao ae Israel mai kukhetao, Eye thaokhaiwua basharaye tho tayu maitaoye tudee peilai.

¹¹ Puletaoye panou Rathoki vei rokhubomü kho-a bailai ae Rathoki hi vah kukhe hai soua bailai. Maikhe mainou meidei-a posheelare hrikhaona khesü puletaoye panou datha-a bailai, alia maikhe maivei kuvah louzü soua bailai,

¹² ana puletao nou bashara taoye thoyu sü süthaisa-a souyu donou ae Israel maitaoye süthaimah peiyu donou Ramai Mapao Enou chaachou soua paowe süolouzü puletaoye sü tudee peivuzülai.

¹³ Puletaoye panou napao soua avei kuvah vei soulai moe, moyuma Eye donou sheeyu na ali ngheikia panou nghikoulai moe, moa sheesheelai Buh hisü panou loulai moe. Puletao nou ngaorayu vah haso soukhai touyu vei tudee peiyu sü hainare.

¹⁴ Puletaoye panou Rathoki hi vah sühno khesü soure donou Enou puletao hi vahbu thoupei khaitoue.”

Napao Maitao

¹⁵ Ramai Mapao nou paoe, “Israel mai kukhetao nou ahi chilee chechemoa motayu phaki, Levi vei khü hinou Zadok vei tyaosholea maitao nou chilee chechetoua avei Rathoki hinou avei kuvah hai soupeie. Südonou chuo puletaoye panou avei kuvah sü soua Enou buyu hinou posheela peiyu southa ae souzhe khesü Eye posheela peilai.

¹⁶ Puletao likhei nou avei Rathoki hisü loua bailai, avei posheelabu hi kuvah sü puletao nou soulai, ae avei rathoki hi rathore sü puletao nou süthaisa-a soulai.

¹⁷ Puletao nou rokhubomü hinou lükhevai buyu chikubu hinou Rathoki hi louyu phaki, puletao hai züzüyu sabanü nou banou-a bailai. Puletao nou chikubu lüvai talou kuvah souyu phaki, moa Rathoki hi talouyu phaki soumaisah nou soukhai touyu sabanü khesü puletao nou banoulai moe.

¹⁸ Sükulouzü puletao hai hudzü palai moe, puletao nou züzüyu sabanü nou banoulai, ana khyakho hai naolai moe.

¹⁹ Puletao nou maisou vejüa buyu vakou tapamo jünou puletao nou Rathoki hi banoupoa vah souyu sabanü khesü phawulai ae sheeyu kidetao hi thaokhaiwulai. Puletao sabanü kukhe nou thouloulai, daiolouzü sheeyu sabanü tao maikhe maiye soushi-a bailai.

²⁰ “Napao maitao hai puletao vei peishu sü saikhai toulai moe ae peishu panou so-a pfüa pülai moe. Puletao nou maipha soua pfüa bailai.

²¹ Napao maitao hai Rathoki lüvai loumojü zhaoh hai sokhai toulai moe.

²² Napao mainou reikhai maipfü moa mimea maipfüye nalai moe; puletao nou sheesha touyu loumainah moa napao maivei kipfü mimeapfü soutayu aliye naloua bailai.

²³ “Napao maitao nou avei maitao hi sheeyu ae sheemoyu natao alia naanou sheeyu ae sheemoyu khesü doupeilai.

²⁴ Züveiyu bulouzü napao maitao nou avei chikha thaifüa chidei hai soupeilai. Puletao nou avei chikha ae kharochi thaifüa khonüh teitei hai reilai ae puletao nou Soteithe nasü shee-a khailai.

²⁵ “Napao mai ali nou lah puhvei pfüpuo, puhvei nahmai, moa thaihou jürai moyuma puhvei tupfüche hi deinou thaiphao kukhe deiwua lahye naanou hinou souzhai loulai moe.

²⁶ Puhye naanou hinou soushee peiyu thai, puh hai teithe anai koute kho-a nou bulai,

²⁷ ae süthai nou puh hai Rathoki lüvai loulai alia puhye soushee loure vei posheela hai posheela peilai, süthaisü puh hai Rathoki hinou kuvah hai soulou veie. Haisü Ramai Mapao Enou paoe.

²⁸ “Enou Israel maitao hi puletao vei zha soua khaphao ali hinou khaphao ali hi peilakoure vei kaalo peiyu büa napao maitao hisü napao maivei vahbu haisü peiwure. Napao maitao nou Israel mai hinou lahvei na touyu hai aliro bulai moe; Eye nou puletao vei soua bailai.

²⁹ Thoudzü vei posheela, mah vei posheela ae paohzho khaipeiyu vei posheela khesü napao maivei touso soulai, alia Israel maitao nou Eye donou tea pokupa peiyu teitei hai puletao vei soulai.

³⁰ Chachilou raikayu hinou veikayu teitei sü napao maivei soulai ae Eye posheela peiyu veishi hai puletao vei zha-e. Maikhe mainou raokhao khaotouyu phaki, raokhaopho arai nasü posheela soua napao maiye peilai ae avei shiha sü mai sütao vei kihikha hi bulai.

³¹ Napao mai hai lahnou thaiyu moa soukhaona nou southa khaitouyu raohou moa soukhaona taralia toulai moe.”